ឧកញ៉ា សុខ ប៊ុន វាយស្រីផ្អើលពេញប្រទេស ត្រូវតុលាការសម្រេចឃុំខ្លួនបណ្តោះអាសន្ន នៅពន្ធនាគារព្រៃស
ភ្នំពេញ ៖ លោកឧកញ៉ា សុខ ប៊ុន ដែលល្បីពេញប្រទេសរឿងវាយទាត់ធាក់ បោចសក់ អូសសម្រាតអតីតពិធីការិនីទូរទស្សន៍ CTN កញ្ញា ឯក សុជាតា ហៅសាសា និងបញ្ជាឲ្យអង្គរក្ស បាញ់សម្លាប់នាង កាលពីយប់ថ្ងៃទី០២ ខែកក្កដា ឆ្នាំ២០១៥ ត្រូវបានចៅក្រម ស៊ើប សួរសាលាដំបូងរាជធានីភ្នំពេញលោក លាង សំណាត់ សម្រេចឃុំខ្លួនបណ្ដោះ អាសន្នដាក់ពន្ធនាគារព្រៃសកាលពី រសៀលថ្ងៃទី១៨ ខែកក្កដា ឆ្នាំ២០១៥ នេះ។
ជនជាប់ចោទ សុខ ប៊ុន ដើមកំណើតនៅខេត្តក្រចេះ អាយុ៣៧ឆ្នាំ ទម្ងន់៧៥គីឡូក្រាម កំពស់ ១.៧ម៉ែត្រ ត្រូវបាន សមត្ថកិច្ចនាំខ្លួនពីប្រទេសសិង្ហបុរីតាម ជើងយន្ដហោះរបស់ក្រុមហ៊ុនអាកាស ចរ Silk Air មកដល់ ព្រលានយន្តហោះអន្តរជាតិភ្នំពេញ នៅម៉ោងប្រមាណជាង ៩ ព្រឹកថ្ងៃទី១៨ ខែកក្កដានេះ គឺពីរថ្ងៃនេះបន្ទាប់ពីមានការព្រមានឲ្យចូលខ្លួន ដើម្បីដោះស្រាយបទហិង្សារបស់ខ្លួន ពីសំណាក់ នាយករដ្ឋមន្ត្រី ហ៊ុន សែន និងតាមការបញ្ជាឲ្យចាប់ខ្លួន។
សូមរំលឹកថា កាលពីព្រឹកម្សិលមិញ ចៅក្រមស៊ើបសួរ នៃសាលាដំបូងរាជធានីភ្នំពេញ លោក លាង សំណាត់ បានបញ្ជប់ការសាកសួរ អតីតពិធីការិនីទូរទស្សន៍ CTN កញ្ញា ឯក សុជាតា ហៅសាសា ជុំវិញ បណ្តឹងព្រហ្មទណ្ឌរបស់នាង ដែលបានប្តឹងទាមទាររកយុត្តិធម៌ ពីលោកឧកញ៉ា សុខ ប៊ុន ដែលបានប្រើអំពើហិង្សា យ៉ាងឃោរឃៅលើរូបរាងកាយនាង កាលពីយប់ថ្ងៃទី០២ ខែកក្កដា ឆ្នាំ២០១៥ កន្លងទៅនេះ។
កញ្ញា សាសា បានថ្លែងប្រាប់ក្រុមអ្នកកាសែត បន្ទាប់ពីបញ្ចប់ការសាកសួរ នៅខាងក្រៅរបស់សាលាដំបូងរាជធានីភ្នំពេញថា៖ នាងបានស្នើសុំឲ្យតុលាការ សម្រេចផ្តន្ទាទោស លោកឧកញ៉ាសុខ ប៊ុន ទៅតាមច្បាប់ និងទាមទារឲ្យលោកឧកញ៉ា សុខ ប៊ុន ចូលខ្លួនដោះស្រាយនៅមុខតុលាការ។
នៅក្នុងរឿងក្តីនេះ ឧកញ៉ា សុខ ប៊ុន ត្រូវបាន តំណាងអយ្យការលោកហ៊ឹង ប៊ុនថន ព្រះរាជអាជ្ញារង អមសាលាដំបូងរាជធានី ភ្នំពេញសម្រេចចោទប្រកាន់ពីបទ ហិង្សាដោយចេតនាមានស្ថានទម្ងន់ទោស និងអង្គរក្សរបស់លោកពីបទប៉ុនប៉ងមនុស្សឃាត និងប្រើប្រាស់អាវុធដោយគ្មានការអនុញ្ញាត ទាក់ទងនឹង ករណីហិង្សា ដោយវាយទៅលើ អតីតពិធីការិនីទូរទស្សន៍ CTN កញ្ញា សាសា កើតហេតុកាលពីយប់ថ្ងៃទី០២ ខែកក្កដា ឆ្នាំ២០១៥៕
http://ift.tt/1Mc2F2q
