រថយន្តហ៊ីយ៉ាន់ដាយធុនធំដឹកជ្រូកដាច់ប្រអប់កុងកូយរ៉ឺម៉កក្រឡាប់ងាប់ជ្រូករាប់សិបក្បាល
ខេត្តកំពង់ឆ្នាំង៖ សត្វជ្រូកបានងាប់រាប់សិបក្បាល នៅពេលរថយន្តធុនធំដឹកជ្រូក១គ្រឿង បានដាច់ប្រអប់ កុងកូយរ៉ឺម៉កសណ្តោងក្រឡាប់បះជើង។ ហេតុការណ៍នេះបានកើតឡើងនៅម៉ោង៤ និង៣០នាទីទៀបភ្លឺ ព្រឹកថ្ងៃទី០៤ ខែកក្កដា ឆ្នាំ២០១៥ លើផ្លូវជាតិលេខ៥ចំណុចភូមិចំការស្វាយ ឃុំសេដ្ឋី ស្រុកសាមគ្គីមានជ័យ។
សមត្ថកិច្ចនគរបាលមូលដ្ឋាននៅការពារកន្លែងកើតហេតុបាននិយាយអោយដឹងថា៖ រថយន្តក្រឡាប់ខាងលើ នេះម៉ាកហ៊ីយ៉ាន់ដាយ ស្លាកលេខត្រូវបានគេដោះលាក់ទុកលើកាប៊ីនរថយន្តគ្នាគេមួយគ្រឿងទៀត ( ចេញលេខ៣ខ្ទុងគឺ ភ្នំពេញ ៥៧៦ ) ដែលមកសាងយកជ្រូក ក្រោយពេលកើតហេតុ បានដឹកជ្រូកពេញរថយន្តរាប់រយក្បាលពីព្រំដែនខ្មែរថៃ ឆ្ពោះទៅតីក្រុងភ្នំពេញ។ លុះមកដល់កន្លែងកើតហេតុ បានដាច់កុងកូយរ៉ឺម៉កសណ្តោងក្រឡាប់បះជើងលើទ្រូងផ្លូវជាតិ ចាក់ជ្រូកចោលពេញផ្លូវ។ ក្នុងករណីគ្រោះថ្នាក់ខាងលើនេះ ពុំបណ្តាលអោយមានមនុស្សណាម្នាក់រងរបួសនោះឡើយ ប៉ុន្តែជ្រូកអាចងាប់រាប់សិបក្បាល។
សមត្ថកិច្ចបានអោយដឹងថា៖ ករណីគ្រោះថ្នាក់នេះបណ្តាលមកពីការដឹកជ្រូកលើសទម្ងន់ទើបបណ្តាលអោយប្រអប់កុងកូយក្បាលរ៉ឺម៉កសណ្តោងរហែកដាច់ក្រឡាប់កន្ទុយរថយន្តនោះចាក់ជ្រូករាប់រយក្បាលចោលពេញផ្លូវតែម្តង ករណីនេះក៏សំណាងល្អដែរព្រោះមិនបង្កអោយមានគ្រោះថ្នាក់ដល់អ្នកធ្វើចរាចរណ៍តាមដងផ្លូវ៕ ដោយ រិទ្ធិ ជ័យ
http://ift.tt/1JJEMQ5
