ផ្ទះឈើលើក្រោមថ្មទុសេខ្សែភ្លើងឆេះម៉ត់ទាំងស្រុង ម្ចាស់បានត្រឹមឈរមើលសម្រក់ទឹកភ្នែក
ខេត្តរតនគិរី៖ ផ្ទះប្រជាពលរដ្ឋមួយខ្នងទំហំ៨x៩ម៉ែត្រ សាងសង់ឡើងអំពីឈើលើ ថ្មក្រោម ប្រក់ស័ង្កសី ជញ្ជាំងក្តារត្រូវបានអគ្គីភ័យឆាបឆេះយ៉ាងសន្ធោសន្ធៅ និងបណ្តាលឲ្យម្ចាស់ផ្ទះ១នាក់រងរបួសធ្ងន់ រលាត់ដៃរលាត់ជើង រីឯទ្រព្យសម្បត្តិត្រូវបាត់បង់ទាំងស្រុង។ ហេតុការណ៍ធ្វើអោយភ្នាក់ផ្អើលនេះបានកើតឡើង កាលពីវេលាម៉ោង៣និង៤៥នាទីរសៀល ថ្ងៃទី២៣ ខែមិថុនា ឆ្នាំ២០១៥ ផ្ទះប្រជាពលរដ្ឋមួយខ្នងនៅត្រង់ចំណុចក្បែរបន្ទាយទាហានដំរីលើកជើង ស្ថិតក្នុងភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី។
សមត្ថកិច្ចមូលដ្ឋានបានឲ្យដឹងថា ម្ចាស់ផ្ទះដែលត្រូវអគ្គីភ័យឆាបឆេះនោះ មានឈ្មោះ ខាំ មុត ភេទ ស្រីអាយុ៥៤ឆ្នាំ ជនជាតិខ្មែរ (ជាប្រពន្ធ) មានមុខរបរលក់សម្លចាណាង(ឈ្មោះម្ហូបជនជាតិភាគតិចនៅភូមិភាគឦសាន) និងមានប្តីឈ្មោះ ថន ធន់ អាយុ៥៨ឆ្នាំ ជនជាតិខ្មែរ មុខរបរ(ជាមន្ត្រីយោធា) ហើយមានកូនក្នុងបន្ទុកចំនួន៧នាក់ ប្រុស៣នាក់ ស្រី៤នាក់។
បើតាមការរៀបរាប់ពីស្ត្រីម្ចាស់ផ្ទះទាំងហូរទឹកភ្នែកអោយដឹងថា៖ កាលពីវេលាម៉ោងខាងលើ រូបគាត់ព្រមទាំងកូនប្រុស ស្រី ខណៈកំពុងលក់សម្លចាណាងនៅខាងក្រោមផ្ទះ ចំណែកប្តីគាត់ដេកនៅលើផ្ទះ ស្រាប់តែមានហុយផ្សែងផុសចេញពីបន្ទប់ខាងលើខាងមុខជាន់ទី២នោះ ក៏មានការភ្ញាក់ផ្អើលឡើង។ ស្ត្រីនោះបានបន្តទៀតថា ប្តីគាត់ឃើញភ្លើងឆេះសន្ធោសន្ធៅក៏ស្រវាទាញយកសម្ភារៈ មួយចំនួននៅលើផ្ទះ ក៏ត្រូវអណ្តាភ្លើងឆេះរលាត់ដៃ រលាត់ជើង រងរបួសធ្ងន់ ត្រូវប្រជាពលរដ្ឋដឹកបញ្ជូនទៅកាន់មន្ទីរពេទ្យបង្អែកខេត្ត។
ស្ត្រីម្ចាស់ផ្ទះនោះបានអះអាងថា៖ អគ្គីភ័យដ៏សាហាវនេះគឺផ្តើមចេញពីការទុសេខ្សែភ្លើង។ ក្រោយពេលកើតហេតុត្រូវបានរថយន្តអគ្គីភ័យនៃស្នងការដ្ឋាននគរបាលខេត្តទៅពន្លត់អស់ចំនួន៤គ្រឿង ទើបស្ថានភាពស្ងប់ស្ងាត់ទៅវិញ ប៉ុន្តែទ្រព្យសម្បត្តិរបស់គាត់ត្រូវក្លាយជាចំណីភ្លើងទាំងស្រុង៕ លី វណ្ណៈ
http://ift.tt/1QPnC7w
