រថយន្តម៉ាកកាមរី ជែងវ៉ា រថយន្តហ៊ីណូ ជ្រុលទៅបុកម៉ូតូរ៉ឺម៉កច្រាសទិសពេញទំហឹងម្ចាស់ម៉ូតូបាក់ជើងខ្ទេច និង៤នាក់ទៀតរបូស ម្ចាស់ឡានបើកទ្វារចុះដាក់មេផាយ
ខេត្តកណ្តាល ៖ គ្រោះថ្នាក់ចរាចរណ៍មួយបានកើតឡើងដោយសារ រថយន្តម៉ាកកាមរី១គ្រឿងបានបើកបន្ថែមល្បឿនវ៉ារថយន្តហ៊ីណូ បានជ្រុលទៅបុកជាមួយ ម៉ូតូសណ្តោងរ៉ឺម៉ក១គ្រឿងបញ្ច្រាសទិសគ្នាចំពេញទំហឹង បណ្តាលឲ្យបុរស ២នាក់ រងរបួសធ្ងន់ស្រាល រីឯរថយន្តកាមរីបានខ្ទាតវិលវង់ ទៅប៉ះរថយន្តហ៊ីណូ បុកអូសជាច្រើនម៉ែត្រធ្វើឲ្យមនុស្ស ៣នាក់ ជិះក្នុងរថយន្តកាមរី រងរបួសធ្ងន់ស្រាល កាលពីវេលាម៉ោង ៥និង៥០ នាទីព្រឹក ថ្ងៃទី១១ ខែមីនា ឆ្នាំ២០១៥ នៅលើកំណាត់ ផ្លូវជាតិលេខ៦១ ត្រង់ចំណុចចន្លោះ គីឡូម៉ែត្រលេខ១៤-១៥ ស្ថិតក្នុងភូមិព្រែកក្តាម១ ឃុំកោះចិន ស្រុកពញាឮ ។
នៅកន្លែងកើតហេតុសមត្ថកិច្ចជំនាញបានឲ្យដឹងថា នៅមុនពេលកើតហេតុ រថយន្តម៉ាក កាមរីគូថហើម ពណ៌ស បើកបរយ៉ាងលឿនតាមបណ្តោយផ្លូវជាតិលេខ៦១ ក្នុងទិសដៅ ពីស្ពានព្រែកក្តាម ឆ្ពោះទៅខេត្តកំពង់ចាម បានបើកជែង រថយន្តម៉ាកហ៊ីណូ ដែលបើកបរនៅខាងមុខជ្រុលចូលចំណែកផ្លូវម្ខាងទៀតបានជ្រុលទៅបុក ជាមួយម៉ូតូសណ្តោងរ៉ឺម៉ក ដែលបើកបរបញ្ច្រាសទិសគ្នា ពេញមួយទំហឹង បណ្តាលឲ្យរថយន្តកាមរីរេ ទៅប៉ះរថយន្តហ៊ីណូ បុកអូសជាច្រើនម៉ែត្រ និងបណ្តាលឲ្យមានមនុស្សទាំងជិះម៉ូតូសណ្តោងរ៉ឺម៉ក និងរថយន្តរងរបួសធ្ងន់ស្រាល ។
សមត្ថកិច្ចជំនាញបានឲ្យដឹងថា អ្នកបើកបរម៉ូតូសណ្តោងរ៉ឺម៉ក មានឈ្មោះ ម៉ៅ វឿន ភេទប្រុស អាយុ ៣៣ឆ្នាំ បានរបួសធ្ងន់បាក់ជើងឆ្វេង និងអ្នករួមដំណើរជាមួយ ម្នាក់ឈ្មោះ ពឿន ភឿន ភេទប្រុស អាយុ ៣៨ឆ្នាំ របួសស្រាល ទាំង២នាក់ មានទីលំនៅ ក្នុងភូមិគោហេរ ឃុំរការកោង១ ស្រុកមុខកំពូល ខេត្តកណ្តាល។ ចំណែកជនរងគ្រោះ រួមដំណើរនៅក្នុង រថយន្តកាមរី រួមមាន ទី១-ឈ្មោះ គុណ ស៊ីដាវីន ភេទស្រី អាយុ ១៦ឆ្នាំ របួសធ្ងន់ ទី២-ឈ្មោះ ហេង សៀប ភេទស្រី អាយុ ៧៤ឆ្នាំ រងរបួសស្រាល ទាំង ២នាក់ មានទីលំនៅ ក្នុងភូមិកោះថ្មី ឃុំកោះសូទិន ស្រុកកោះសូទិន ខេត្តកំពង់ចាម និងទី៣-ឈ្មោះ សេង ស៊ីម ភេទស្រី អាយុ ៤៤ឆ្នាំ របួសស្រាល មានទីលំនៅក្នុងភូមិប្អេរ ឃុំប្អេរ ក្រុងកំពង់ឆ្នាំង ខេត្តកំពង់ឆ្នាំង។
សមត្ថកិច្ចជំនាញបានឲ្យដឹងទៀតថា អ្នកបើករថយន្ត ម៉ាកហ៊ីណូ ពណ៌សលាយខៀវ ពាក់ស្លាកលេខ ភ្នំពេញ 3A-0997 និងអ្នកបើករថយន្ត កាមរីគូថហើម ស៊េរីឆ្នាំ១៩៩៣ ពណ៌ស ពាក់ស្លាកលេខ ភ្នំពេញ 2C8170 មិនទាន់ស្គាល់ អត្តសញ្ញាណនោះទេ ព្រោះក្រោយពេលកើតហេតុ ពួកគេបានចែកជើងគ្នារត់គេចខ្លួន បាត់ស្រមោល៕
http://ift.tt/1B6X0Rd
