ជនបរទេសថតវីដេអូបង្ហាញពីចិត្តលង់ស្នេហ៍ទឹកដីកម្ពុជា
“ខ្ញុំបានថតវីដេអូនៅថៃ វៀតណាម និងកម្ពុជាជាង១០ខែ ក្នុងរយៈពេល ៣ឆ្នាំចុងក្រោយនេះ។ ខ្ញុំបានទៅលេងកន្លែងអស្ចារ្យច្រើនណាស់ ប៉ុន្តែបែរជាលង់ស្នេហ៍ជាមួយទឹកដីកម្ពុជា”។ នេះគឺជាការបញ្ជាក់របស់ផលិតករវីដេអូម្នាក់ ដែលបានផ្ដិតយកទិដ្ឋភាពដ៏ស្រស់បំព្រងនៃដែនដីសុវណ្ណភូមិ អមជាមួយពាក្យពេចន៍បង្ហាញពីក្ដីស្រលាញ់យ៉ាងជ្រាលជ្រៅ។
អ្នកផលិតវីដេអូ ដែលមានផលិតកម្មឈ្មោះ Jan Trnka Productions បានរៀបរាប់ពីភាពស្រស់ស្អាតរបស់ប្រទេសកម្ពុជា ជាពិសេសប្រាសាទអង្គរវត្តដ៏អស្ចារ្យ និងជីវិតដ៏សាមញ្ញរបស់ប្រជាជន។ លោកបាននិយាយថា “គ្រប់ពេលខ្ញុំចាកចេញពីព្រលានយន្តហោះភ្នំពេញ ខ្លួនប្រាណខ្ញុំបានគាំងមួយសន្ទុះ ហើយគិតថា… Wow ខ្ញុំកំពុងចាកចេញពីកន្លែងអស្ចារ្យនេះហើយ”។
ផលិតករវីដេអូ បានចំណាយពេលជិត ៤ខែនៅក្នុងព្រះរាជាណាចក្រកម្ពុជា។ ពេលវេលានេះ ធ្វើឲ្យលោកបានជួបប្រទះជីវិតពិតរបស់ប្រជាជន ដែលកំពុងរស់នៅក្នុងទីក្រុង ក៏ដូចជាប្រជាជននៅតាមជនបទចុងកាត់មាត់ញក ដែលអ្នកទេសចរណ៍ធម្មតាមិនធ្លាប់ទៅដល់។
“ខ្ញុំបានជួបប្រជាជនដែលមានចិត្តល្អ ហើយភាពស្និទ្ធស្នាល និងស្នាមញញឹមនៅលើទឹកមុខរបស់ពួកគេ ជាអ្វីដែលបស្ចិមប្រទេសពិបាករក។ វាជាបទពិសោធន៍ជីវិតដ៏ធំមួយ ហើយក៏ជាការជំរុញចិត្តដ៏អស្ចារ្យក្នុងអាជីពផលិតវីដេអូ ដែលខ្ញុំបានចំណាយពេលនៅក្នុងប្រទេសដ៏ស្រស់បំព្រងមួយនេះ”។ ផលិតករវីដេអូបញ្ជាក់។
ទោះយ៉ាងណា ជនបរទេសរូបនេះ ក៏បានលើកឡើងពីចំណុចអវិជ្ជមានរបស់ប្រទេសកម្ពុជាផងដែរ។ លោកបានបញ្ជាក់ថា បេះដូងនៃតំបន់អាស៊ីអាគ្នេយ៍មួយនេះ កំពុងជួបប្រទះបញ្ហាកាកសំណល់ ភាពក្រីក្រ និងអំពើពុករលួយ ដែលកើតមានលើប្រជាជនគ្រប់ស្រទាប់វណ្ណៈ៕
ចង់ដឹងថា កម្ពុជាស្រស់បំព្រងយ៉ាងណា សូមទស្សនាវីដេអូ៖
ចុចអាន៖ ជនជាតិអូស្ត្រាលីជួលកោះសង្សារ ១៥០០០ដុល្លារប្រែក្លាយជារមណីយដ្ឋានប្រណីត
ប្រែសម្រួល៖ គង់ វិសាល
ប្រភព៖ Vimeo
