មានរឿងចម្លែកថាប៉ូលិសសេដ្ឋកិច្ច ក្រោមការគ្រប់គ្រងលោកស្នងការ ញ៉ែម វ៉ាន់នី បង្ក្រាបឡានដឹកឈើប្រណីត មិនបានយកប្រគល់ឲ្យខ័ណ្ឌរដ្ឋបាលព្រៃឈើ តែបែរជាដឹកយកទៅបោះចោលតាមផ្លូវទៅវិញ
ខេត្តមណ្ឌលគិរី ៖ លេចឮព័ត៌មានគួឲ្យភ្ញាក់ផ្អើលថា ប៉ូលីសសេដ្ឋកិច្ច នៃស្នងការនគរបាលខេត្តមណ្ឌលគិរី ក្រោមបញ្ជាលោកស្នងការ ញ៉ែម វ៉ាន់នី កន្លងមកបានចាប់ឃាត់រថយន្ត ដឹកឈើល្មើសច្បាប់ ប្រភេទឡង់គ្រីស័រ ចំនួន៣គ្រឿងកាលពីវេលាម៉ោង ៨ ព្រឹក ថ្ងៃទី៨ ខែមីនា ឆ្នាំ២០១៥ ស្ថិតនៅភូមិ ពូទ្រូលើ ឃុំសែនមនោរម្យ ស្រុកអូររាំងនោះ វត្ថុតាងជាឈើល្មើសច្បាប់ ត្រូវដឹកយកទៅ បោះចោលតាមផ្លូវ ដោយមិនបានប្រគល់ ឲ្យទៅមន្ត្រីជំនាញរដ្ឋបាលព្រៃឈើខេត្តឡើយ ដើម្បីចាត់ការតាមនីតិវិធីនោះទេ ប៉ុន្តែក៏គ្មានអ្នកណាដឹងលំអិតអំពីមូលហេតុនេះដែរ។
សូមរំលឹកថាប្រតិបត្តិការនោះ ដឹកនាំដោយលោកវរសេនីយ៍ឯក មីន អាន ក្រោយ បទបញ្ជាពីលោក ញ៉ែម វ៉ាន់នី ស្នងការនគរបាល ខេត្តមណ្ឌលគិរី ឃាត់បានរថយន្តឡង់គ្រីស័រ ដឹកឈើល្មើសច្បាប់ ៣គ្រឿង នៅចំណុច ឃុំសែនមនោរម្យ ស្រុកអូររាំង ក៏ចុះទៅដល់គោលដៅ និងធ្វើការបង្ក្រាបបាន ដោយជោគជ័យ។ រថយន្តទាំង៣ នោះរួមមាន ១-ចង្កូតស្តាំពណ៌សរ ពាក់ស្លាកលេខ 2S ៩២៩៣ ផ្ទុកឈើចំនួន ៨ដុំ។ ២-រថយន្ត ចង្កូតស្តាំ ពណ៌សំបកឳឡឹក ពាក់ស្លាកលេខ ភ្នំពេញ ២C 9965 ផ្ទុកឈើចំនួន ១១ដុំ និង ៣-ពណ៌ទឹកប្រាក់ ពាក់ស្លាកលេខ ភព.២ស 9378 ផ្ទុកឈើ ១១ដុំ សរុបទាំងអស់ ៣០ ដុំផងដែរ។
រថយន្ត និងឈើទាំងនោះត្រូវបានរក្សាទុកនៅស្នងការដ្ឋាននគរបាល ខេត្តមណ្ឌលគិរី ជាណ្តោះអាសន្ន ដើម្បីចាត់ការតាមនីតិវិធី។ តែទីបំផុតឈើទាំងនោះ មិនបានប្រគល់ឲ្យ ជំនាញរដ្ឋបាលព្រៃឈើ ចាត់ការបន្ត តាមនីតិវិធីនោះទេ។ បើតាមបានបង្ហើបបានឲ្យដឹងថា ឈើទាំងនោះត្រូវគេដឹក យកទៅទម្លាក់ចោលនៅតាមផ្លូវ ដោយមិនទំនងទាល់តែសោះ។ គេឆ្ងល់រថយន្ត និងឈើជាវត្ថុបទល្មើសដែលត្រូវបញ្ជូនឲ្យខ័ណ្ឌរដ្ឋបាលព្រៃឈើដើម្បីកសាងសំណុំរឿងបញ្ជូនទៅតុលាការ ដែលអាចឈានចាប់ខ្លួនទាំងម្ចាស់រថយន្ត និងឈើប្រណីតនេះមកពិន័យ ឬផ្តន្ទាទោសតាមច្បាប់ តែទីបំផុតគ្មានន័យ។
គួររំលឹកថា គេនៅចាំបានថា កាលពីព្រឹកថ្ងៃទី១៣ ខែមិនា ឆ្នាំ២០១៥ នគរបាលប្រឆាំងបទល្មើស សេដ្ឋ កិច្ច ក្រសួងមហាផ្ទៃ ដឹកនាំដោយលោក ស៊ួស ប៊ុនលី បានដឹកនាំកម្លាំងចាប់ និងបង្ក្រាបបានរថយន្ត ដឹងឈើប្រណីតជាង៣០កំណាត់ នៅចំណុចភូមិឡៅការ សង្កាត់រមនា ក្រុងសែនមនោរម្យ ហើយបានប្រគល់ឲ្យខ័ណ្ឌរដ្ឋបាលព្រៃឈើខេត្ត មណ្ឌលគិរី តែក៏មានរឿងចម្លែកត្រូវទម្លាយថានាយខណ្ឌរដ្ឋបាលព្រៃឈើខេត្តមណ្ឌលគិរី លោក កែប កត បាននិយាយចំអកឲ្យសមត្ថកិច្ចដែលបានប្រឹងប្រែងបង្ក្រាបចាប់ឈើខុសច្បាប់ពីពួកឈ្មួញថា ឈើដែលចាប់បាន និងបញ្ជូនឲ្យ គឺសុទ្ធតែ កាប់លែងមុតស៊ីមិនដាច់ ទើបចាប់ប្រគល់ឲ្យជំនាញរបស់លោក។ ជាមួយគ្នានេះមានមតិមួយលើកតបវិញថា ទំនងជាចាប់ចំម៉ូយរបស់លោក កែប កត ទើបលោកមិនសូវពេញចិត្ត។
ទោះយ៉ាងណាករណីដឹកឈើដែលរឹបអូសបានយកទៅបោះចោលតាមផ្លូវ ដោយមិនបានប្រគល់ ឲ្យទៅមន្ត្រីជំនាញរដ្ឋបាលព្រៃឈើនោះកំពុងតែធ្វើឲ្យមានការភ្ញាក់ផ្អើល ជាមួយនឹកការយកចិត្តទុកដាក់ដាមដាន ថាតើនឹងមានការស៊ើបអង្កេតករណីនេះដែរឬទេ ហើយតើការប្រព្រឹត្តឡើងក្នុងមូលហេតុ និងគោលបំណងអ្វីទៅ?៕ ដោយ ឦសាន២
http://ift.tt/1MbV7yx
