ឃាតកជាបងធម៌ប្លន់សម្លាប់ប្អូនស្រី យកភួយរុំសពយកទៅប្លុងចោល
ខេត្តកណ្តាល ៖ កម្មការិនីរោងចក្រ តាក់សាន់ ម្នាក់ និងជាអ្នករកស៊ីចងការប្រាក់ ឲ្យកម្មកររោងចក្រ ត្រូវបងធម៌របស់ខ្លួនបញ្ឆោទយកទៅ វាយសម្លាប់ប្លន់យក ម៉ូតូ គ្រឿងអលង្ការ និងលុយ ១៥០០ដុល្លារ ដែលនាងបានបាត់ខ្លួន តាំងពីយប់ថ្ងៃសុក្រ ទី២០ ខែកុម្ភៈ ឆ្នាំ២០១៥ ហើយបងធម៌ជាឃាតកបានយកសពនាង ទៅបោះចោល តាមបណ្តោយ ផ្លូវជាតិលេខ៦១ ត្រង់ចំណុចភូមិ ថ្នល់បត់ ឃុំកោះចិន ស្រុកពញាឮ ខេត្តកណ្ដាល ហើយត្រូវបានប្រជាពលរដ្ឋ ប្រទះឃើញនៅរសៀល ថ្ងៃទី២៨ ខែកុម្ភៈ ឆ្នាំ២០១៥ ក្នុងសភាព ហើមស្អុយរលួយ ទៅហើយ។
សមត្ថកិច្ចនគរបាល ខេត្តកណ្តាលបានឲ្យដឹងថា នារីជនរងគ្រោះមានឈ្មោះ សាន់ អាស្រស់ មាន អាយុ ២២ឆ្នាំ ជួលបន្ទប់ស្នាក់នៅជាប់រោងចក្រ ក្នុងភូមិទឹកថ្លា សង្កាត់ក្រាំងពង្រ ខណ្ឌពោធិ៍សែនជ័យ មានស្រុក កំណើត នៅភូមិស្វាយទាប ឃុំអំពិលក្រៅ ស្រុកស៊ីធរកណ្ដាល ខេត្តព្រៃវែង ។ ឪពុកនារីរងគ្រោះ មានឈ្មោះ លី សាន់ អាយុ៤៦ឆ្នាំ ម្តាយឈ្មោះ ចេះ ម៉ារី អាយុ៤៤ឆ្នាំ ជាកសិករ។ តាមរយៈការផ្តល់ព័ត៌មានពីឪពុកម្តាយជនរងគ្រោះសមត្ថកិច្ចកំណត់ អត្តសញ្ញាណជនល្មើស បានហើយ គឺឈ្មោះ សំអុល មុន្នី ហៅ រាក់ អាយុ ៣០ឆ្នាំ មុខរបរកម្មកររោងចក្រ មានស្រុកកំណើត នៅខេត្តកំពង់ចាម ស្នាក់នៅបន្ទប់ជួល ក្បែរនារីរងគ្រោះ ហើយបានរាប់អានគ្នា ជាបងធម៌ប្អូនធម៌ ជាមួយនារីរងគ្រោះ ។
ឪពុកនារីរងគ្រោះបានរៀបរាប់ថា កូនស្រីរបស់គាត់ ត្រូវបានជនល្មើស វាយសម្លាប់នៅក្នុងបន្ទប់ កាលពីថ្ងៃទី២០ ខែកុម្ភៈ ខណៈដែលនាងនៅតែម្នាក់ឯង ហើយបានប្រមូល យកទ្រព្យសម្បត្តិ រួមមាន ម៉ូតូម៉ាក ហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1BW-0197, ចិញ្ចៀនពេជ្រ ០២ វង់ តម្លៃប្រហែល ២.០០០ដុល្លារ, ខ្សែកផ្លាកទីន ចំនួន០១ខ្សែ ទម្ងន់ប្រហែល ៥ជី, កងដៃចំនួន ០១ ទម្ងន់ប្រហែល ៥ជី, ទូរស័ព្ទដៃចំនួន ០២ គ្រឿង ម៉ាក ណូគា និង ហូវៃ និងលុយ ១.៥០០ដុល្លារ។
ឪពុកនារីរងគ្រោះបានបន្ដថា នៅយប់ថ្ងៃកើតហេតុ កូនស្រីរបស់គាត់ នៅក្នុងបន្ទប់ជួលតែម្នាក់ឯង ខណៈអ្នកនៅជិតខាង បាននាំគ្នាទៅធ្វើការ រោងចក្រវេនយប់ ហើយនាងបាន ទូរស័ព្ទហៅបងធម៌របស់ខ្លួន ឲ្យមកជួយមើលទុយោទឹក ដែលបែកធ្លាយ។ ដោយឃើញឱកាសល្អ ជនល្មើសជា បងធម៌ បានធ្វើសកម្មភាព សម្លាប់នារីរងគ្រោះ ប្លន់យកទ្រព្យសម្បត្តិតែម្តង ដ្បិតជនល្មើស បានដឹងថា នារីរងគ្រោះ ជាអ្នកមានលុយច្រើន។ ក្រោយពេលកើតហេតុភ្លាមៗ គ្មាននរណាម្នាក់ដឹងថា នារីរងគ្រោះបានបាត់ខ្លួន ទៅណានោះទេ។ តែដោយមានការ ជជីកសួរខ្លាំង ទៅលើភរិយាជនល្មើស ក៏ដូចជាជនល្មើស ឈ្មោះ សំអុល មុន្នី ធ្វើឲ្យជនល្មើសរអើលខ្លួន ភ័យខ្លាចគេដឹង បានព្យាយាមគេចខ្លួន លែងហា់នទាំងទៅធ្វើការទៀតផង។
រយៈពេល៥ថ្ងៃក្រោយ នៃការបាត់ខ្លួននារីរងគ្រោះ ជនល្មើសឈ្មោះ សំអុល មុន្នី បានទូរស័ព្ទសារភាព ប្រាប់ភរិយារបស់ខ្លួនថា ខ្លួនជាអ្នកធ្វើសកម្មភាព សម្លាប់នារីរងគ្រោះ ដែលជាប្អូនធម៌ ហើយយកទៅបោះចោល នៅតាមបណ្តោយ ផ្លូវជាតិលេខ៦១ ត្រង់ចំណុចភូមិថ្នល់បត់ ឃុំកោះចិន ស្រុកពញាឮ ខេត្តកណ្ដាល ក៏នាំគ្នាទៅមើល ប្រទះឃើញសពរុំក្នុងភួយ ដែលនាងប្រើប្រាស់រាល់ថ្ងៃ។ សមត្ថកិច្ចបាបធ្វើកោសល្យវិច័យលើសព្វនារីរងគ្រោះ កសាងឯកសារ និងកំពុងតែស្វែងរកចាប់ខ្លួនជនល្មើសយកមកផ្តន្ទាទោសទៅតាមច្បាប់៕
http://ift.tt/1vRmJRK
