លោក ឡុង ស៊ីថា ចាប់អ្នកកាសែត២នាក់ ដាក់ពន្ឋនាគារជិត ៣ខែ ហើយពុំមានពាក្យបណ្តឹង ផ្គាប់ចិត្តឈ្មួញឈើមានលុយ ហើយទើបតែបើកសវនាការ
ខេត្តព្រះវិហារ ៖ សាលាដំបូងខេត្តព្រះវិហារ បានបើកសវនាការ សំណុំរឿងអ្នកកាសែត ២រូប ដែលត្រូវបានឈ្មួញឈើ ប្តឹងពីបទកំហែងយក និងជ្រៀតជ្រែក មុខងារសាធារណៈ ហើយត្រូវបានលោក ឡុង ស៊ីថា ព្រះរាជអាជ្ញារង អមសាលាដំបូងខេត្តព្រះវិហារ ឃាត់ខ្លួនអ្នកកាសែតដែលមានឈ្មោះ ឈឿង ចាន់ នៅអង្គភាព ទូរទស្សន៍ អប្សរា និងឈ្មោះ ទិត្យ ស្រ៊ នៅអង្គភាព AKP ដាក់ពន្ឋនាគារជាង ២ខែ ទើបតែលើកមកជំនុំជម្រះ នៅថ្ងៃទី៧ ខែឧសភា ឆ្នាំ២០១៥។
ក្នុងទិដ្ឋភាពនៃអង្គជំនុំជម្រះ ដោយមានការចូលរួម ដោយលោក យិត ពន្លឺ ចៅក្រមជំនុំជម្រះ លោក កៅ ស៊ូផា មេធាវីតំណាង ឲ្យជនជាប់ចោទ ២រូប ចំណែកលោក ឡុង ស៊ីថា តំណាងអយ្យការ មិនបានចូលរួមនោះទេ ធ្វើឲ្យសេចក្តីនៃអង្គជំនុំជម្រះ ប្រព្រឹត្តទៅ ដោយឲ្យលោក ស្រេង វុទ្ធា តំណាងអយ្យការជំនួស។ រឿងក្តីរបស់អ្នកកាសែត សំណុំរឿងលេខ. ៣៥ ចុះថ្ងៃទី១០ ខែ កុម្ភះ ឆ្នាំ ២០១៥ ដោយមានដើមបណ្តឹង ៦នាក់ បានព្រួតគ្នាប្តឹង ទី១-ឈ្មោះ ហេងសម្បត្តិ ទី២-លោក ឈៀង ម៉ៅ ទី៣-លោក ហេង សម្បត្តិ ទី៤-លោក ផៃ នឿន ទី៥-លោកស្រី តួនអូន និងទី៦-ឈ្មោះ ម៉ៅ ហើយការបើកសវនាការនេះ ត្រូវបានធ្វើឡើង ចាប់ពីម៉ោង ៩និង៣០ នាទី ដល់ម៉ោង ១១និង៣០ នាទី ហើយបន្តនៅ ម៉ោង ២និង៣០ នាទី ដល់ម៉ោង ៤និង៣០ នាទី តែពុំទាន់ទទួលបានលទ្ធផល យ៉ាងណានោះទេ ។
ក្នុងថ្ងៃកាត់ក្តីជំនុះជម្រះ មានការចូលរួម ដោយលោក សុខ សុវណ្ណ ប្រធានសមាគម អ្នកសារពត៌មានកម្ពុជា និងប្រធានសមាគម មួយចំនួនទៀត រួមទាំងអ្នកកាសែត ទូរទស្សន៍ ក្នុងស្រុកចំនួន ៣២នាក់ មកពីបណ្តាខេត្ត ចូលរួមស្តាប់សវនាការជំនុំជម្រះ នៅតុលាការ ខេត្តព្រះវិហារ ។ ក្រោយពីបានស្តាប់ នូវអង្គហេតុ នៃអង្គសវនាការរួចមក គឺទទួលបានចម្លើយថា លោក ឈឿង ចាន់ ពុំបានប្រព្រឹត្តខុស ដូចការចោទប្រកាន់ គឺគ្រាន់តែជាការពឹងពាក់ របស់ឈ្មួញឲ្យទទួលលុយ ទៅឲ្យបុគ្គលម្នាក់ទៀត តែប៉ុណ្ណោះ ចំណែកលោក ទិត្យ ស្រ៊ ត្រូវបានជាប់ចោទ ពីបទកំហែងយក ដោយសារការ ធ្វេសប្រហែសក្នុងតួនាទី។
តាមការស្នើសុំរបស់លោក កៅ ស៊ូផា មេធាវីតំណាង ឲ្យជនរងគ្រោះ បានសំណូមពរឲ្យចៅក្រម មានការអធ្យាស្រ័យ លើកលែងទោស ឲ្យអ្នកកាសែត ២រូប ដោយយល់ឃើញថា ការចោទប្រកាន់ របស់លោក ឡុង ស៊ីថា បានអនុវត្តមិនត្រឹមត្រូវ តាមនីតិវិធីច្បាប់ គឺគ្រាន់តែគេឆ្លើយដាក់ ក៏ចាប់អ្នកកាសែត ដាក់ពន្ឋនាគារជិត ៣ខែ ហើយពុំមាន ពាក្យបណ្តឹងនោះទេពាក់ព័ន្ឋទៅនឹង លោក ឈឿង ចាន់ សូម្បីតែលោក ឈឿង ម៉ៅ ដែលជាដើមបណ្តឹង បានឆ្លើយនៅក្នុងសវនាការថា លោកមិនបានប្តឹងទេ ហើយក៏មិនបានឲ្យលុយ ៥០ម៉ឺន ទៅលោក ឈឿង ចាន់ នោះដែរ។
ចំណែកលុយ ១០ ម៉ឺនរៀល លោកបានអះអាងថា បានឲ្យទៅលោក ឈឿង ចាន់ ទុកចាក់សាំង ជាមនោសញ្ជេតនានោះទេ តែទោះជាម្ចាស់ដើមបណ្តឹង បានអះអាងបែបនេះក្តី ក៏លោក ឡុង ស៊ីថា បានព្យាយាម ឃាត់ឃាំងសេរីភាព ដាក់ពន្ឋនាគារជិត ៣ខែ រួចមកហើយ និងពុំទាន់ធ្វើការដោះលែង នោះទេ ។ ពាក់ព័ន្ឋទៅនឹងការចោទប្រកាន់នេះ មហាជនបានរិះគន់យ៉ាងចាស់ដៃ ទៅលើលោក ឡុង ស៊ីថា ហើយចោទសួរថា បើអាងតែខ្លួន ជាព្រះរាជអាជ្ញារង និងជាស្ថាប័នច្បាប់ ចាប់ហើយព្យាយាមលាបពណ៌ រឿងតូចទៅជារឿងធំ ចោទប្រកាន់ដោយខុសនីតិវិធីបែបនេះ តើត្រូវបានទទួលការណែនាំ និងមានទោសដែរឬទេ ៕ ដោយ សមាគម អ្នកសារព័ត៌មាន
http://ift.tt/1zRBQ04
