ជនសង្ស័យម្នាក់ជាមួយថ្នាំញៀន១កញ្ចប់ម៉ូតូ២គ្រឿងត្រូវនគរបាលចាប់បញ្ជូនទៅតុលាការ
ខេត្តកំពង់ឆ្នាំង ៖ ជនសង្ស័យពាក់ព័ន្ធនឹងគ្រឿងញៀនម្នាក់ក្នុងចំណោមគូកន ៣នាក់ ត្រូវបាន គរបាលក្រុង និងខេត្តព័ទ្ធចាប់ឃាត់ខ្លួនបាន នៅវេលាម៉ោង ១១ និង៤៥នាទីព្រឹក ថ្ងៃទី១៧ ខែកក្កដា ឆ្នាំ២០១៦ នៅភូមិត្រពាំបី សង្កាត់ផ្សារឆ្នាំង ក្រុងកំពង់ឆ្នាំង ខណៈដែលរូបគេ និងគូកន កំពុងធ្វើការចែកចាយ និងប្រើប្រាស់គ្រឿងញៀន។
លោក វរសេនីយ៍ត្រី ឆាយ ខេមរ័ត្ន អធិការនគរបាលក្រុងកំពង់ឆ្នាំង បាននិយាយអោយដឹងថា៖ ជនសង្ស័យខាងលើមានឈ្មោះ ចេង ចាន់មុនី អាយុ២៨ឆ្នាំ មានទីលំនៅភូមិទី១ សង្កាត់ខ្សាម ក្រុងកំពង់ឆ្នាំង ។ មុនពេលចាប់ឃាត់ខ្លួន សមត្ថកិច្ចបានទទួលព័ត៌មានពីប្រជាពលរដ្ឋល្អរាយការណ៍ថា មានការចែកចាយនិងប្រើប្រាស់ថ្នាំញៀន នៅផ្ទះឈ្មោះ គង់ សុគន្ឋា ភេទប្រុស អាយុ៣៥ឆ្នាំ មានទីលំនៅភូមិត្រពាំងបី ។
ក្នុងពេលនោះកម្លាំងនគរបាលក្រុងកំពង់ឆ្នាំងសហការជាមួយ នគរបាលប្រឆាំងគ្រឿងញៀន ខេត្ត នាំគ្នាឡោមព័ទ្ធចាប់បានជនសង្ស័យរូបនេះនៅចំណុចកើតហេតុខាងលើ តែជនសង្ស័យជាគូកន ២នាក់ទៀតដឹងខ្លួនបានរត់គេចអស់ ។ នៅក្នុងកិច្ចបង្ក្រាបនេះសមត្ថកិច្ចដកវហូតបានរួមមាន ថ្នាំញៀនម៉ាទឹកកក១កញ្ចប់ ម៉ូតូ២គ្រឿង កាំបិត២ដើម និងឧបករណ៍ សម្រាប់ប្រើប្រាស់គ្រឿងញៀន មួយចំនួនទៀត ។
ជនសង្ស័យខាងលើរួមជាមួយវត្ថុតាងត្រូវបានសមត្ថកិច្ចជំនាញការិយាល័យនគរបាលប្រឆាំងគ្រឿងញៀននៃស្នងការដ្ឋាននគរបាលខេត្តកំពង់ឆ្នាំងបានកសាងសំណុំរឿងតាមនិតិវិធី បញ្ជូនខ្លួនទៅតុលាការខេត្ត ៕ រិទ្ធិ ជ័យ
http://ift.tt/29Ucq9e
