នៅដើមខែកក្កដានេះមានកុមារជាច្រើនកើតជំងឺគ្រុនឈាមចូលព្យាបាលនៅក្នុងមន្ទីរពេទ្យ ខេត្ត តែលោក គ្រូពេទ្យខេត្តថាមិនទាន់មានជំងឺនេះច្រើននោះទេ
ខេត្តកំពង់ឆ្នាំង៖ នៅក្នុងដើមខែកក្កដា ឆ្នាំ២០១៥ មកដល់ពេលនេះ ជំងឺគ្រុនឈាមបានកើតឡើងលើកុមារនៅតាមតំបន់មួយចំនួនក្នុងខេត្តកំពង់ឆ្នាំង ដែលធ្វើអោយប្រជាពលរដ្ឋនៅក្នុងភូមិឃុំឆ្ងាយៗ មានការព្រួយបារម្មណ៍។ លោកប្រធានមន្ទីរពេទ្យខេត្តនិយាយថា ក្នុង១ថ្ងៃៗកុមារមានជម្ងឺគ្រុនឈាម និងជម្ងឺ ទូទៅចូលមកសំរាកព្យាបាលក្នុងមន្ទីរពេទ្យខេត្តជាមធ្យមចំនួន៣០នាក់ មកទល់ពេលនេះមិន ទាន់មាន កុមារ ណាម្នាក់រងគ្រោះដល់ជីវិតដោយសារជំងឺគ្រុនឈាមទេ នេះក៏ដោយសារប្រជាពលរដ្ឋ យើងភាគ ច្រើនបានយល់ពីស្ថានភាពនៃជម្ងឺនេះ។
លោក សូរិន្ទ ទីរ៉ាវុឌ្ឍី ប្រធានមន្ទីរបង្អែកខេត្តកំពង់ឆ្នាំង បាននិយាយអោយដឹងនៅព្រឹកថ្ងៃទី២០ ខែកក្កដា ឆ្នាំ២០១៥នេះថា៖ ចាប់ពីដើមខែកក្កដាមកទល់ពេលនេះពិតជាមានកុមារជាច្រើនាក់បានចូលមកសម្រាកព្យាបាលនៅមន្ទីរពេទ្យខេត្តពិតមែននិងកុមារភាគច្រើនកើតជំងឺគ្រុនឈាមក្នុងនោះដែរខ្លះក៏មានជំងឺគ្រុនក្តៅធម្មតា និងរាគរូសផងដែរ ដែលអាគារពេទ្យកុមារខេត្ត ក្នុងមួយថ្ងៃៗគិតជាមធ្យមមានកុមារមកសម្រាកព្យាបាលប្រមាណ៣០នាក់ ហើយពេលខ្លះបានឡើងដល់៤៥នាក់ ប៉ុន្តែពេលខ្លះទូរលេខនេះបានថយវិញ ព្រោះមានកុមារដែលបានជាសះស្បើយចេញត្រឡប់ទៅផ្ទះវិញដូចនៅថ្ងៃទី២០ ខែកក្កដានេះនៅសល់តែ២១នាក់ទេ បន្ទាប់ពីថ្ងៃម្សល់ម៉ិញបានចេញអស់៨នាក់ទៅ។ កុមារមានជម្ងឺទាំងនេះភាគច្រើនមកពីស្រុកបរិបូរណ៌ ដែលមាននៅឃុំអញ្ចាញរូង ភូមិអណ្តូងរវាង ឃុំមេលំ និងមួយចំនួនមកពីភូមិស្រាំងខ្ពស់ ឃុំពង្រ ស្រុករលាប្អៀរ។ ប៉ុន្តែបើទោះបែបនេះក្តី លោកប្រធានមន្ទីពេទ្យខេត្ត ក៏នៅមិនទាន់ចាត់ទុកថាជំងឺ គ្រុនឈាមបានផ្ទុះឡើងគួរអោយព្រួយបារម្មណ៍នោះដែរ។
លោក ប្រធានមន្ទីរពេទ្យបាននិយាយអោយដឹងទៀតថា៖ កុមារមានជំងឺគ្រុនឈាមខ្លះ ឪពុកម្តាយ ទុកដល់ចង់ហួសពេល កូនដូចករណីកុមារីម្នាក់នៅភូមិស្រាំងខ្ពស់ដែលចូលសម្រាកក្នុងពេទ្យខេត្ត នៅ យប់ថ្ងៃទី១៩ ខែកក្កដាម្សិលម្ងៃនេះ បានទុកកូននៅក្នុងពេទ្យឯកជន៤ថ្ងៃ ដល់កូនក្អួតឈាមខ្លាំងទើប យកមកដល់ពេទ្យខេត្ត តែមកដល់ពេលនេះកុមារីរូបនោះបានធូរស្រាលហើយ។
ស្ត្រីឈ្មោះ ឆាំ ចន្ធី អាយុ៣៧ឆ្នាំ ដែលកំពុងកំដរកូនមានជំងឺជាមួយប្តីនៅក្នុងមន្ទីរពេទ្យខេត្តបាននិយាយអោយដឹងថា៖ គាត់មានទីលំនៅក្នុងភូមិស្រាំងខ្ពស់ ឃុំពង្រ ស្រុករលាប្អៀរ កូនស្រីគាត់បានសម្រាកជំងឺគ្រុនឈាមនៅពេទ្យឯកជន មិនគ្រាន់សោះ រហូតធ្លាក់ឈាមទើប គាត់នាំយកមកមន្ទីរពេទ្យខេត្ត ហើយគាត់បាននិយាយទៀតថា នៅក្នុងភូមិគាត់មានកុមារគ្រុនឈាមច្រើនណាស់ដែរ តែខ្លះបានទៅព្យាបាលនៅពេទ្យឯកជន ហើយខ្លះអាយុ៧០ឆ្នាំ ជាងហើយបានកើតជម្ងឺគ្រុនឈាមទៀត ដូចជាម្តាយមីងគាត់ឈ្មោះ ប្រាក់ យ៉ុន ជាដើម ខ្លះទៀតកម្លោះអាយុ២០ឆ្នាំជាងក៏កើតមានជំងឺគ្រុនឈាមដែរ។
លោកប្រធានមន្ទីពេទ្យខេត្តបាននិយាយបន្តថា៖ ក្រសួងសុខាភិបាលបានយកចិត្តទុកដាក់ខ្លាំងណាស់អំពីជំងឺគ្រុនឈាមនេះ ដែលនៅតាមបណ្តាមន្ទីរពេទ្យគ្រប់ខេត្ត ក្រុង ត្រូវរាយការណ៍បន្ទាន់បើសិនកើតមានផ្ទុះជំងឺគ្រុនឈាមច្រើន ហើយលោកក៏សូមអំពាវនាវអោយប្រជាពលរដ្ឋប្រុងប្រយ័ត្ន អោយបានខ្ពស់ចំពោះជម្ងឺគ្រុនឈាមដ៏កាចសាហាវនេះ ព្រោះពេលនេះជារដូវវស្សាធ្លាក់ភ្លៀងច្រើន ការកើតមូសខ្លាក៏មានច្រើន សូមអោយកូនចៅដេកក្នុងមុងទោះយប់ឬថ្ងៃក៏ដោយ និងត្រូវនាំគ្នាលប់បំបាត់ទឹកដក់និងកាប់ឆ្ការព្រៃក្បែរៗផ្ទះអោយអស់ ដែលជាប្រភពមូសខ្លាជ្រកនៅពងកូន៕ រិទ្ធិ ជ័យ
http://ift.tt/1DuwWlK
