ថៅកែឈើវៀតណាមចូលមកប្រមូលទិញឈើល្មើសច្បាប់យ៉ាងពពាក់ពពូននៅខេត្តរតនគិរី តែពុំមានការរំខានណាមួយពី ជំនាញរដ្ឋបាលព្រៃឈើដឹកនាំដោយលោកនាយខណ្ឌ វង្ស សុក្រសេរី ឡើយ
ខេត្តរតនគិរី៖ ជំនួញឈើប្រណីតនៅខេត្តរតនគិរី បច្ចុប្បន្ននេះឈានដ់ល ក្រុមឈ្មួញវៀតណាមធំៗចូលពេញទំហឹងមកក្នុងទឹកដីកម្ពុជា ក្នុងការដើរប្រមូលទិញឈើប្រណីតដោយផ្ទាល់ដល់កន្លែងប្រភពឈើតែម្តង ដោយមានឈ្មួញខ្មែរ និងមន្ត្រីមានអំណាចពាក់ព័ន្ធជួយសម្របសម្រួលដោយទទួលបានលាភសក្ការៈពីបទល្មើសនេះរៀងៗខ្លួន ទើបក្រុមឈ្មួញវៀតណាមមានឱកាសមកឈរជើងជម្រុញឲ្យមានការកាប់លួចបំផ្លាញព្រៃឈើយ៉ាងគឃ្លើន។ ជាក់ស្តែងបច្ចុប្បន្ននេះក្រុមឈ្មួញឈើ វៀតណាមកំពុងពពាក់ពពូនគ្នាប្រមូលទិញឈើប្រណីតចំនួន២ស្រុក គឺស្រុកវ៉ើនសៃ និងស្រុកតាវែង គ្មានការរំខានពីមន្ត្រីរដ្ឋបាលព្រៃឈើឡើយ ទំនងកំពុងតែស្វាគមន៍គ្នាយ៉ាងកក់ក្តៅសើមមាត់ទៀតផងក៏មិនដឹង?។
បើតាមប្រភពពត៌មានពីប្រជាពលរដ្ឋទាំង២ស្រុកខាងលើបាននិយាយដូចគ្នាថា៖ ឈើប្រណីតទាំងអស់នេះមានដូចជាធ្នង់ នាងនួន គ្រញូងជាដើម។ ពួកគាត់បានបន្តទៀតថា ឈើប្រណិតចំនួន២ប្រភេទកាប់ចេញពីតំបន់ឧស្យាជាតិវរៈជ័យ ដោយឡែកឈើប្រណិតប្រភេទក្រញូងយកមកពីខេត្តស្ទឹងត្រែងតាមស្រុកសៀមប៉ាង តាមផ្លូវកាត់ចូលទឹកដីខេត្តរតនគិរីក្នុងស្រុកវ៉ើនសៃ ហើយមានមេឈ្មួញវៀតណាមធំៗឈរចាំទិញឈើប្រណិតនៅទីនោះ។ ពេលប្រមូលទិញបានហើយក្រុមឈ្មួញវៀតណាមបានជួលរថយន្តទាំងមនុស្សរបស់ឈ្មោះម៉េង (ហៅម៉េងស្រមូម) ដែលមានទីលំនៅភូមិអូរកន្ទិល សង្កាត់បឹងកន្សែង ក្រុងបានលុង ខេត្តរតនគិរី។
ប្រភពដដែលបានបន្តទៀតថា ពួកក្រុមឈ្មួញជនជាតិវៀតណាមជាច្រើនក្រុមបានទិញឈើប្រណីតបានហើយ ពួកគេប្រគល់ឲ្យឈ្មោះម៉េង (ហៅម៉េងស្រមូម) ជាអ្នករត់ការបង់លុយឲ្យគ្រប់សមត្ថកិច្ចពាក់ព័ន្ធចេញពីស្រុកវ៉ើនសៃ និងស្រុកតាវែង ដើម្បីដឹកទៅវៀតណាម។ ជាមួយគ្នានោះដែរឈ្មោះ ម៉េង(ហៅម៉េងស្រមូម) មានរថយន្ត៣គ្រឿង ១.ម៉ាកតូយូតា ២.សាំយ៉ុង២គ្រឿង សម្រាប់ ដឹកជញ្ជូនឈើប្រណីតឲ្យឈ្មួញវៀតណាម រៀងរាល់យប់ រាល់ថ្ងៃធ្វើឡើងដោយរលូន។
ទាក់ទិននឹងករណីជំនួញឈើប្រណីតយ៉ាងរបស់ជនជាតិវៀតណាមដែលចុះមកធ្វើសកម្មភាពប្រមូលទិញឈើដោយផ្ទាល់នៅលើទឹកដីកម្ពុជា ដោយគ្មានការបង្ក្រាបពីសមត្ថកិច្ចជំនាញបែបនេះ អ្នកសារពត៌មានយើងបានសុំការបំភ្លឺពី លោកប៊ូ សំវាំង នាយផ្នែករដ្ឋបាលព្រៃឈើ កាន់ចំនួន៣ស្រុកគឺ ស្រុកតាវែង ស្រុកវ៉ើនសៃ និងស្រុកអូរជុំនោះបានឆ្លើយឲ្យដឹងថា៖ «រថយន្តដឹកឈើខាងលើនោះគាត់មិនបានដឹងនោះទេ ចាំខ្ញុំសួរកូនចៅសិន» ប៉ុន្តែរហូតមកដល់ថ្ងៃទី១៦ ខែឧសភានេះគ្មានចម្លើយបញ្ជាក់ពីបញ្ហានេះនៅឡើយទេ ទំនងលោកប៊ូ សំវាំង ព្យាយាមបិទបាំងឆ្នាំងបាយដែលទទួលផលពីបទល្មើស។
ប្រជាពលរដ្ឋសាមញ្ញ និងមន្ត្រីរាជការតូចតាចនៅក្នុងខេត្តរតនគិរីបានធ្វើការរិះគន់ ទៅលើសមត្ថកិច្ចដែលពាក់ព័ន្ធ និងស្ថាប័នរដ្ឋបាលព្រៃឈើខេត្ត ក្រោមការគ្រប់គ្រង របស់ លោក វង្ស សុក្រសេរី នៅតែមានភាពធូរលង់ ក្រៅពីឈ្មួញខ្មែរ រហូតមានឈ្មួញវៀតណាម ចេញចូលដឹកជញ្ជូនឈើ បានតាមចិត្ត តាមរថយន្តក្រុង និងរថយន្តតូចៗធ្វើសកម្មភាពដូចភ្លៀងរលឹម ដែលធ្វើព្រៃឲ្យឈើជាតិរលាយហិនហោចពីមួយថ្ងៃទៅមួយថ្ងៃយ៉ាងធ្ងន់ធ្ងរ ហើយមន្ត្រីរដ្ឋបាលព្រៃឈើមិនដែលថាដឹងម្តងណាឡើយ ៕ ដោយ យក្សតូច
http://ift.tt/1LbAKND
