មន្ទីរសាធារណការខេត្ត កំពុងស្តារប្រឡាយ និងលូជាង៥ពាន់ម៉ែត្រ ដើម្បីការពារផ្លូវថ្នល់កុំអោយខូចដោយសារទឹកលិច
ខេត្តកំពង់ឆ្នាំង៖ ប្រឡាយទឹក និងប្រឡាយដាក់លូជាង៥ពាន់ម៉ែត្រ នៅក្នុងក្រុងកំពង់ឆ្នាំង និងស្រុកបរិបូណ៌ ត្រូវបានមន្ទីរសាធារណការ និងដឹកជញ្ជូនខេត្ត កំពុងជិកស្តារ និងដាក់លូទឹកជាបន្តបន្ទាប់ ដើម្បីបញ្ជៀសការរងផលប៉ះពាល់នាំអោយខូចខាតផ្លូវថ្នល់ក្នុងក្រុង ផ្លូវជាតិលេខ៥ និងតាមបណ្តារផ្លូវមួយចំនួនផ្សេងទៀត។ទន្ទឹមនឹងការស្តារប្រព័ន្ធប្រឡាយ និងការដាក់លូទាំងនេះ ទាល់តែមានការចូលរួមសហការថែរក្សា ការពារពីអាជ្ញាធរមូលដ្ឋាន និងប្រជាពលរដ្ឋនៅតាមដងផ្លូវថ្នល់ ទើបផ្លូវថ្នល់អាចគង់វង្សប្រើប្រាស់បានយូរអង្វែង។
នៅរសៀលថ្ងៃទី៣១ ខែកក្កដា ឆ្នាំ២០១៧នេះ លោក កែវ ពៅ ប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំងបានបញ្ជាក់អោយដឹងថា៖ ក្នុងឆ្នាំ២០១៧នេះ មន្ទីរសាធារណការ និងដឹកជញ្ជូនខេត្ត បានចេញធ្វើយុទ្ធនាការរំដោះផ្លូវថ្នល់ចេញពីការជន់លិច និងដក់ទឹកភ្លៀងបានប្រមាណជាង៥ពាន់ម៉ែត្រ ក្នុងនោះមាននៅក្នុងក្រុងកំពង់ឆ្នាំង សង្កាត់ខ្សាម សង្កាត់កំពង់ឆ្នាំងតាមបណ្តោយផ្លូវជាតិលេខ៥ ទាំងជីកស្តារប្រឡាយ និងទាំងដាក់លូថ្មីសរុបបានប្រវែង៨៥០ម៉ែត្រ, នៅតាមបណ្តោយផ្លូវជាតិលេខ៥៣ ជីកស្តារប្រឡាយ និងដាក់លូបានប្រវែង១ពាន់ម៉ែត្រ, ផ្លូវលេខ៥០ស្តារប្រឡាយសងខាងផ្លូវប្រវែង៣ពាន់ម៉ែត្រ, និងស្រុកបរិបូណ៌ទាំងស្តារប្រឡាយ ទាំងដាក់លូបានប្រវែង៣៨៨ម៉ែត្រ។
លោកបានបន្តថា៖ ដើម្បីអោយផ្លូវថ្នល់គ្រប់ទីកន្លែងមានគុណភាពប្រើប្រាស់បានយូរ ទាល់តែមានការចូលរួមពីអាជ្ញាធរមូលដ្ឋាន និងបងប្អូនប្រជាពលរដ្ឋដែលរស់នៅតាមសងខាងដងផ្លូវទាំងអស់ចូលរួមសហការផងដែរ ដោយពួកគាត់មិនត្រូវសាងសង់របង ឬសំណង់មកលើដីចំណីផ្លូវ កុំចាក់ដីលុបប្រព័ន្ធប្រឡាយ ឬលូបង្ហូរទឹកភ្លៀង និងរាល់ការចាក់ដី ឬសាងសង់សំណង់តាមបណ្តោយផ្លូវត្រូវសុំច្បាប់អាជ្ញាធរ និងជំនាញជៀសវាងការសាងសង់ទៅធ្វើអោយស្ទះចរន្តទឹកហូរ លិចផ្លូវ និងខូចខាតផ្លូវថ្នល់។
អាជ្ញាធរក្រុងកំពង់ឆ្នាំងក៍បានសំណូមពរដល់ប្រជាពលរដ្ឋ ក៍ដូចជាអាជ្ញាធរភូមិសង្កាត់ ត្រូវចូលរួមសហការអោយបានល្អជាមួយការិយាល័យជំនាញ ឬមន្ទីរសាធារណការ និងដឹកជញ្ជូនខេត្ត ដោយកុំសាងសង់សំណង់លើដីចំណីផ្លូវ កុំចាក់ដីខ្ពស់ជាងផ្លូវ ការដាក់លូរបស់ប្រជាពលរដ្ឋត្រូចសុំច្បាប់ ដើម្បីកុំអោយមានបញ្ហាទៅថ្ងៃក្រោយ។ អាជ្ញាធរមូលដ្ឋានត្រូវយកចិត្តទុកដាក់ពន្យល់ណែនាំ ឬហាមប្រាមប្រជាពលរដ្ឋ អោយយល់ពីផលប៉ះពាល់នៃការសាងសង់សំណង់ ឬរបង គឺកុំអោយប៉ះពាល់មកលើដីចំណីផ្លូវតទៅទៀត៕ រឹទ្ធិ ជ័យ
http://ift.tt/2uSDzlD
