បើករថយន្តលឿនដូចព្រួញរេទៅបុកម៉ូតូកំពុងធ្វើដំណើរបញ្ច្រាសទិសគ្នាចំប៉ើងដូចសី ស្លាប់៣នាក់របួសធ្ងន់៦នាក់ ទាំងក្បាលព្រលប់
ខេត្តបាត់ដំបង៖ មនុស្ស៣នាក់ស្លាប់ភ្លាមៗ និង៦នាក់ផ្សេងទៀតរងរបួសធ្ងន់ នៅក្នុងហេតុការគ្រោះថ្នាក់ចរាចរណ៍ មួយ ដោយសាររថយន្ត១គ្រឿងបើកបរក្នុងល្បឿនលឿនបានរេចង្កូត ទៅបុកម៉ូតូក្នុងទិសដៅបញ្ច្រាសគ្នាចំពេញទំហឹង ប៉ើងដូចសីធ្លាក់ចេញពីផ្លូវទាំងម៉ូតូនិងអ្នកជិះ ចំណែករថយន្តនោះបានហោះធ្លាក់ផ្លូវក្រឡាប់ចូលជង្ហុក។
ហេតុការណ៍នេះបានកើតឡើងកាលពីវេលាម៉ោង៦ល្ងាចថ្ងៃទី១០ ខែសីហា ឆ្នាំ២០១៦ ស្ថិតនៅក្រុម៣ ភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង។
នគរបាលស្រុកសំឡូតបានឲ្យដឹងថា ជនរងគ្រោះដែលស្លាប់នោះមានឈ្មោះទី១-ឈ្មោះ រស់ សុឃា ភេទស្រី អាយុ២៤ឆ្នាំ មុខរបរកសិករ ជាអ្នកបើកបរម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ បាត់ដំបង 1R-3254 , ទី២- ឈ្មោះហ៊ីង សុទីន ភេទស្រី អាយុ២៣ឆ្នាំ មុខរបរធ្វើចម្ការនិងទី៣-ឈ្មោះ អេន សុរ៉ា ភេទស្រី អាយុ៣ឆ្នាំនៅក្នុងបន្ទុក ឪពុកម្ដាយ (អ្នកទាំង៣នាក់ស្លាប់) រស់នៅភូមិ-ឃុំកើតហេតុខាងលើ។
នគរបាលស្រុកសំឡូតបានបញ្ជាក់ឲ្យដឹងថា នៅមុនពេលកើតហេតុគេឃើញរថយន្តមួយគ្រឿងម៉ាកតូយូតា មួយ បាំងកន្លះ ពណ៌ស ពាក់ស្លាកលេខ ភ្នំពេញ AE-0700 អ្នកបើកបរមានឈ្មោះ ស្នា ភេទប្រុស អាយុ២៧ឆ្នាំ រស់នៅស្រុកម៉ោងឫស្សី ខេត្តបាត់ដំបង។ រថយន្តបើកបរ បញ្ច្រាសទិសគ្នាពីទៅកើតទៅលិចក្នុងល្បឿនលឿន ហើយផ្លូវទើបតែចាក់ដី មានទាបនិងមានខ្ពស់ ក៏រអិលរេចង្កូតជ្រុលទៅបុកម៉ូតូកំពុងធ្វើដំណើរដែរនោះចំពេញទំហឹងបណ្ដាលឲ្យមនុស្សប្រុសស្រី៦នាក់រងរបួសធ្ងន់ និង៣នាក់ស្លាប់ភ្លាមៗនៅនឹកកន្លែងកើតហេតុ ។
នគរបាលស្រុកសំឡូតបានឲ្យដឹងថា បានបន្តថាមនុស្ស៦នាក់ដែលរងរបួសធ្ងន់នោះត្រូវ បានរថយន្តដឹកបញ្ជូនទៅព្យាបាលមន្ទីរពេទ្យខេត្តបាត់ដំបង។ ចំណែករថយន្ត និងម៉ូតូ សមត្ថកិច្ចបានយកទៅរក្សាទុកនៅអធិការស្រុកសំឡូត ។ ដោយឡែកសាកសពទាំង៣នាក់ត្រូវបានសមត្ថកិច្ចនគរបាលស្រុកសំឡូត ប្រគល់ជូនក្រុមគ្រួសារយកទៅធ្វើបុណ្យ ៕
http://ift.tt/2baKYGp
