ឈ្មួញដឹកឈើប្រណីត៣ឡានពេញៗ លោតឆ័ត្រ ត្រូវនគរបាលខេត្តមណ្ឌលគិរីចាប់
ខេត្តមណ្ឌលគិរី៖ រថយន្តដឹកឈើប្រណីតពេញៗល្មើសច្បាប់ចំនួន៣គ្រឿង ត្រូវបានសមត្ថកិច្ចនគរបាលការិយាល័យកណ្តាល ប្រឆាំងបទល្មើសស្នងការដ្ឋាននគរបាលខេត្តមណ្ឌលគិរីបង្ក្រាបកាលពីវេលាម៉ោង ៨ ព្រឹកថ្ងៃទី៨ មិនាស្ថិតនៅភូមិ ពូទ្រូលើ ឃុំសែនមនោរម្យ ស្រុកអូររាំង។
អនុប្រធានការិយាល័យកណ្តាលប្រឆាំងបទល្មើស លោក ជិន សុឃុន បានអោយដឹងថា ការបង្ក្រាបនេះធ្វើឡើងក្រោយ ទទួលបាន បទបញ្ជាពីលោក ញ៉ែម វាន់នី ស្នងការនគរបាលខេត្តមណ្ឌលគិរី ថា មានរថយន្តឡង់គ្រិស័រដឹកឈើល្មើសច្បាប់៣គ្រឿងនៅចំណុច ឃុំ សែនមនោរម្យ ស្រុកអូររាំង កម្លាំងរបស់លោកក៏បានទៅដល់ទិសដៅ និងធ្វើការបង្ក្រាបបានដោយជោគជ័យ។
លោក ជិន សុឃុន បានបញ្ជាក់ថា រថយន្តទាំង៣ នោះ ទី១ចង្កូតស្តាំពណ៌សពាក់ស្លាកលេខ 2S ៩២៩៣ ផ្ទុកឈើចំនួន៨ដុំ ចំណែក ចង្កូតស្តាំពណ៌សំបកឳឡឹក ពាក់ស្លាកលេខ ភ្នំពេញ២C 9965 ផ្ទុកឈើចំនួន ១១ ដុំ និង ពណ៌ទឹកប្រាក់ពាក់ស្លាកលេខ ភព.២ស 9378 ផ្ទុកឈើ ១១ ដុំ សរុបទាំងអស់ ៣០ ដុំផងដែរ។ ទោះយ៉ាងណានគរបាលមិនបានប្រាប់ពីអត្តសញ្ញាណម្ចាស់ឈើនោះជានរណានោះទេ។
លោកស្នងការនគរបាលខេត្តមណ្ឌលគិរី បានអោយដឹងថា បច្ចុប្បន្ន វត្ថុតាងត្រូវបានកម្លាំងការិយាល័យជំនាញបញ្ជូនយកមករក្សាទុកនៅស្នងការដ្ឋាននគរបាលខេត្តជាណ្តោះអាសន្ន ដើម្បីចាត់ ការតាមនិតិវិធី។ ជាមួយគ្នានេះប្រភពដែលឃ្លាំមើលនៃសកម្មភាពជួញដូរឈើខុសច្បាប់ទៅវៀតណាមមានសកម្មភាពកម្រើកឡើងនារដូវប្រាំងនេះ៕ ដោយ ឦសាន២
http://ift.tt/18v81F2
