ឧកញ៉ា អាន ម៉ារឌី ល្បីល្បាញជាមេឈ្មួញកាប់ឈើនៅព្រៃឡង់ដឹកយកទៅលក់នៅវៀតណាមដោយប្រើប្រាស់ឥទ្ធពលថ្នាក់ដឹកនាំបន្លាចមន្ត្រីជំនាញតូចតាចម្នាក់ៗមិនហ៊ានក្អក
ខេត្តកំពង់ធំ៖ អង្គការសង្គមស៊ីវិលដែលអង្កេតករណីព្រៃឡង់បានលើកឡើងថា ក្រុមហ៊ុនដីសម្បទានសេដ្ឋកិច្ចឈ្មោះ អានម៉ារឌីគ្រុប របស់ឧកញ៉ា អាន ម៉ារឌី ត្រូវបានគេដឹងថា ទទួលបានដីសម្បទានសេដ្ឋកិច្ចទំហំរាប់ម៉ឺនហិកតានៅក្នុងស្រុកសណ្ដាន់ ខេត្តកំពង់ធំជាប់ព្រៃឡង់ សម្រាប់ដាំកៅស៊ូ។ ក៏ប៉ុន្តែជាក់ស្តែងក្រុមហ៊ុនរបស់ឧកញ៉ា អាន ម៉ារឌី ដាំកៅស៊ូបានតិចជាង៥០០ហិកតា។ ផ្ទុយទៅវិញក្រុមហ៊ុននេះបានប្រើប្រាស់រូបភាពដីសម្បទានសេដ្ឋកិច្ចដើម្បីកាប់ឈើ និងប្រមូលទិញឈើនៅក្នុងតំបន់ព្រៃឡង់ដឹកជញ្ជូនទៅលក់នៅប្រទេសវៀតណាមរាប់សិបឆ្នាំមកហើយ។ ឧកញ៉ារូបនេះតែងតែយកឥទ្ធពលថ្នាក់ដឹកនាំបន្លាចមន្ត្រីជំនាញតូចតាច និងប្រើប្រាស់លុយបានពីការលួចកាប់ឈើក្នុងព្រៃឡង់យកមកបិទមាត់បិទភ្នែកមន្ត្រីដែលមានភារកិច្ចបង្ក្រាបបានយ៉ាងមានប្រសទ្ធិភាព ដែលធ្វើឲ្យឧកញ៉ារូបនោះប្រព្រឹត្តការលួចកាប់ឈើក្រៅដីសម្បទានបានតាមអំពើចិត្ត។
បើតាមប្រភពពីមន្ត្រីដែលចូលរួមក្នុងប្រតិបត្តិការរបស់គណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ បានឲ្យដឹងថា នៅក្នុងដីសម្បទានរបស់ក្រុមហ៊ុនឧកញ៉ា អាន ម៉ារឌី មានរោងចក្រអារច្រៀកឈើចំនួន២កន្លែង ហើយក្នុងមួយថ្ងៃៗមានរថយន្តយីឌុបមិនតិចជាង២០គ្រឿងទេ ដែលចូលទៅដឹកឈើចេញពីរោងចក្រនោះយកទៅលក់គ្មានការត្រួតពិនិត្យត្រឹមត្រូវអំពីប្រភពឈើ ។ ជាក់ស្តែងនៅក្នុងបរិវេណដីសម្បទានសេដ្ឋកិច្ចរបស់ក្រុមហ៊ុនឧកញ៉ា អាន ម៉ារឌី ត្រូវបានគេរកឃើញស្តុកទុកឈើមិនប្រក្រតីជាច្រើន ។ ក្រុមហ៊ុនឧកញ៉ា អាន ម៉ារឌី មិនបានដាំកៅស៊ូដូចអ្វីដែលមានចែងក្នុងកិច្ចសន្យាជាមួយក្រសួងកសិកម្ម និងរាជរដ្ឋាភិបាលនោះទេ តែបែរជាធ្វើសកម្មភាពយ៉ាងគគ្រឹកគគ្រេងកាប់ឈើដឹកចេញពីព្រៃឡង់យកមកអារច្រៀកក្នុងរោងចក្ររបស់ខ្លួនយ៉ាងពេញទំហឹង ហើយដឹកជញ្ជូនចេញទៅលក់នៅវៀតណាមដោយគ្មានសមត្ថកិច្ចណាទប់ស្កាត់ឡើយ។
ប្រភពបានបន្តឲ្យដឹងទៀតថា ទីតាំងដីសម្បទានសេដ្ឋកិច្ចរបស់ឧកញ៉ា អាន ម៉ារឌី នៅក្នុងឃុំសណ្ដាន់ ស្រុកសណ្ដាន់ ខេត្តកំពង់ធំ ហើយកន្លងមកមានការដាក់ពង្រាយកម្លាំងប្រដាប់អាវុធយាមកានយ៉ាងតឹងតែងសូម្បីតែអ្នកសារព័ត៌មានក៏មិនអាចចូលបានទេ ដែលធ្វើឲ្យទីនោះក្លាយជាទឹកដីរបស់ស្តេចត្រាញ់អាន ម៉ារឌី ប្រព្រឹត្តសកម្មភាពបំផ្លាញព្រៃឈើតាមអំពើចិត្ត។ មហាជនគ្រប់មជ្ឈដ្ឋានបានអំពាវនាវដល់ នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ជាប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសព្រៃឈើ គណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ គួរបើកការស៊ើបអង្កេតជាបន្ទាន់ ព្រោះឧកញ៉ា អាន ម៉ារឌី កាប់ឈើដឹកជញ្ជូនធ្វើអាជីវកម្មខុសច្បាប់ជាយូរមកហើយ មិនដែលមានការទប់ស្កាត់ ឬបង្ក្រាបម្តងណាឡើយ បើមិនចាត់ការទេ ព្រៃឡង់ នឹងរលាយក្រោមដៃ ឧកញ៉ា អាន ម៉ារឌី បន្លំកាប់រលាយហិនហោចជាក់ជាមិនខាន៕ កញ្ញា សុភាព
http://ift.tt/1S3nHTw
