សមត្ថកិច្ចបញ្ជូនខ្លួន ជនសង្ស័យ៥នាក់ ទៅតុលាការ ជាប់ចោទពីបទ ឆបោកប្រជាពលរដ្ឋ ក្នុងរឿងដីធ្លី ក្នុងស្រុកស្នួល
ខេត្តក្រចេះ៖ ជនសង្ស័យចំនួន៥នាក់ ត្រូវបានកម្លាំងនគរបាលការិយាល័យព្រហ្មប្រទណ្ឌកម្រិតស្រាល នៃស្នងការរដ្ឋាននរគបាលខេត្តក្រចេះបញ្ជូនខ្លួនទៅកាន់សាលាដំបូងខេត្តកាលពីព្រឹកថ្ងៃទី១២ ខែសីហានេះ ដោយជាប់ចោទពីបទឆបោកប្រជាពលរដ្ឋក្នុងរឿងដីធ្លីនៅស្រុកស្នួល ។
ជនសង្ស័យ ចំនួន៥នាក់ ត្រូវបានកម្លាំងអធិការដ្នាន នរគបាលស្រុកស្នួលឃាត់ខ្លួនពីបទករណីឆបោក និងករណីជ្រៀតជ្រែកដោយខុសច្បាប់ ក្នុងបំពេញមុខងារសាធារណៈនៅចំណុចគីឡូម៉ែត្រ១១៥ ភូមិជើងឃ្លេ ឃុំ២ធ្នូរ និងចំណុចត្រពាំងស្រែឃុំ២ធ្នូរ ស្រុកស្នួល ខេត្តក្រចេះ កាលពីទី១០ ខែសីហា ឆ្នាំ២០១៥។
សមត្ថកិច្ចបញ្ជាក់ថាជនសង្ស័យបានធ្វើសកម្មភាព កៀងគរនិងឆបោកដោយប្រមូលលុយពីប្រជាពល រដ្ឋប្រមាណជា៤០០នាក់ ក្នុងម្នាក់ចំនួន២ម៉ឺនរៀល ទៅ៥ម៉ឺនរៀល ដោយសន្យារត់ការសុំប័ណ្ណកាន់កាប់ ដីធ្លីពីប្រមុខរដ្ឋាភិបាលបែងចែកដីជូនប្រជាពលរដ្ឋនៅតំបន់នោះ ។
ជនសង្ស័យទាំង៥នាក់ មានទី១ឈ្មោះជឹមសំណាង ហៅ(គង់សុជាតិ) ជាមេខ្លោង ភេទប្រុស អាយុ៥៣ ឆ្នាំ ជនជាតិខ្មែររស់នៅភូមិតេជោ ឃុំស្រអែម ស្រុកជាំក្សាន ខេត្តព្រះវិហារ មុខរបរមិនពិតប្រាកដ,ទី២ ឈ្មោះ ស៊ីវ សុថន ភេទប្រុស អាយុ៣៣ឆ្នាំ ជនជាតិខ្មែររស់នៅភូមិអន្លង់ក្រមួន ឃុំស្រែឫស្សី ស្រុកថាឡាបរិវាត់ ខេត្តស្ទឹងត្រែង មុខរបរជាអ្នកសារពត៌មាន មរតកតេជោ, ទី៣ឈ្មោះ សៃ យ៉ង ភេទប្រុស អាយុ៥៥ឆ្នាំ ជនជាតិស្ទៀង រស់នៅភូមិត្រពាំងស្រែ ឃុំ២ធ្នូ ស្រុកស្នួល ខេត្តក្រចេះ, ទី៤ឈ្មោះ គី ហេម ភេទប្រុស អាយុ៤១ឆ្នាំ ជនជាតិស្ទៀង រស់នៅភូមិត្រពាំងស្រែឃុំ២ធ្នូ ស្រុកស្នួល, ទី៥ឈ្មោះ ខាត់ ឡិ ភេទប្រុស អាយុ៤១ឆ្នាំ ជនជាតិស្ទៀងរស់នៅភូមិត្រពាំងស្រែ។
បច្ចុប្បន្នជនសង្ស័យទាំង៥នាក់ ត្រូវបានកម្លាំងជំនាញនៃការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលបញ្ជូនខ្លួនទៅសាលាដំបូងខេត្តកាលពីព្រឹកម៉ិញនេះដើម្បីចាត់ការបន្តទៅតាមនិតិវិធីច្បាប់៕ រដ្ឋា
http://ift.tt/1PkyJ3L
