ឧកញ៉ា ឆាយ ជ្រាយ ជះលុយទិញទឹកចិត្ត ចៅហ្វាយខេត្តក្រចេះខេត្តត្បូងឃ្មុំមន្ត្រីជំនាញ និងភ្នាក់ងារទូរទស្សន៍កាសែតមួយចំនួន ដើម្បីបិទបាំងការធ្វើជំនួញឈើល្មើសច្បាប់ដឹកចេញពីព្រៃឡង់ទៅលក់នៅវៀតណាម
ខេត្ដត្បូងឃ្មុំ ៖ បច្ចុប្បន្ន ឧកញ៉ា ឆាយ ជ្រាយ មេឈ្មួញឈើដុះស្លែដ៏ល្បីប្រចាំខេត្តត្បូងឃ្មុំបានប្រើងារជា«ឧកញ៉ា» ដែលប្រទានដោយព្រះមហាក្ស័ត្រខ្មែរ ប្រឡូកក្នុងបណ្តញជំនួញឈើខុសច្បាប់ ដោយបានកេណ្ឌពលរដ្ឋឲ្យប្រាក់ឈ្នួលបន្តិចបន្ទួចចូលព្រៃកាប់ប្រមូលយកឈើប្រណីតដ៏មានតម្លៃនៅតំបន់ព្រៃឡង់ខេត្តកំពង់ធំ-ក្រចេះ ហើយបានប្រើប្រាស់រថយន្តសម្រុកដឹកជញ្ជូនឈើយ៉ាងមមាញឹកឆ្លងកំពង់ចម្លងព្រែកព្រលូង នៅចំណុចភូមិព្រែកព្រលូង ឃុំព្រែកប្រសព្វ ស្រុកព្រែកប្រសព្វ និងកំពង់ដឆ្លូង ស្រុកឆ្លូង ខេត្តក្រចេះ ដើម្បីនាំចេញទៅកាន់ទីផ្សារងងឹតវៀតណាមតាមច្រកចាន់មូល ស្រុកមេមត់ និងច្រកទន្លេចាម ខេត្ដត្បូងឃ្មុំ។
មានការកត់សម្គាល់ឃើញថា ចាប់តាំងពីចុងឆ្នាំ២០១៤រហូតមកដល់ខែមេសា ឆ្នាំ២០១៥ នេះ គេមិនបានឃើញ លោក ស ចំរ៉ុង អភិបាលខេត្តក្រចេះ លោក ប្រាជ្ញ ចន្ទ អភិបាលខេត្តត្បូងឃ្មុំ ចេញបទបញ្ជាឲ្យមន្ត្រីគ្រប់ជំនាញថ្នាក់ក្រោម បង្ក្រាបសកម្មភាពបំផ្លាញព្រៃឈើ និងដឹកជញ្ជូនផលអនុផលព្រៃឈើល្មើសច្បាប់ របស់ ឧកញ៉ា ឆាយ ជ្រាយ ម្តងណាទេ ដែលធ្វើឲ្យមានការរិះគន់ពីភាពទន់ខ្សោយ របស់អាជ្ញាធរខេត្តទាំងពីរ ក្នុងការអនុវត្តច្បាប់ប្រឆាំងនឹងសកម្មភាពល្មើសនេះ ហើយសូម្បីតែគោលនយោបាយភូមិឃុំមានសុវត្ថភាពក៏មិនមានឥទ្ធិពលអ្វីធ្វើឲ្យឧកញ៉ា ឆាយ ជ្រាយ ខ្លាចរអែង ឬព្រឺប៉ុនសរសៃសក់ឡើយ។
ប្រភពបានរាយការណ៍ឲ្យដឹងថា លោកឧកញ៉ា ឆាយ ជ្រាយ បានរួមដៃគ្នាជាមួយឈ្មោះ ប៉េង គី មានតួនាទីជាអធិការរងស្រុក តំបែរ ដែលត្រូវជាបងថ្លៃនឹងគ្នា សហការណ៍គ្នាកាប់ និងប្រមូលទិញឈើពីព្រៃឡង់ ខេត្ដកំពង់ធំ ហើយការដឹកជញ្ជូនដោយរត់ការបង់លុយដាក់ខែ និងខ្លះបង់ជាក្បាលឡានជូនមន្ត្រីជំនាញពាក់ព័ន្ធគ្រប់ជាន់ថ្នាក់ សូម្បីតែលោក ស ចំរ៉ុង អភិបាលខេត្តក្រចេះ លោក ប្រាជ្ញ ចន្ទ អភិបាលខេត្តត្បូងឃ្មុំ ក៏មានការសង្ស័យថា ទទួលបានកញ្ចប់ប្រចាំខែដែរ ដើម្បីចញ្ចៀសការរំខានដល់ឡានដឹកឈើ ចាប់តាំងពីតំបន់ព្រៃឡង់រហូតដល់ មាត់ច្រកចេញទៅវៀតណាម ។
