អ្នកបើករថយន្តកុងតៃនឺទំនងស្រវឹងស្រាបើកបណ្តើរប្រឡែងគ្នាបណ្តើរបានរេចង្កូតទៅបុកតូបប៉ះកង់រថយន្តមួយកន្លែងបង្កឲ្យមនុស្សម្នាក់របួសធ្ងន់ និងខូចម៉ូតូ១គ្រឿង
ខេត្តព្រះសីហនុ៖ អ្នកបើករថយន្តកុងតៃនឺទំនងស្រវឹងស្រាមានគ្នា៣នាក់ប្រុសពីរស្រីមួយ បើកបណ្តើរស្រែកឡូឡាបណ្តើរបានរេចង្កូតទៅបុកតូបប៉ះកង់រថយន្តមួយកន្លែងរងការខូចខាតស្ទើរទាំងស្រុង និងបង្កឲ្យមនុស្សម្នាក់រងរបួសធ្ងន់ ខូចខាតម៉ូតូ១គ្រឿង។ ហេតុការណ៍នេះបានកើតឡើងកាលពីវេលាម៉ោង ១៦ និង៤០នាទី ថ្ងៃទី០៣ ខែមករា ឆ្នាំ២០១៥ នៅលើផ្លូវជាតិលេខ៤ ត្រង់ចំណុច មុខរោងចក្រស្រាបៀរអង្គរ ស្ថិតក្នុងភូមិ១ សង្កាត់១ ក្រុង/ខេត្តព្រះសីហនុ។
យោងតាមប្រភពវរសេនីយ៍ឯក អ៊ី សុខា ស្នងការរងទទួលបន្ទុកលសណ្តាប់ធ្នាប់ បានប្រាប់ឲ្យដឹងថា នៅវេលាម៉ោង និងទីកន្លែងកើតហេតុខាងលើ មានករណីគ្រោះថ្នាក់ចរា ចរណ៍មួយកើតឡើង បង្កដោយរថយន្តម៉ាកអាមេរិកកាំង (ក្បាលសណ្តោងកុងតឺន័រ) ពណ៌ស ស្លាកលេខ ព្រះសីហនុ 3A-1193 ក្រុមហ៊ុន KKS។ បន្ទាប់ពីកើតហេតុអ្នកបើកបរបានរត់គេចខ្លួន តែចាប់បានព្រូឡានម្នាក់។ រតថយន្តបើកបរក្នុងទិសពីលិចទៅកើត ចេញពីម្តុំកំពង់ផែ ឆ្ពោះទៅភ្នំពេញ លុះមកដល់កន្លែងកើតហេតុ ក៏បានរេចង្កូចទៅឆ្វេងដៃទៅបុកកន្លែងជួសជុលរថយន្ត បណ្តាលឲ្យមនុស្សកំពុងដេកក្នុងតូបប៉ះកង់ឡានម្នាក់ ឈ្មោះ លី រ័ត្ន ភេទប្រុស អាយុ ៣១ឆ្នាំ មុខរបរបើកបរ មានទីលំនៅ សង្កាត់២ ក្រុងខេត្តព្រះសីហនុ របួសធ្ងន់ និងបានបញ្ជូនទៅព្យាបាលនៅ គ្លីនិចរស្មីកំពង់សោម និងបុកម៉ូតូ 0១គ្រឿងទៀតម៉ាកMOVពណ៌ស ស្លាក លេខព្រះសីហនុ1C-5946 ខូចខាតធ្ងន់។
ដោយឡែកយោងតាមប្រភពពីសាក្សីឃើញហេតុការណ៍បានអះអាងថា ចំពោះមូល ហេតុដែលឈានដល់ការបង្កគ្រោះថ្នាក់ចរាចរណ៍នោះគេឃើញនៅក្នុងរថយន្តបង្កមានមនុស្ស៣នាក់ ស្រីម្នាក់ និងប្រុស០២នាក់(ដោះអាវទាំងពីរនាក់) ក្នុងស្ថានភាពដូចជាស្រវឹង បានបើករថយន្តបណ្តើរស្រែកឡូឡាបណ្តើរ រហូតមកដល់ចំណុចកើតហេតុក៏ស្រាប់តែរេចង្កូតមកខាងឆ្វេង បុកកន្លែងជួសជុលរថយន្ត បង្កគ្រោះថ្នាក់មួយរំពេច ។ដូចនេះក្នុងនាមប្រជាពលរដ្ឋ សូមស្នើយ៉ាងទទូចដល់សមត្ថកិច្ចចរាចរណ៍មេត្តា រឹងបន្តឹងច្បាប់ចរាចរណ៍ដោយផ្តោតទៅលើ តៃកុងរថយន្តកុងតៃនឺផង ព្រោះករណីគ្រោះថ្នាក់ចរាចណ៍ស្ទើរពាក់កណ្តាល បង្កឡើងដោយរថយន្តកុងតៃនេះឯង។ រថយន្ត និង ម៉ូតូ ខូតខាតកំរិតធ្ងន់បាន យកទៅ រក្សា ទុកនៅការិយាល័យចរាចរណ៍ផ្លូវគោកខេត្តព្រះសីហនុរង់ចាំដោះស្រាយនៅពេលក្រោយ៕ សមុទ្រខៀវ
http://ift.tt/1PHFuNL
