អាជ្ញាធរ និងសមត្ថកិច្ចក្រុងកំពង់ឆ្នាំង ហៅម្ចាស់គោយន្ត២៥នាក់ ក្នុងសង្កាត់កំពង់ឆ្នាំងមកអប់រំ និងបំពាក់ចំណាំងផ្លាតពីក្រោយគោយន្តបញ្ចៀសគ្រោះថ្នាក់
ខេត្តកំពង់ឆ្នាំង៖ ដោយពិនិត្យឃើញនូវករណីគ្រោះថ្នាក់ចរាចរណ៍ ដែលកើតឡើងដោយសាគោយន្តកន្លងមក ម្ចាស់គោយន្ត២៥គ្រឿងនៅក្នុងសង្កាត់កំពង់ឆ្នាំង ក្រុងកំពង់ឆ្នាំង ត្រូវបានអាជ្ញាធរ និងនគរបាលក្រុងកំពង់ឆ្នាំងកោះហៅមកធ្វើការផ្សព្វផ្សាយច្បាប់ចរាចរណ៍ផ្លូវគោក និងណែនាំបំពាក់ចំណាំងផ្លាតពីក្រោយគោយន្តទាំងអស់ ដើម្បីទប់ស្កាត់គ្រោះថ្នាក់ចរាចរណ៍នៅពេលយប់ឃើញ។ ការផ្សព្វផ្សាយនេះបានធ្វើឡើងនៅព្រឹកថ្ងៃទី០៤ ខែឧសភា ឆ្នាំ២០១៥ នៅប៉ុស្តិ៍នគរបាលរដ្ឋបាលកំពង់ឆ្នាំង ដែលមានការចូលរួមពីអាជ្ញាធរក្រុងសង្កាត់ នគរបាលចរាចរណ៍ក្រុង និងប្រជាពលរដ្ឋជាម្ចាស់គោយន្ត។
លោក ហង្ស ប៊ុនហាក់ អធិការរងនគរបាលក្រុងកំពង់ឆ្នាំងទទួលបន្ទុកសណ្តាប់ធ្នាប់ក្រុងកំពង់ឆ្នាំងបានផ្សព្វផ្សាយពីច្បាប់ចរាចរណ៍ផ្លូវគោក ដោយបានពន្យល់អោយម្ចាស់គោយន្តទាំងអស់យល់អំពីហានិភ័យ នៃការបើក បរគោយន្តពេលយប់នៅលើផ្លូវជាតិ ដែលគ្មានភ្លើងបំភ្លឺពីមុខ និងពិសេសគ្មានបំពាក់ចំណាំងផ្លាតពីក្រោយ។ លោកបានណែនាំទៀតថា ការចតគោយន្តនៅតាមផ្លូវជាតិ ឬផ្លូវលំត្រូវចតនៅកៀនចិញ្ចើមផ្លូវអោយផុត ពីតួ ផ្លូវដែលយានយន្តធ្វើចរាចរណ៍ បើមិនចតដូចការណែនាំនេះទេ ពេលមានគ្រោះថ្នាក់ចរាចរណ៍កើតឡើង គឺយើង ជាម្ចាស់គោយន្ត ជាអ្នកទទួលខុសត្រូវសងគេ និងមានទោសចំពោះមុខច្បាប់។
លោកបានបន្តថា៖ នៅក្នុងក្រុងកំពង់ឆ្នាំង មាន៤សង្កាត់ និងមានអ្នកប្រើប្រាស់គោយន្តប្រមាណ៩០គ្រឿង នៅពេលខាងមុខនេះអាជ្ញាធរនិងសមត្ថកិច្ចក្រុងកំពង់ឆ្នាំង នឹងអញ្ជើញម្ចាស់គោយន្តទាំងអស់មកផ្សព្វ ផ្សាយ ច្បាប់ ចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ចរាចរណ៍ ដែលបណ្តាលមកពីការមិនយល់ច្បាប់ និងការបើកបរ ប្រើប្រាស់គោយន្តកែឆ្នៃ។
លោក ហ៊ីង ភ័ព្វមិនា អភិបាលរងក្រុងកំពង់ឆ្នាំងដែលបានចូលរួមក្នុងការផ្សព្វផ្សាយខាងលើនេះ បានណែនាំ ដល់ម្ចាស់គោយន្តទាំងអស់ថា៖ដើម្បីបញ្ជៀសគ្រោះថ្នាក់ចរាចរណ៍ កុំអោយកើតមានដល់ខ្លួន និងអ្នកដទៃ ម្ចាស់គោយន្តទាំងអស់ត្រូវតែយល់ដឹងពីច្បាប់ចរាចរណ៍ គោររពផ្លាកសញ្ញាចរាចរណ៍ ពេលផឹកស្រវឹងកុំបើកបរ ពិសេសគោយន្តទាំងអស់ត្រូវតែមានភ្លើង បំភ្លឺពីខាងមុខ និងមានចំណាំងផ្លាតពាក់ពីក្រោយជាប់ជានិច្ច។ កន្លងមកថ្មីៗ នេះអ្នកបើកគោយន្តដឹកអុសស្ទែរម្នាក់ ដែលមិនបានបំពាក់ចំណាំងផ្លាតនៅពីក្រោយគោយន្ត បានបង្កអោយអ្នកជិះ ម៉ូតូម្នាក់រងរពួសធ្ងន់ធ្ងរ ដោយសារបុកគូថគោយន្តពីក្រោយពេញទំហឹងព្រោះតែមើល មិនឃើញ ហើយអ្នកបើក បរគោយន្តរូបនោះ ត្រូវបានតុលាការខេត្តចាប់ឃុំខ្លួនក្នុងពន្ធនាគារខេត្ត ដែលរូបគេត្រូវប្រឈមនឹងការផ្តន្ទា ទោសតាមបញ្ញត្តិច្បាប់។
នៅក្នុងការផ្សព្វផ្សាយច្បាប់ចរាចរណ៍ ម្ចាស់គោយន្តទាំងអស់ក៍បានសំណូមពរផងដែរ ស្នើសុំអោយមន្ទីរជំនាញជួយ ដាក់ផ្លាកសញ្ញាចរាចរណ៍ដែលមានសត្វគោឆ្លងកាត់ និងស្នើសុំជួយអប់រំណែនាំដល់សិស្សានុសិស្សកុំ អោយបើក បរម៉ូតូលឿនៗពេក និងជួយចុះផ្សព្វផ្សាយច្បាប់ចរាចរណ៍នៅក្នុងមូលដ្ឋាន ដើម្បីអោយប្រជាពលរដ្ឋជ្រួត ជ្រាបគ្រប់ៗគ្នា ទើបទប់ស្កាត់បាន និងអាចកាត់បន្ថយគ្រោះថ្នាក់ចរាចរណ៍បាន៕ ដោយ រិទ្ធិ ជ័យ
http://ift.tt/1ETvygr