ប្រភពបន្តថា បច្ចុប្បន្ននេះឈើប្រមូលទិញពីតំបន់ព្រៃឡង់គឺដឹកឆ្លង កាត់ស្រុកព្រែកប្រសព្វ និងឆ្លងបន្ដតាម កំពង់ដស្រុកឆ្លូង ឆ្ពោះទៅកាន់កំពង់ដកំពង់ប្រមារ(ស្ថិតក្នុងស្រុកមេមត់ ខេត្ដត្បូងឃ្មុំ) និងបន្ដឆ្លងកាត់ផ្លូវចិនចំណុចគីឡូ ម៉ែត្រលេខ៤១ ក្នុងឃុំកំពាន់ ឃុំរំចេក ឬឆ្លងកាត់គីឡូម៉ែត្រលេខ៥១ ក្នុងឃុំ មេម៉ង់សំដៅមកផ្លូវជាតិលេខ៧ ដើម្បីចូលមកតាមផ្លូវឃុំតាមួង ហើយឆ្លងទៅ វៀតណាមតាមច្រកចាន់មូលដោយសុវត្ថិភាព ។ ក្នុងមួយថ្ងៃឧកញ៉ា ឆាយ ជ្រាយ បានដឹកឈើដោយប្រើប្រាស់ប្រភេទរថយន្ដយីឌុបធ្វើជាមធ្យោបាយមាន២ទៅ៣ គ្រឿង និងរថយន្តឃ្លុបដឹកទំនិញធុនកណ្តាលបន្លំធ្វើដូចដឹកទំនិញ ។ សកម្មភាពការដឹកឈើល្មើសច្បាប់នោះ ឧកញ៉ា ឆាយ ជ្រាយ បានផ្ទុកលើសទម្ងន់ បំផ្លាញផ្លូវជាតិដ៏ធ្ងន់ធ្ងរ។
ឧកញ៉ា ឆាយ ជ្រាយ បានរួមដៃគ្នាជាមួយឈ្មោះ ប៉េង គី ជះលុយទិញទឹកចិត្តចៅហ្វាយខេត្ត, ជំនាញរដ្ឋបាលព្រៃឈើខេត្ដក្រចេះ និងជំនាញរដ្ឋបាលព្រៃឈើខេត្ដត្បូងឃ្មុំ និងសមត្ថកិច្ចជាប់ពាក់ព័ន្ធ ជាពិសេសភ្នាក់ងារទូរទស្សន៍ និងកាសែតមួយចំនួននៅប្រចាំខេត្តក្រចេះ និងខេត្តត្បូងឃ្មុំ ដើម្បីចញ្ចៀសការចាប់ និងផ្សព្វផ្សាយមុខរបរល្មើសច្បាប់នេះ។ ជាក់ស្តែងតាមរយៈការឃុបឃិត និងបិទបាំងជាងកន្លះឆ្នាំនេះបានធ្វើឲ្យ ឧកញ៉ា ឆាយ ជ្រាយ មានឱកាសប្រព្រឹត្តសកម្មភាពដឹកឈើធ្វើឡើងពេញទំហឹង ក្នុងលួចកាប់ឈើ និងដឹកយកទៅលក់នៅវៀតណាមប្រមូលលុយធ្វើមានធ្វើបានយ៉ាងសុខស្រួល ក្រោមអំពើបន្លំលួចទ្រព្យសម្បត្តិធនធានធម្មជាតិខែ្មរ។
នៅពីក្រោយការបំផ្លិចបំផ្លាញព្រៃឈើដើម្បីផលប្រយោជន៍ផ្ទាល់ខ្លួនតាមអំពើចិត្តនេះ ឧកញ៉ា ឆាយ ជ្រាយ តែងតែលើកគុណសម្បត្តិថាគាត់ប្រមូលលុយជួយបក្សប្រជាជនកម្ពុជាក្នុងការ ចុះពង្រឹងមូលដ្ឋាន តែគេមិនដឹងថាហេតុផលនេះជារឿងពិត ឬក៏ជាល្បិចបន្លាចមន្ត្រីតូចតាចដែលចង់កោសរូសលុយពីគាត់ពាក់ព័ន្ធនឹងសកម្មភាពល្មើសនេះឬយ៉ាងណានោះទេ។ ពលរដ្ឋទាមទារឲ្យលោកឧបនាយករដ្ឋមន្ត្រី ស ខេង ជម្រុញលោក អភិបាលខេត្តក្រចេះ និងខេត្តត្បូងឃ្មុំ ងនុវត្តច្បាប់ប្រឆាំងបទល្មើសការកាប់បំផ្លាញព្រៃឈើធ្វើអាជីវកម្ម និងការដឹកជញ្ជូនគ្មានច្បាប់ទម្លាប់យកទៅលក់នៅប្រទេសវៀតណាម ហើយគួរចាប់ផ្តើមទប់ស្កាត់ឧកញ៉ា ឆាយ ជ្រាយ ដែលកំពុងប្រព្រឹត្តជាក់ស្តែងបំផ្លិចបំផ្លាញទ្រព្យសម្បត្តិជាតិ៕ ដោយ ផ្កាច័ន្ទ
http://ift.tt/1CXKoA9
