បើករថយន្តជែងមិនផុតបុកម៉ូតូពីក្រោយប៉ើងបណ្តាលឲ្យបុរសម្នាក់ស្លាប់
ខេត្តកំពង់ឆ្នាំង៖ បុរសម្នាក់បានស្លាប់នៅនឹងកន្លែងកើតហេតុភ្លាម ដោយសាររថយន្តហាយឡិនឌ័រ១គ្រឿងបើកជែងមិនផុតបុកម៉ូតូគាត់ពីក្រោយពេញទំហឹង។ ករណីគ្រោះថ្នាក់ចរាចរណ៍នេះបានកើតឡើងនៅម៉ោង១ និង៣០នាទីរសៀល ថ្ងៃទី២៤ ខែមករា ឆ្នាំ២០១៦ នៅលើផ្លូវជាតិលេខ៥ចន្លោះគីឡូម៉ែត្រ លេខ៧៧ និង៧៨ ស្ថិតក្នុង ភូមិព្រៃខ្មែរ ឃុំរលាប្អៀរ ស្រុករលាប្អៀរ ខេត្តកំពង់ឆ្នាំង។
សមត្ថកិច្ចនគរបាលចរាចរណ៍ស្រុករលាប្អៀរបាននិយាយអោយដឹងថា៖ បុរសរងគ្រោះមានខាងលើ ឈ្មោះ តយ ចន្ទី អាយុ៤៧ឆ្នាំ មានទីលំនៅភូមិចារថ្មី ឃុំអណ្តូងស្នាយ ស្រុករលាប្អៀរ។ មុនពេលកើតហេតុជនរងគ្រោះបានជិះម៉ូតូម៉ាក ហុងដា សេ១២៥ ក្នុងទិសដៅពីជើងទៅត្បូង តាមបណ្តោយផ្លូវជាតិ ៥លុះមកដល់ចំណុចកើតហេតុស្រាប់តែមានរថយន្តមួយគ្រឿងម៉ាក ហាយឡិនឌ័រ ពណ៌ទឹកប្រាក់ពាក់ ស្លាកលេខ ភ្នំពេញ 2W-0975 បានបើកបរក្នុងល្បឿនយ៉ាងលឿន មកពីក្រោយ បំណងបើកជែង វ៉ាម៉ូតូ ជនរងគ្រោះ តែវ៉ាមិនរួចព្រោះ មានរថយន្តមកពីមុខ ក៏បានរ៉េចង្កូតមកវិញ ជ្រុលទៅបុកម៉ូតូជនគ្រោះ ពីក្រោយពេញទំហឹង បណ្តាលអោយបុរសរងគ្រោះហោះប៉ើងធ្លាក់លើកាបូរថយន្ត បោកផ្ទប់កញ្ជក់មុខ រថយន្តទើបប៉ើងធ្លាក់មកដី ស្លាប់ភ្លាមៗនៅនឹងកន្លែងកើតហេតុតែម្តង ។
សមត្ថកិច្ចបានបញ្ចាក់អោយដឹងថា៖ ក្រោយពេលបង្កហេតុ អ្នកបើកបររថយន្តបានរត់ គេចខ្លួន បាត់ ដោយទុករថយន្តចោលនៅកន្លែងកើតហេតុ មិនអាចបើកបរទៅមុខបាន។ ក្រោយពេលធ្វើការវាស់ វែងប្លង់កើតហេតុតាមនិតិវិធីរួចមក សមត្ថកិច្ចក៏បានប្រគល់សពជនរងគ្រោះ ទៅអោយក្រុមគ្រួសារធ្វើ បុណ្យតាមប្រពៃណី។
ចំណែកមធ្យោបាយគ្រោះថ្នាក់ទាំង២គ្រឿងត្រូវបានសមត្ថកិច្ចដឹកយកមករក្សារទុកនៅអធិការដ្ឋាននគរបាលស្រុករលាប្អៀរ ដើម្បីរង់ចាំការដោះស្រាយតាមផ្លូវច្បាប់។ករណីគ្រោះថ្នាក់នេះត្រូវបានសមត្ថ កិច្ចស្និដ្ឋានថា៖ បណ្តាលមកពីអ្នកបើកបររថយន្តបើកក្នុងល្បឿនលឿនស្ថិតក្នុងស្ថានភាពគ្រោះថ្នាក់នៅ ពេលជែងវ៉ាមិនផុត ក៏បុកម៉ូតូជនងរងគ្រោះបណ្តាលអោយស្លាប់តែម្តង។
ច្បាប់ស្តីពីចរាចរណ៍ផ្លូវគោក មាត្រា៨៥ បានចែងថា៖ ជនណាបើកបរដោយធ្វេសប្រហែស ខ្ជីខ្ជាមិនប្រុងប្រយត្ន័ ឬមិនគោរពកាតព្វកិច្ចដែលបទប្បញ្ញត្តិស្តីពីចរាចរណ៍ផ្លូវគោក បណ្តាលឲ្យអ្នកដ៏ទៃ ស្លាប់ត្រូវផ្តន្ទាទោសដាក់ពន្ធនាគារពី ១ឆ្នាំទៅ៣ឆ្នាំ និងត្រូវពិន័យជាប្រាក់ពី៤លានរៀល ទៅ១០លានរៀល។ ចំណុចឃ រត់គេចពីកន្លែងកើតហេតុក្នុងគោលបំណងគេចវេសពីការទទួលខុសត្រូវ ត្រូវដាក់ពន្ធនាគារពី២ឆ្នាំ ទៅ៥ឆ្នាំ និងពិន័យជាប្រាក់ពី១០លានរៀល ទៅ២៥លានរៀល ៕ រិទ្ធិ ជ័យ
http://ift.tt/1S9Z4q1
