ទំនាស់រឿងធ្វើរបងបិទផ្លូវមិនឲ្យឆ្លងកាត់ដីស្រែឈានដល់កាប់គ្នា
ខេត្តមណ្ឌលគីរី៖ បុរសវ័យ៣៤ឆ្នាំម្នាក់ បានរងរបួសត្រង់ដើមដៃដេអស់ជាច្រើនថ្នេរ គ្រាដែលកំពុងដើរទៅស្រែក៏ត្រូវមនុស្សម្នាក់លបចេញមក ពីក្រោយកាប់មួយកាំបិតផ្គាក់ បណ្ដាលឲ្យរងរបួស នឹងត្រូវបញ្ជូនមកសង្គ្រោះភ្លាមៗនៅមន្ទីរពេទ្យខេត្ត ។ ហេតុការណ៍នេះបានកើត ឡើងកាលពីព្រឹកថ្ងៃទី០៣ ខែឧសភា ២០១៥ ស្ថិតក្នុងភូមិតាងោល ឃុំមេម៉ង់ ស្រុកកែវសីមា ខេត្តមណ្ឌលគិរី ។
បុរសរងគ្រោះបានឲ្យដឹងថា មុនពេលកើតហេតុក្នុងថ្ងៃទី០២ ខែឧសភា ២០១៥នេះ គឺគាត់បានបិទផ្លូវចូលស្រែរបស់គាត់ បំណងកុំ ឲ្យមានគេជិះម៉ូតូឆ្លងកាត់ធ្វើឲ្យបែកដីស្រែ ក្រោយមកជនបង្កដែលគេស្គាល់ថា ជាប្អូនថ្លៃរបស់មេប៉ុស្តិ៍នគរបាលរដ្ឋបាលឃុំមេម៉ង់ បាន ជិះម៉ូតូដើម្បីឆ្លងកាត់ដីស្រែនោះដូចសព្វមួយដង ប៉ុន្តែគាត់បានធ្វើរបងបិទទៅហើយ រំពេចនោះជនបង្កបានបោះសម្ដីថា (មានដីស្រែ ប៉ុណ្ណឹងហេតុអ្វីអឿម្លេះ សមតែកាប់ក្បាលហុតឈាមទេ ) ហើយពាក្យសម្ដីនេះបានឮដល់គាត់។ ក្នុងយប់ថ្ងៃដដែលគាត់បានយកដំបង និងកាំបិតផ្គាក់ទៅសួរនាំបង្កជម្លោះនៅផ្ទះជនបង្ក ប៉ុន្តែមិនមានអំពើហិង្សាកើតឡើងឡើយ ។
លុះព្រឹកឡើងឈានចូលដល់ថ្ងៃកើតហេតុ គាត់បានដើរទៅស្រែរបស់ខ្លួនដូចពេលធម្មតា ខណៈដែលជនបង្កបានទៅពួនចាំនៅទីនោះ គ្រានោះជនបង្កបានលបចេញមក ពីក្រោយកាប់មកលើគាត់មួយកាំបិតផ្គាក់ត្រូវចំដើមដៃ បណ្ដាលឲ្យដួលផ្កាប់មុខ ហើយជនបង្កបានរត់គេចខ្លួនបាត់។
លោក កប ធន នាយប៉ុស្តិ៍នគរបាលរដ្ឋបាលឃុំមេម៉ង់បានឲ្យដឹងថា បច្ចុប្បន្នជនសង្ស័យត្រូវបានឃាត់ខ្លួនទុកហើយ រួមនឹង វត្ថុតាង ហើយជនសង្ស័យឈ្មោះ នី អាយុ៣៣ឆ្នាំ មានទីលំនៅស្ថិតក្នុងភូមិតាងោល ឃុំមេម៉ង់ ស្រុកកែវសីមា ។ ចំណែកជនរងគ្រោះ ឈ្មោះ ញេក អឿន អាយុ ៣៤ឆ្នាំ មានទីលំនៅស្ថិតក្នុងភូមិតាងោល ឃុំមេម៉ង់ ស្រុកកែវសីមា ដូចគ្នា ៕ ដោយ ឦសាន២
http://ift.tt/1dJGeEi