ផឹកស្រាស្រវឹងទៅកាយយកកាំភ្លើងពីក្នុងដីមកបាញ់មេឃសំដែងឫទ្ធិបារមី ត្រូវប៉ូលិសចាប់វ៉ៃខ្នោះ
ខេត្តមណ្ឌលគិរី៖ បុរសម្នាក់ត្រូវបានសមត្ថកិច្ចឃាត់ខ្លួន មកសាកសួរនៅអធិការដ្ឋាននគរបាលស្រុកកែវសីមា ក្រោយពីរូបគេស្រវឹងស្រាក្នុងថ្ងៃបុណ្យចូលឆ្នាំចិនទី២ ដោយសារតែចង់សម្ញែងឫកដាក់គេបានយកកាំភ្លើងដែលខ្លួនលាក់ទុកតាំងពីយូរមកហើយ សល់តាំងពីជំនាន់សង្គ្រាម មកបាញ់មេឃអស់ជាច្រើនគ្រាប់ នៅចំណុចអូរប៉ាម ភូមិស្រែអំពិល ឃុំស្រែខ្ទុម ស្រុកកែវសីមាផ្អើលពេញភូមិ ហើយត្រូវបានឃាត់ខ្លួននាវេលាម៉ោង១១ និង៣០នាទីព្រឹកថ្ងៃទី៨ កុម្ភៈ ២០១៦។
សមត្ថកិច្ចបានឲ្យដឹងថា បុរសដែលបានយកកាំភ្លើងទៅបាញ់មេឃបង្កការភ័យខ្លាច និងរភ្ញាក់ផ្អើលនោះមានឈ្មោះ សេង វណ្ណា អាយុ៣១ឆ្នាំ មានស្រុកកំណើតភូមិកកោះ ឃុំមាន ស្រុកព្រៃឈរ ខេត្តកំពង់ចាម បច្ចុប្បន្នស្នាក់នៅភូមិឃុំកន្លែងកើតហេតុ។ សមត្ថកិច្ចបានបន្តថា កាំភ្លើងដែលដកហូតបានពីជនល្មើស ម៉ាកអាកាស្វាយបត់១ដើម បង់ចំនួនមួយ និងគ្រាប់ចំនួន៩គ្រាប់។
បើតាមចម្លើសារភាពពីជនល្មើសនិយាយថា កាំភ្លើងនោះខ្លួនបានទទួលពីឈ្មោះ ថាន់ រស់ នៅភូមិស្រែអំពិល ហើយកាំភ្លើងនោះ គេបានលាក់ទុកជាយូរណាស់មកហើយ ហើយនៅថ្ងៃកើតហេតុដោយសារតែ ខ្លួនស្រវឹងស្រាទើបទៅយកមកបាញ់លេង ។ សមត្ថកិច្ចកំពុងកសាងសំណុំរឿងបញ្ជូនជនបាញ់បោះសេរីទៅស្នងការដ្ឋាននគរបាលខេត្ត ដើម្បីចាត់ការតាមនិតិវិធីច្បាប់។ចំណែកម្ចាស់កាំភ្លើងដែលមានឈ្មោះ ថាន់ សមត្ថកិច្ចកំពុងស្រាវជ្រាវ ដើម្បីចាត់ការតាម ច្បាប់ផងដែរ ៕ សែនមនោរម្យ
http://ift.tt/1KbaOpy
