ឧកញ្ញា ឆាយ ជ្រាយ សម្រុកដឹកឈើដោយរថយន្តយីឌុប ចេញពីស្រុកព្រែកប្រសព្វ ឆ្លង ដរចម្លងកំពង់គរ-ឆ្លូងរាល់យប់ អាជ្ញាធរខេត្តក្រចេះបើកដៃឲ្យពេញទំហឹង
ខេត្តក្រចេះ៖ ប្រភពពីប្រជាពលរដ្ឋស្រុកព្រែកប្រសព្វបានរាយការណ៍អោយដឹងថា ជារៀងរាល់យប់ មានរថយន្តយីឌុបដឹកឈើប្រណិតច្រើនគ្រឿង បានដឹកឈើចេញពីតំបន់ព្រៃឡង់ ចូលមកស្រុកព្រែកប្រសព្វឆ្លងតាមដរចម្លងពីកំពង់គរទៅស្រុកឆ្លូង និងបន្តនាំឆ្ពោះទៅខេត្តត្បូងឃ្មុំ ដោយគេមិនដែលឃើញសមត្ថកិច្ចជំនាញណាមួយនៅក្នុងខេត្តនេះមានវិធានការទប់ស្កាត់តាមផ្លូវច្បាប់ឡើយ បើទោះជាគេបានដឹងថាឈើដែលដឹកជញ្ជូនទាំងនោះ គ្មានច្បាប់ទម្លាប់អ្វីក៏ដោយ។
ប្រភពបន្តថា ក្នុងមួយយប់ៗមានក្រុមរថយន្តដឹកឈើប្រណិតរាប់សិបគ្រឿង ឆ្លងតាមដរចម្លងកំពង់គរឆ្លូង ដែលបង្កជាសំលេងរំខានដល់ពួកគាត់រាល់យប់ តែសកម្មភាពទាំងមិន មានការរំខានដល់អាជ្ញាធរ និងមន្ត្រីជំនាញឡើយ ដែកគេអាចនិយាយបានថានេះជាអំពើឃុបឃិតចែកផលប្រយោជន៍គ្នារវាងមេឈ្មួញឈើ និងអ្នកមានអំណាចនៅក្នុងខេត្តនេះ។
ប្រភពដដែលបានអះអាងថាសកម្មភាពដឹកជញ្ជូនឈើប្រណិតខាងលើនេះត្រូវបានគេដឹងថា ប្រព្រឹត្តឡើងដោយមេឈ្មួញមុខដដែលៗគឺឧកញ្ញា ឆាយ ជ្រាយ។ ឧកញ៉ាម្នាក់នេះល្បីល្បាញខាងធ្វើជំនួញឈើ ដែលពាក់ព័ន្ធយ៉ាងជ្រៅក្នុងការ លួចកាប់បំផ្លាញព្រៃឈើជាតិ។ គាត់ជាមេឈ្មួញដ៍ធំប្រចាំខេត្តក្រចេះ ត្បូងឃ្មុំ ដែលក្នុងនោះ មានមន្ត្រីម្នាក់ ម្នាក់ឈ្មោះ គុន្ឋា មានតួរនាទីជានាយប៉ុស្តិ៍រដ្ឋបាលឃុំកំពង់ដំរី ស៊ីឈ្នួលធ្វើជាមេការ ជាអ្នកមើលខុស ត្រូវ និងចាំយាមមើលក្បួនរថយន្តដឹកឈើឆ្លងដរចម្លងខាងលើ ដើម្បីបន្តរដំណើរឆ្ពោះទៅខេត្តត្បូងឃ្មុំ និងនាំចេញទៅប្រទេសវៀតណាម ។
ក្រៅពីជំនួញឈើខុសច្បាប់ លោក ឧកញ៉ា ឆាយ ជ្រាយ ត្រូវបានគេដឹងថា ជាមន្ត្រីយោធា នៃកងយោធពលខេមរភូមិន្ទ មានតួរនាទីជា មេបញ្ជាការសឹករងស្រុកដំបែរផងដែរ។ ហើយបានយកស្បែកជាយោធារយត់ការផង និងកាងផងធ្វើជំនួញឈើល្មើសច្បាប់ រហូតមកដល់ពេលនេះបើទោះជាឧកញ៉ា ឆាយ ជ្រាយ ល្មើសនឹងច្បាប់កងទ័ព ពូកែសូកប៉ាន់ ល្មើសនឹងច្បាប់ប្រឆាំងអំពើពុករលួយ ល្មើសនឹងច្បាប់ព្រៃឈើ ។ល។ ក៏នៅតែ ឧកញ៉ារូបនេះមិនដែលរងការចោទប្រកាន់ពីស្ថាប័នណាមួយនៅឡើយ។ គេមិនដឹងថាតើការគេចផុតពីទោសទាំងនោះដោយសារតែឧកញ៉ា ឆាយ ជ្រាយ អួតអាងប្រាប់គេថាគាត់រកស៊ីឈើនោះរកលុយដើម្បីជួយបក្សចុះមូលដ្ឋាន ឬយ៉ាងណានោះទេ។
មជ្ឍដ្ឋានមួយចំនួនបានធ្វើការរិះគន់ មន្ត្រីផ្នែករដ្ឋបាលព្រៃឈើព្រែកប្រសព្វ និងមន្ត្រីផ្នែក ឆ្លូងថា បានបើកដៃអោយក្រុមឈ្មួញធ្វើ សកម្មភាពដឹកជញ្ជូនឈើប្រណិតខុសច្បាប់ពី តំបន់នានាចូលមកក្នុងទឹកដីព្រែកប្រសព្វ ហើយឆ្លងមកស្រុកឆ្លូង យ៉ាងគក្រឹក គ្មានចំណាត់ការបង្ក្រាបអ្វីសោះឡើយ ដែលជាទង្វើអសកម្មពេញបន្ទុក។
មន្ត្រីអាជ្ញាធរស្រុកព្រែកប្រសព្វបានបញ្ជាក់ថា ចំពោះសកម្មភាពដឹកឈើនៅក្នុងស្រុកព្រែកប្រសព្វ គឺមានតែក្រុមហ៊ុនមួយប៉ុណ្ណោះដែលមានច្បាប់ ដែលគេដឹកជញ្ចូនឆ្លូងតាមកំពង់ចម្លងព្រែកព្រលូង ដោយឡែកបើមានអ្នកដឹកចេញពីតំបន់ផ្សេងទៀត គ្មានច្បាប់នោះទេ ហើយលោកក៍បានបញ្ជាក់ថា ចំពោះសកម្មភាពបែនោះគឺវាលើស ពីសមត្ថភាពរបស់លោកហើយ មានតែជំនាញពាក់ព័ន្ធទេចាត់ការរឿងនេះមានប្រសិទ្ធិភាព៕ ឥឦសាន១
http://ift.tt/1Cv6228