កុមារីអាយុ២ឆ្នាំម្នាក់ ស្លាប់ក្រោមគំនរត្រីជីរ បន្ទាប់ពីរថយន្តដឹកត្រីជីរ ថយក្រោយរអិលកំពប់សង្កត់លើ
ខេត្តព្រះសីហនុ៖ កុមារីម្នាក់បានបាត់បង់ជីវិតភ្លាមៗ នៅក្នុងគំនរត្រីជីរ គួរអោយអាណោចអាធ័មជាពន់ពេក បន្ទាប់ពីត្រូវបានរថយន្តដឹកត្រីជីរអិលថយក្រោយ ជះត្រីជីរទៅសង្កត់លើកុមារីរងគ្រោះបណ្តាលឲ្យថប់ដង្ហើមស្លាប់ភ្លាមៗ។ ហេតុការណ៍ដ៏គួរអោយសង្វេកនេះបានកើតឡើងនៅវេលាម៉ោង១៨ និង៤៥នាទូយប់ថ្ងៃទី៥ ខែកក្កដា ឆ្នាំ២០១៥ នៅចំណុចក្បែររោងចក្រប្រេងកាត ស្ថិតក្នុងភូមិ៤ ឃុំអូត្រេះ ស្រុកស្ទឹងហាវ ខេត្តព្រះសីហនុ។
យោងតាមប្រភពពីសមត្ថកិច្ចចរាចរណ៍ស្រុកស្ទឹងហាវបានអោយដឹងថា៖ ដោយសារតែការដឹកលើសចំណុះ រថយន្តហ៊ីយ៉ានដាយ១គ្រឿងម៉ាក ហ៊ីយ៉ានដាយ ពណ៌សក្រហម ពាក់ស្លាកលេខ 3A-0310 បើកបរដោយឈ្មោះ ចន សារ៉ាន់ ភេទប្រុស អាយុ៤៥ឆ្នាំ មានទីលំនៅភូមិ៣ សង្កាត់លេខ០១ ក្រុងព្រះសីហនុ បានរអិលថយក្រោយខណៈពេលឡើងចំនួនមិនរួច មកបុកតូបលក់ដូរសង្កត់កុមារីម្នាក់ស្លាប់ភ្លាមៗនៅក្នុងគំនរត្រីជីរ។ កុមាររងគ្រោះមានឈ្មោះយឺន ស្រីលីនភេទស្រី អាយុ២ឆ្នាំ មានម្តាយឈ្មោះ ទួនសារ៉ន២៨ឆ្នាំ និងឪពុក ឈ្មោះ យឺន តុលា ២៨ ឆ្នាំ មានទីលំនៅ ក្រុម៤ភូមិ៤ ឃុំអូត្រេះ ស្រុកស្ទឹងហាវ ខេត្តព្រះសីហនុ ។
ដោយឡែក យោងតាមប្រភពសាក្សីនៅក្បែរកន្លែងកើតហេតុបានអះអាងថា៖ នៅមុនកើតហេតុគេបានឃើញរថយន្តមួយគ្រឿងពណ៌ស បើកបរក្នុងទិសដៅពីលិចទៅកើត (ពីក្រុងព្រះសីហនុ ទៅកាន់ភ្នំពេញ) តាមកំណាត់ផ្លូវតិរៈវិធីសម្តេច ហ៊ុន សែន បានបើកឡើងចំណោទ តែដោយសាររថយន្តដឹកធ្ងន់ពេកឡើងចំណោទមិនរួច ក៏រអិលថយក្រោយមកបុកតូបលក់នៅចឹញ្ចើមផ្លូវ សង្កត់កុមាររងគ្រោះស្លាប់តែម្តង ខណៈពេលម្តាយនៅក្បែរនោះរួចផុតពីជីវិត។
ក្រោយកើតហេតុកុមាររងគ្រោះ ត្រូវបានឪពុក ម្តាយយកទៅធ្វើបុណ្យតាមប្រពៃណី ចំណែក រថយន្តបង្ករួមជាមួយតៃកុងរថយន្តត្រូវបានឃុំខ្លួន និងរក្សាទុកនៅការិយាល័យចរាចរណ៍ស្រុកស្ទឹងហាវ ខេត្តព្រះសីហនុ៕ សមុទ្រខៀវ
http://ift.tt/1eyxD7f
