លោក នង សុខុម មេ​គយ​ច្រក​បាវិត​នៅតែ​បន្ត​ឃុបឃិត​ជាមួយ​មេ​ឈ្មួញ​ធំៗ​បង្ហើប​ឲ្យ​មានការ​រត់ពន្ធ​ទំនិញ​ពី​វៀតណាម​ដោយ​ចាត់ទុក​គោល​ការ​កំណែទម្រង់​គយ​គ្មាន​ន័យ​

ខេត្តស្វាយរៀង ៖ បើទោះជាអគ្គនាយកដ្ឋានគយអនុវត្តរដ្ឋបាលកំណែទម្រង់ផ្លាស់ប្តូរលោក យឹង សំអនប្រធានការិយាល័យគយ និងរដ្ឋាករ ក្រុងបាវិតដាក់ជំនួសលោក នង សុខុម រយៈពេលជិតមួយឆ្នាំទៅហើយ ដើម្បីពង្រឹង និងរឹតបន្តឹងការប្រមូលពន្ធឲ្យមានប្រសិទ្ធិភាពលុបបំបាត់អំពើពុករលួយដែលជាបង្អែក នៃការរត់ពន្ធទំនិញនោះ ជាលទ្ធផលគេមិនដែលឃើញលោក នង សុខុម បញ្ចេញស្នាដៃដឹកនាំមន្ត្រីថ្នាក់ក្រោមបង្ក្រាបទំនិញគេចពន្ធនៅឡើយទេ ខណៈទំនិញខុសច្បាប់ ទំនិញបង់ពន្ធមិនគ្រប់ ត្រូវក្រុមឈ្មួញកំពុងតែដឹកជញ្ជូនពីប្រទេសវៀតណាមចូលប្រទេសកម្ពុជា តាមច្រកអន្តរជាតិបាវិត ចេត្តស្វាយរៀងយ៉ាងគគ្រឹកគគ្រេងបានដោយរលូន ដែលធ្វើឲ្យមានការសង្ស័យថា ទម្រង់នៃការប្រព្រឹត្តពុករលួយជំនាន់លោក យឹង សំអន ត្រូវបានលោក នង សុខុម រក្សាទុកអនុវត្ត ដែលផ្ទុយពីការប្តេជ្ញាចិត្តក្នុងថ្ងៃប្រកាសចូលកាន់មុខតំណែង កាលពីថ្ងៃទី២៤ ខែកក្កដា ឆ្នាំ២០១៥នោះ។

មន្ត្រីតូចតាចប្រចាំច្រកអន្តរជាតិបាវិតបានបង្ហើបថា លោក នង សុខុម ប្រធានការិយាល័យគយ និងរដ្ឋាករ ប្រចាំច្រកបាវិត បានក្លាយជាអ្នកបោះមេ ចែកផលប្រយោជន៍ដល់សមត្ថកិច្ចពាក់ព័ន្ធ មានរួមដៃគ្នាប្រព្រឹត្តអំពើជាប្រព័ន្ធ ដែលក្រុមមេឈ្មួញពឹងផ្អែកជាខ្នងបង្អែក ក្នុងការរត់ពន្ធទំនិញ ដឹកតាមរថយន្តធុនធំ និងបង្កប់ទំនិញគេចពន្ធតាមរថយន្តក្រុង ដឹកអ្នកទេសចរណ៍ ដោយគ្មានការបង់ពន្ធជូនរដ្ឋ។ ប្រភពបានបញ្ជាក់ថា រថយន្តក្រុងដឹកអ្នកដំណើរ ដែលចេញចូល តាមច្រកអន្តរជាតិបាវិតរាល់ថ្ងៃ ដែលមានបង្កប់ទំនិញគេចពន្ធ ក្នុងមួយគ្រឿងៗ ត្រូវរត់ការបង់លុយមិនក្រោម៥លាន រៀលទេ ក្នុងមួយថ្ងៃៗរម្រាប់តែ រថយន្តក្រុងឆ្លងកាត់ច្រកមិនតិចជាថ៥០គ្រឿងនោះទេ។ ដូច្នេះតែករណីរថយន្តក្រុងបង្កប់ទំនិញនេះ រដ្ឋ បានបាត់ចំណូលក្នុងមួយថ្ងៃប្រមាណ៥ម៉ឺនដុល្លារទៅហើយ។ ករណីនេះប្រសិនបើលោក នង សុខុម អនុវត្តការប្រមូលពន្ធត្រឹមត្រូវ នោះចំណូលថវិកា និងមានកំណើនលើសពីសព្វថ្ងៃ។

ប្រភពបង្ហើបទៀតថា ច្រកអន្ដរជាតិបាវិត ទំនិញនាំចូលពីប្រទេសវៀតណាម ដែលក្រុមឈ្មួញនាំចូល ដោយគេចពន្ធ ឬបង់ពន្ធមិនគ្រប់ មានចំនួនច្រើនឥតគណនា ធ្វើឲ្យខាតបង់ ចំណូលថវិកាជាតិ ច្រើនសន្ធឹកសន្ធាប់ ហើយលោក នង សុខុម ទំនងជាបានទទួលប្រាក់សូកប៉ាន់ពីក្រុមឈ្មួញ រកស៊ីដឹកទំនិញគេចពន្ធ ទើបមិនដែលធ្វើការបង្ក្រាប។ ជាក់ស្តែងឈ្មួញដែលមានទំនាក់ទំនងល្អជាមួយលោក នង សុខុម បាន ដឹកទំនិញប្រភេទ គ្រឿងសំណង់ និងទំនិញចម្រុះ នាំចូលពីប្រទេសវៀតណាមតាមអំពើចិត្តដោយប្រើប្រាស់ រថយន្តប្រភេទយីឌុបឆ្លងកាត់ម្តងៗពុំដែលត្រួតពិនិត្យត្រឹមត្រូវនោះទេ។ ក្រៅតែពីភាពមិនប្រក្រតីរឿងឃុបឃិតការរត់ពន្ធទំនិញនោះ មានការលើកឡើងថា ការរត់ឯកសារនាំទំនិញចូលត្រូវចំណាយយ៉ាងតិច១ឯកសារ ១៥០ដុល្លាទៅ១៧០ដុល្លា ហើយតាមការត្រួតពិនិត្យឯកសារមានកំហុសតិចតួចចៀងវាងខាតពេលរត់មកកែតម្រូវនៅអគ្គនាយកដ្ឋានគយឡើងវិញត្រូវបង់៣០០ដុល្លា ទៅ៥០០ដុល្លាជាការជួយសម្រួល៕

KA-04-08-2016-01