អាសូរខ្មែរ! ចិនបើករថយន្តគៀរហើយទាមទារសំណងថែមទៀត ព្រោះអាងមានអ្នកកាងពីក្រោយ

ខេត្តព្រះសីហនុ៖ បើទោះបីជាករណីគ្រោះថ្នាក់ចរាចរណ៏ដ៏តូចមួយ នាយប់ថ្ងៃទី២៧ ខែកក្កដា ឆ្នាំ២០១៧ ត្រង់ចំនុចក្បែរស្តុបពាណិជ្ជកម្ម រវាងជនជាតិខ្មែរ និង ជនជាតិចិន ត្រូវបានបញ្ចប់យ៉ាងណាក្តី ប៉ុន្តែត្រូវបានរងការរិះគន់ពីសាក្សីដែលបានឃើញហេតុការណ៏ផ្ទាល់ថា វាពិតជាអយុត្តិធម៏បំផុតសម្រាប់ជនជាតិខ្មែរ ខណៈពេលដែលរថយន្តជនជាតិចិន បើកគៀរថយន្តខ្មែរហើយបែរជាទាមទាសំណងពីខ្មែរទៀត។

ជុំវិញទិដ្ឋភាពស្ទើតែមិនគួរអោយជឿនោះ ត្រូវបានក្រុមមហាជនដែលបានធ្វើដំណើរឆ្លងកាត់ តាមចំនុចកើតហេតុ ហើយបានឃើញហេតុការណ៏ផ្ទាល់បានលាន់មាត់ថា តើវាយុត្តិធម៏ទេ សម្រាប់ជនរងគ្រោះ(នេះមិនគិតពីជាតិសាសន៏ទេ) ខណៈពេលរថយន្តបង្កបើកគៀបង្កការខូចខាតរថយន្តហើយ បែរជាចុះឡូឡា ទាមទាសំណង បន្ទាប់ពីពួកគេ(ជនជាតិចិន) បានទូរស័ព្ទហៅសមត្ថកិច្ចមកអន្តរាគមន៏ក្នុងរឿងរបស់ពួកគេដោយពួកគេបានបង្វែរឿងថា រថយន្តខ្មែរជាអ្នកបើករថយន្តមកបុកគូទពីក្រោយទៅវិញ។ ឯសមត្ថកិច្ចជំនាញ បានត្រឹមរងចាំសម្របសម្រួល ពុំហ៊ានធ្វើអ្វីលើសពីដែនកំណត់ ព្រោះតែមានអ្នកអន្តរាគមន៏នៅក្បែរ។

ដោយឡែក យោងតាមប្រភពអ្នកធ្វើដំណើរពីក្រោយរថយន្តបង្កម្នាក់ បានឈប់មើលហេតុការណ៏ បានបញ្ចេញទស្សនៈថា បើខ្មែរមិនស្រលាញ់ខ្មែរ យកលុយជាធំ សុខចិត្តធ្វើគរ ធ្វើខ្វាក់យកខុសជាត្រូវបែបនេះ នៅថ្ងៃខាងមុខមិនដឹងទៅជាយ៉ាងណានោះទេ ព្រោះទិដ្ឋភាពគ្រោះថ្នាក់នេះរូបគាត់បានឃើញច្បាស់ណាស់ ព្រោះម៉ូតូរបស់គាត់បើកនៅពីក្រោយរថយន្តជនជាតិចិន ដែលជាម្ចាស់ហាងលក់វត្ថុអនុស្សាវរីយ៏ក្បែរកន្លែងកើតហេតុ។ ប្រភពដដែលបានបញ្ជាក់បន្ថែមមុនជិះម៉ូតូចេញទៅថា នៅមុនកើតហេតុរូបគាត់បានឃើញរថយន្តម៉ាកកាមរីស្លាមពណ៏ស្ករ ពាក់ស្លាកលេខ ព្រះសីហនុ 2A 2718 បើកបរបុរសចំណាស់ម្នាក់ ក្នុងល្បឿនយឺតៗ ខណះពេលមកដល់ចំនុចកើតហេតុស្រាប់តែមានរថយន្ត សេរីទំនើបពណ៏ស ពាក់ស្លាកលេខភ្នំពេញ 2AM 0452បើកបរដោយជនជាតិចិនបើកវ៉ាឆ្វេងរថយន្តជនជាតិខ្មែរ ប៉ុន្តែគ្រាន់តែវ៉ាបានបន្តិច ស្រាប់តែរថយន្តពណ៏សនោះ បានងាកមកស្តាំវិញ គៀរថយន្តស្លាម ធ្វើអោយកាងរថយន្តចិនផ្នែកខាងក្រោយ ទាក់ជាមួយកងរថយន្តស្លាមផ្នែកខាងឆ្វេងធ្លាក់ដល់ផ្លូវ។ ប៉ុន្តែគួរអោយហួសចិត្តបំផុតនោះ នៅពេលដែលភាគីទាំងពីរចុះមើលរថយន្តបែរជាជនជាតិចិន ស្រែកឡូឡា ទាមទាសំណងទៅវិញ ខណះពេលម្ចាស់ឡានស្លាម ជនជាតិខ្មែរជាជនរងគ្រោះ មិនចង់វែងឆ្ងាយសុខចិត្តបញ្ចប់រឿងនៅនឹងកន្លែង រហូតសមត្ថកិច្ចជំនាញមកដល់ ក៏នៅតែទាមទាដ៏ដែល ដោយអស់ជំរើស ម្ចាស់រថយន្តឆ្លាមទុកអោយច្បាប់ជាអ្នកកំណត់ ដោយឡើងជិះរថយន្តមិត្តភ័ត្រចេញទៅបាត់ ទើបជនជាតិចិនសុខចិត្តបញ្ចប់រឿង ដោយពុំព្រមអោយសមត្ថកិច្ចយករថយន្តទៅការិយាល័យចរាចរណ៏នោះទេ ឯ ភាគីខ្មែរក៏សុខចិត្តបញ្ចប់រឿងទាំងបង្ខំ ព្រោះមិនចង់វែងឆ្ងាយ ព្រោះរថយន្តពុំមានការខូចខាតធ្ងន់ធ្ងរ។

គួរបញ្ជាក់ផងដែរថានៅមួយរយះចុងក្រោយនេះ នៅក្នុងខេត្តព្រះសីហនុ គេសង្កេតឃើញមានវត្តមានជនជាតិយ៉ាងច្រើនកុះករ ហើយមានជនជាតិចិនមួយចំនួន ដែលមានលុយហូរហៀរបានជួលរថយន្តសេរីទំនើប ពីអ្នកមានអំណាច រហូតដល់ជួលរថយន្តស្លាកលេខ ខ ម, ន.ប ជិះថែមទៀតផង លើសពីនេះទៀតក៏មានជនជាតិចិនមួយចំនួនទៀត តែងតែបើកបរ ក្នុងស្ថានភាពគ្រោះថ្នាក់ បើកបរក្នុងល្បឿនលឿន បើកបរក្នុងស្ថានភាពស្រវឹង បង្ករគ្រោះថ្នាក់ជាញឹកញ៉ាប់ បណ្តាលអោយមានអ្នកស្លាប់ នឹងរបួសមួយចំនួនផងដែរ៕ ទន់ សុខ