បុរសម្នាក់ស្លៀកពាក់ឯកសណ្ឋានជាទាហានស័ក្តិ៥ ក្លែងក្លាយត្រូវចាប់ខ្លួនបញ្ជូនទៅតុលាការ
ខេត្តរតនគិរី៖ បុរសម្នាក់ក្នុងចំណោមបុរស៤នាក់ ដែលបានបន្លំស្លៀកពាក់ឯកសណ្ឋានយោធាថ្នាក់វរសេនីយ៍ឯក ត្រូវបានកងរាជអាវុធហត្ថខេត្តរតនគិរីចាប់ខ្លួន រួចបញ្ជូនទៅសាលាដំបូងខេត្តនៅរស្ងៀលថ្ងៃទី២៧ ខែមេសា ឆ្នាំ២០១៥នេះ បន្ទាប់ពីសមត្ថកិច្ចរកឃើញថា បុរសរូបនេះបានពាក់ឯកសណ្ឋានយោធាដោយខុសច្បាប់។ ការចាប់បុរសទាំង៤នោះនៅចំណុច ភូមិតេន ឃុំយ៉ាទុង ស្រុកអូរយ៉ាដាវ ខេត្តរតនគិរី។
បុរសម្នាក់ដែលដែលសមត្ថកិច្ចចាប់ខ្លួនមានឈ្មោះ ឈិន តារ៉ា ភេទប្រុស អាយុ៥២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិរកា១ ឃុំរកាច្រឡឹង ស្រុកខ្សាច់កណ្តាល ខេត្តកណ្តាល។
លោកវរសេនីយ៍ឯក ថាវ យ៉េន មេបញ្ជាការរងកងរាជអាវុធហត្ថខេត្តរតនគិរី បានអោយដឹងថា នៅក្នុងវិធានការបង្ក្រាបនោះធ្វើឡើងក្រោមការ ដឹកនាំពីព្រះរាជអាជ្ញារងអមសាលាដំបូងខេត្ត លោកជា សុភ័ក្ត្រ កាលពីយប់ថ្ងៃទី២៥ ខែមេសា ឆ្នាំ២០១៥ កម្លាំងសមត្ថកិច្ចបានឃាត់ខ្លួនបុរសម្នាក់ខាងលើ គ្រាដែលរូបគេបានជិះរថយន្តមួយគ្រឿងជាមួយ និងបក្ខពួក៣នាក់ផ្សេងទៀត ទៅអង្គុយជជែកគ្នាលេងជាមួយនិងកម្លាំងយោធានៅក្នុងស្រុកអូរយ៉ាដាវខេត្តរតនគិរី ហើយក្នុងការជជែកគ្នានោះដឹងថាបុរសខាងលើស្លៀកពាក់ជាឯកសណ្ឋានយោធាដោយខុសច្បាប់។
លោកបានបន្តថា ដោយសារបានការរាយការណ៍ពីទីបញ្ជាការស្រាល និងគណៈបញ្ជាការឯកភាព ខេត្តមកក៏ត្រូវបានចាប់បញ្ជូនមកកាន់ទីបញ្ជាការដ្ឋានកងរាជអាវុធហត្ថតែម្តង។ លោកឈិន តារ៉ា ត្រូវបានបញ្ជូនមកសាលាដំបូងខេត្តរតនគិរី នៅវេលាម៉ោង២ និង៣០នាទីរសៀល ថ្ងៃទី២៧ ខែមេសា ឆ្នាំ២០១៥នេះហើយបុរសដែលជាបក្ខពួកចំនួន៣នាក់ផ្សេងទៀតត្រូវបានដោះលែង ដោយសំអាងថាមានលិខិតស្នាមត្រឹមត្រូវ៕ ដោយ លី វណ្ណៈ
http://ift.tt/1OyguLu
