ស្គាល់គ្នាតាមទូរស័ព្ទ៥ខែ ណាត់ជួបក្រោយផ្ទះ ចាប់រំលោភបានសម្រេច
ខេត្តកណ្តាល៖ យុវជនម្នាក់ជាប់ចោទថាចាប់រំលោភសេពសន្ធវៈកុមារីជាអនីតិជនម្នាក់ ទើបតែមានអាយុ១៤ឆ្នាំ បានសម្រេចនៅចំណុចគុម្ពព្រៃដីឡូត៍ចំការស្វាយមួយកន្លែង ហើយជនសង្ស័យត្រូវបានសមត្ថកិច្ចឃាត់ខ្លួន តាមពាក្យបណ្តឹងរបស់នារីរងគ្រោះ កាលពីវេលាម៉ោង៧យប់ ថ្ងៃទី២១ ខែឧសភា ឆ្នាំ២០១៥នេះ នៅភូមិទេពមន្ត្រី ឃុំព្រះប្រសប់ ស្រុកខ្សាច់កណ្តាល ខេត្តកណ្តាល។
លោកវរសេនីយ៍ទោ ម៉ែន សុខឿន អធិការស្រុកបានឲ្យដឹងថា ជនសង្ស័យមានឈ្មោះ ហេង រ៉ូត ភេទប្រុស អាយុ២៣ឆ្នាំ ជាកម្មករឡឥដ្ឋ ចំណែកនារីរងគ្រោះមានឈ្មោះ ភ.ណ.ស.ផ.ន.ណ អាយុ១៤ឆ្នាំ រស់នៅភូមិឃុំកើតហេតុជាមួយគ្នា។ ជនសង្ស័យ និងនារីរងគ្រោះបានស្គាល់គ្នាតាមទូរស័ព្ទរយៈពេល៥ខែ មកហើយពួកគេតែងតែសាសងគ្នាតាមទូរស័ព្ទ។
ចំពោះចម្លើយសារភាពជនសង្ស័យបាននិយាយថា៖ កាលពីថ្ងៃទី១៩ ខែឧសភា ឆ្នាំ២០១៥ វេលាម៉ោង១៦ និង៣០នាទីខ្លួនបានទៅ បបួលក្មេងស្រីជាសង្សារជួបគ្នានៅខាង ក្រោយផ្ទះម្ដាយរបស់នាង ។ ពេលទៅដល់ ក្រោយផ្ទះជួបគ្នានិយាយបានមួយសន្ទុះ ខ្លួនបានបបួលនាងទៅលេងផ្ទះជីតានៅ ភូមិព្រែកតាទន់ ឃុំព្រះប្រសប់ ស្រុកខ្សាច់ កណ្ដាល ។ ពេលនោះនាងក៏បានយល់ព្រមទៅជាមួយខណៈដើរដល់ចំណុចចំការស្វាយដីឡូត៍ខ្លួនក៏បានបបួលក្មេងស្រីជាសង្សាររួមរ័កជាមួយគ្នារហូតបានសម្រេចមួយលើក ដោយពុំមានការបង្ខិតបង្ខំអ្វីឡើយ ។ បន្ទាប់មកក៏បានទៅផ្ទះរបស់ឪពុកម្ដាយរបស់ខ្លួនវិញ តែដោយសារឪពុកម្ដាយ របស់ខ្លួនមានការភ័យខ្លាចក៏បានរាយ ការណ៍ប្រាប់ប្រធានភូមិ និងបានយក ដំណឹងទៅប្រាប់ឪពុកម្ដាយរបស់ក្មេងស្រីជាសង្សារឲ្យមកយកនាងត្រឡប់ទៅកាន់លំនៅឋានវិញ ។
បើទោះបីជាការនិយាយបែបនេះរបស់ ជនសង្ស័យក៏ដោយឪពុកក្មេងស្រីរងគ្រោះបានបញ្ជាក់ថា អ្វីដែលជនសង្ស័យនិយាយ នេះគ្រាន់តែជាការដោះសារប៉ុណ្ណោះ។ ឪពុកក្មេងស្រីរងគ្រោះ បានសំណូមពរដល់សមត្ថកិច្ចពន្លឿនសំណុំរឿងនេះឲ្យបានលឿននិងចាត់ ការទៅតាមផ្លូវច្បាប់ ។ បច្ចុប្បន្នជនសង្ស័យកំពុងឃុំខ្លួនបណ្តោះអាសន្ននៅអធិការដ្ឋានស្រុកខ្សាច់កណ្តាល ដើម្បីរៀបចំសំណុំរឿងបញ្ជូនទៅតុលាការ៕
http://ift.tt/1GwOIdb
