យុវជន២នាក់ត្រូវ PM ឃាត់ខ្លួនអប់រំ បន្ទាប់ពីជិះម៉ូតូកែឆ្នៃមានសម្លេងរំខាន
ខេត្តព្រះសីហនុ៖ យុវជន២នាក់ រួមជាមួយម៉ូតូកែឆ្នៃរំពងសម្លេងចំនួន២គ្រឿង ត្រូវបានកម្លាំង កងរាជអាវុធស្រុកព្រៃនប់ ប្រដេញចាប់បានកាលពីព្រឹកថ្ងៃទី២៨ ខែសីហា ឆ្នាំ២០១៥ វេលាម៉ោង០៩ និង១០នាទីនេះ បន្ទាប់ពីពួកគេជិះម៉ូតូរំពងសម្លេងតាមផ្លូវសារធារណៈបង្កការរំខានដល់ប្រជាពលរដ្ឋ និងភ្ញៀវទេសចរណ៍ជាតិ អន្តរជាតិ។
លោករវសេនីយ៍ត្រី ញ៉ែម ចំរើន មេបញ្ជាការកងរាជអាវុធស្រុកព្រៃនប់បាន អោយ ដឹងថា៖ នៅព្រឹកថ្ងៃទី២៨នេះកំលាំងរបស់លោកបានប្រដេញចាប់បានយុវជនទំនើងចំនួន២នាក់រួមជាមួយម៉ូតូកែឆ្នៃចំនួន២គ្រឿង យកមកណែនាំអប់រំ នូវការកែឆ្នៃម៉ូតូ ដែលខុស ពីលក្ខណៈបច្ចេកទេសដើមដោយកែតួ បំពង់ស៊ីម៉ាំង អោយមានសម្លេងខ្លាំង បង្កការរំខាន់ ដល់អ្នកជិតខាង។
មេបញ្ជាការបានបន្តថា៖ មុនការឈានដល់ការឃាត់ខ្លួននោះយុវជនទាំង២នាក់នេះបានជិះម៉ូតូចុះឡើងនៅតាមផ្លូវក្នុងភូមិ និងលើផ្លូវជាតិជាច្រើនលើកច្រើន រហូតមានពាក្យបណ្តឹងផ្ទាល់មាត់ពីប្រជាពលរដ្ឋ ស្នើអោយមន្ត្រីកងរាជអាវុធហត្ថ ឃាត់ខ្លួនយកមកអប់រំកែប្រែ បញ្ឈប់សកម្មភាពរំខានដល់អ្នកដ៏ទៃតទៅទៀត។
យុវជនទំនើងដែលបានឃាត់ខ្លួនយកមកអប់រំនោះមានឈ្មោះ ឃួន ចំរើន ភេទប្រុស អាយុ២៣ឆ្នាំ មានទីលំនៅ ភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ និងឈ្មោះ ឯក សុចង់ ភេទប្រុស អាយុ១៦ឆ្នាំ ជាសិស្សថ្នាក់ទី០៩ នៅវិទ្យាល័យ ហ៊ុន សែនវាលរេញ មានទីលំនៅដូចគ្នា។ ក្រោយពីឃាត់ខ្លួន សមត្ថកិច្ចតម្រូវឲ្យយុវជនទាំង២នាក់ ធ្វើកិច្ចសន្យាបញ្ឈប់សកម្មភាពកែច្នៃម៉ូតូ ដែលផ្ទុយពីទ្រង់ទ្រាយដើម៕ សមុទ្រខៀវ
http://ift.tt/1fKUEnP
