ភ្ញៀវទេសចរណ៍ មកទស្សនាកម្សាន្តនៅក្នុងខេត្តរតនគិរី កើនឡើងនៅអំឡុងចូលឆ្នាំខ្មែរ ឆ្នាំ២០១៥
ខេត្តរតនគិរី៖ មានការកត់សម្គាល់ឃើញថាក្នុងអំឡុងថ្ងៃទី១៤-១៥-១៦ ខែមេសា ឆ្នាំ២០១៥ ដែលជាថ្ងៃចូលឆ្នាំខ្មែរ ភ្ញៀវទេសចរណ៍ ជាតិ ទាំងអន្តរជាតិ មកទស្សនាកម្សាន្តនៅក្នុងខេត្តរតនគិរី មានកំណើនកើនឡើងខ្ពស់គួរអោយមានមោទនៈភាពយ៉ាងក្រែលែងដែលបានធ្វើឲ្យខេត្តនៅភូមិភាគឦសានមួយនេះមានសភាពអ៊ូអរជាពិសេសនៅតាមរមណីដ្ឋាននានាពោរពេញដោយភាពសប្បាយរីករាយ។
តាមរបាយការណ៍របស់លោកង៉ែត ពិទូ ប្រធានមន្ទីរទេសចរណ៍ខេត្តរតនគីរីបានអោយដឹងថា ក្នុងពិធីបុណ្យចូលឆ្នាំថ្មីប្រពៃណីជាតិរយៈពេល៣ថ្ងៃក្នុងឆ្នាំ២០១៥នេះ ចំនួនទេសចរណ៍ជាតិនិងអន្តរជាតិចូលមកទស្សនាកម្សាន្តសប្បាយមានការកើនឡើងច្រើនជាងបុណ្យចូលឆ្នាំ២០១៤កន្លងមកនេះ ហើយភ្ញៀវទេសចរណ៍ជាតិភាគច្រើនធ្វើដំណើរមកពីបណ្តាលខេត្តផ្សេងៗនិងពីរាជធានីភ្នំពេញ។
ស្ថានភាពនេះគឺដោយសារយើងមានសុខសន្តិភាព សុវត្ថិភាពគ្រប់ទីកន្លែង និងហេដ្ឋារចនាសម្ព័ន្ធផ្លូវគមនាគមន៍ ដែលភ្ជាប់ពីខេត្តមួយទៅខេត្តមួយកាន់តែល្អប្រសើរឡើង ទាក់ទាញភ្ញៀវអោយចូលខ្លួន មកកម្សាន្តសប្បាយ។ លោកបន្តទៀតថា មណ្ឌលកំសាន្តក្នុងខេត្តមួយនេះមានចំនួន៧កន្លែងរួមមាន៖ ១. រមណីដ្ឋានបឹងយក្ខឡោម, ២. រមណីរដ្ឋានទឹកធ្លាក់កាចាញ, ៣. រមណីដ្ឋានទឹកធ្លាក់កាទៀង,៤. រមណីដ្ឋាន ទឹកធ្លាក់ចាអ៊ុង ៥. រមណីដ្ឋានទឹកធ្លាក់អូរស៊ីនលែរ៍ ៦. រមណីដ្ឋានទឹកជួរតាតតៃ ៧. រមណីដ្ឋានបឹងលំកុដ។
លោក ង៉ែត ពិទូ បានបង្ហាញស្ថិតិចំនួនភ្ញៀវទេសចរណ៍ជាតិ អន្តរតជាតិ ដែលចូលមកទស្សនាកម្សាន្តខេត្តនេះ ក្នុងពិធីបុណ្យចូលឆ្នាំរយៈពេល៣ថ្ងៃ ដែលគិតពីថ្ងៃទី១៤ ដល់១៦មេសា ឆ្នាំ២០១៥ មានចំនួន៦៥.៧២០នាក់ គឺកើនឡើងសរុប(៦.៩៩%) ដោយភ្ញៀវជាតិមានចំនួន៦.៩៦ ភ្ញៀវអន្តរជាតិ១០.៥២%។ បើប្រៀបធៀបឆ្នាំ២០១៤ និងឆ្នាំ២០១៥ ភ្ញៀវជាតិមានចំនួន៦០.៩៨នាក់ និងភ្ញៀវជាតិអន្តរជាតិមានចំនួន៤៣៧នាក់ សរុបចំនួន៦១.៤២៦នាក់។ នៅឆ្នាំ២០១៥នេះ ភ្ញៀវជាតិមានចំនួន៦៥.២៣៧នាក់ ភ្ញៀវអន្តរជាតិមានចំនួន៤៨៣នាក់ សរុបចំនួន៦៥.៧២០នាក់។
លោកប្រធានមន្ទីរទេសចរណ៍បានបញ្ជាក់បន្ថែមទៀតថា មន្ទីរទេសចរណ៍ខេត្តរតនគិរីនិងខិតខំជំរុញការៀបចំនៅតាមរមណីដ្ឋានអោយមានសន្តិសុខ សុវត្ថិភាព សណ្តាប់ធ្នាប់ អនាម័យ និងសិក្សាស្រាវជ្រាវសក្តដានុពលទេសចរណ៍ បន្ថែមទៀត ធ្វើយ៉ាងណាទាក់ទាញភ្ញៀវទេសចរណ៍អោយមកទស្សនាកម្សាន្តកាន់តែច្រើនថែមទៀត។
គួររំលឹកផងដែរថា ក្នុងចំណោមរមណីដ្ឋានទាំង៧កន្លែងខាងលើ ទាំងភ្ញៀវទេសចរណ៍ជាតិ និងអន្តរជាតិតែងចាប់អារម្មណ៍ទៅលើរមណីដ្ឋានអូរស៊ីនលែរ៍ (ហៅថាទឹកធ្លាក់៧ជាន់) ជាងគេដោយរមណីដ្ឋានមួយនេះផ្លូវភ្ជាប់ពីរមណីដ្ឋានបឹកយក្ខឡោមដែលមានចំងាយផ្លូវ១៩គីឡូម៉ែត្រប៉ុណ្ណោះ។ ខណៈដែលភ្ញៀវទេសចរណ៍ជាតិ និងអន្តរជាតិធ្វើដំណើរចូលទៅទស្សនាកម្សាន្ត ធ្វើអោយពួកគាត់មានការត្អូញនិងរិះគន់ទៅលើផ្លូវមួយខ្សែនេះ ដែលពោរពេញទៅដោយជង្ហុកជ្រៅៗ ដីហ៊ុយទ្រលោម អាចបង្កគ្រោះថ្នាក់ចរាចរណ៍ ដែលទាមទារឲ្យមានការជួសជុល៕ ដោយ លី វណ្ណៈ
http://ift.tt/1JZqVBQ
