ផ្លូវធ្វើដំណើរដែលល្បីថាគ្រោះថ្នាក់ជាងគេលើលោក
ផ្លូវតាមតំបន់ពិបាកឆ្លងកាត់ជាច្រើនត្រូវបានគេសាងសង់ឡើង សម្រាប់ជួយសម្រួលដល់ការធ្វើដំណើរ និងឆ្លងឧបសគ្គផ្សេងៗដើម្បីឲ្យឆាប់ទៅដល់គោលដៅ។ មានផ្លូវមួយចំនួន មើលទៅទៅគួរឲ្យខ្លាច និងតម្រូវឲ្យមានការប្រុងប្រយ័ត្នជានិច្ចក្នុងពេលធ្វើដំណើរឆ្លងកាត់។ ជាក់ស្ដែងដូចផ្លូវទាំង៥ខាងក្រោមនេះជាដើម ដែលត្រូវបានគេល្បីថាមានគ្រោះថ្នាក់ជាងគេបំផុត៖
១. ផ្លូវ Altantic Ocean ប្រទេសន័រវែស
មានប្រវែង៨,៣គីឡូម៉ែត្រ និងត្រូវចំណាយពេល៣០នាទីដើម្បីធ្វើដំណើរឆ្លងកាត់។ ផ្លូវមួយនេះតភ្ជាប់ដោយស្ពានចំនួន៨ និងសង់ពីលើកោះនៃមហាសមុទ្រអាត្លង់ទិចខាងជើង។ នៅពេលមានព្យុះបោកបក់មកលើផ្លូវនេះ គឺមានសភាពគួរឲ្យខ្លាច។
២. ផ្លូវ South Yungas Road ប្រទេសបូលីវី
មានប្រវែងជាង៦៩គីឡូម៉ែត្រ និងជាផ្លូវតែមួយគត់សម្រាប់ឆ្លងទៅភូមិនៅតំបន់ Yungas ។ អ្នកធ្វើដំណើរឆ្លងកាត់ផ្លូវនេះប្រឈមនឹងហានិភ័យដល់ជីវិតបើមិនមានការប្រុងប្រយ័ត្នទេនោះ។ ជារៀងរាល់ឆ្នាំហេតុការណ៍គ្រោះថ្នាក់ជាច្រើនបានកើតឡើងនៅទីនោះ និងបានសម្លាប់ជីវិតមនុស្សអស់ជាច្រើន។
៣. ផ្លូវឆ្លងកាត់ទន្លេ Vitim ក្នុងតំបន់ស៊ីបេរី
ជាផ្លូវស្ពានដែលមានប្រវែង៦០០ម៉ែត្រ កម្ពស់១៥ម៉ែត្រ។ វាជាផ្លូវតូចចង្អៀត និងមានគ្រោះថ្នាក់បំផុត។ អំឡុងពេលរដូវរងា និងរដូវភ្លៀងដែលមានព្យុះភ្លៀងបោកបក់ គឺជាទិដ្ឋភាពគួរឲ្យខ្លាច។
៤. ផ្លូវ Shyari ប្រទេសឥណ្ឌា
ជាផ្លូវកាត់រូងថ្មដែលឆ្លងពីតំបន់ Shyari ទៅ Ishtyari ។ នៅរដូវភ្លៀង មានភាពលំបាក និងមានសភាពគ្រោះថ្នាក់ក្នុងការធ្វើដំណើរ ដោយសារផ្លូវរអិលដោយភក់ជ្រាំ។
៥. ផ្លូវលើចង្កេះជួរភ្នំហិមាល័យ អាស៊ីខាងត្បូង
ជាផ្លូវតូចចង្អៀត និងសំបូរទៅដោយដុំថ្ម ដែលស្ថិតនៅលើជម្រាលភ្នំដែលមានគ្រោះថ្នាក់បំផុត ។ ពេលខ្លះផ្លូវនេះមានព្រិលពាសពេញ និងមានទឹកធ្លាក់ពីខាងលើមក ដែលបង្កជាគ្រោះថ្នាក់ដោយសារការរអិលបាន៕
ចុចអាន៖ ផ្លូវតាមចំណោតភ្នំនៅចិន គួរឲ្យខ្លាច តែគេសរសើរថាស្អាតអស់ទាស់
ប្រែសម្រួល៖ មាន រតនា
ប្រភព៖ storyeo
