រថយន្តទូរីសសដឹកផ្លែឈើធ្ងន់ពេកបែកកង់មុខបុកក្លោងទ្វារការិយាល័យក្សេត្រសាស្ត្របាក់បែកខ្ទេចខ្ទីអ្នកបើករថយន្តរបួសស្រាល
ខេត្តកំពង់ឆ្នាំង៖ អ្នកបើកបររថយន្តម្នាក់រងរបួសស្រាល ក្នុងរណីរថយន្តទូរីសដឹកផ្លែឈើលើសទម្ងន់១គ្រឿង បានផ្ទុះកង់មុខទៅបុកក្លោងទ្វារការិយាល័យក្សេត្រសាស្ត្រមន្ទីរកសិកម្មខេត្តបាក់បែកខ្ទេចខ្ទី។ ហេតុការណ៍នេះបានកើតឡើងនៅម៉ោង៤និង៤៥នាទី ទាបភ្លឺព្រឹកថ្ងៃទី០៣ ខែកក្កដា ឆ្នាំ២០១៧ លើផ្លូវជាតិលេខ៥ ស្ថិតនៅក្នុងភូមិដំណាក់ពពូល ស ង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបានអោយដឹងថា៖ រថយន្តបង្កហេតុខាងលើនេះប្រភេទទូរីស ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 2Y 4205 បើកបរដោយឈ្មោះ ហួរ សួរ អាយុ៤១ឆ្នាំ រស់នៅក្នុងភូមិអូរចារ ឃុំអូរចារ ក្រុងបាត់ដំបង ខេត្តបាត់ដំបង។
មុនពេលកើតហេតុរថយន្តនេះបានដឹកផ្លែឈើយ៉ាងច្រើនលើសទម្ងន់ផ្ទុករបស់រយន្ត ដោយផ្ទុកក្នុងរថយន្តផង លើដំបូលផង និងតកន្ទុយផ្ទុកផ្លែឈើបន្ថែមទៀតផង ពីស្រុកឡែម ខេត្តបាត់ដំបង ទៅកាន់ទីក្រុងភ្នំពេញ។ លុះបើកបរមកដល់ចំណុចកើតហេតុ កង់មុខខាងឆ្វេងក៍បានផ្ទុះបែក បណ្តាលអោយរថយន្តរេចង្កូតទៅខាងឆ្វេងដៃ បុកក្លោងទ្វារការិ យាល័យក្សេ ត្រសាស្ត្រនៃមន្ទីរកសិកម្មខេត្ត រលំបែកបាក់ខ្ទេចខ្ទី ចំណែករថយន្តបានខូចខាតផ្នែកខាងមុខធ្ងន់ធ្ងរ រីឯអ្នកបើកបររយន្តបានរងរបួសស្រាល សំរាកព្យាបាលរបួសនៅក្នុងមន្ទីរពេទ្យបង្អែកខេត្តកំពង់ឆ្នាំង។ អ្នកបើកបររថយន្តបាននិយាយអោយដឹងថា៖ នៅពេលមានគ្រោះថ្នាក់ មានមនុស្សម្នារមកមើលច្រើន ហើយក៏មានអ្នកលួចយកកាបូបលុយដែលទុកក្នុងរថយន្ត បាត់លុយអស់៦៣ម៉ឺនរៀល។
រថយន្តនេះបង្កហេតុខាងលើនេះ ត្រូវបានសមត្ថកិច្ចស្ទូចយកមករក្សាទុកនៅក្នុងអធិការដ្ឋាននគរបាលក្រុងកំពង់ឆ្នាំង ដើម្បីទុកអោយម្ចាស់រថយន្តដោះស្រាយសងការខូចខាតជូនការិយាល័យក្សេត្រសាស្ត្រមន្ទីរកសិកម្មខេត្ត និងត្រូវធ្វើផាកពិន័យតាមផ្លូវច្បាប់ ហើយតម្រូវអោយម្ចាស់ដោះកន្ទុយរថយន្តដែលតខុសច្បាប់ចេញ ទើបសមត្ថកិច្ចប្រគល់រថយន្តអោយម្ចាស់យកទៅប្រកបអាជីវកម្មវិញ។
ករណីគ្រោះថ្នាក់ខាងលើនេះ សមត្ថកិច្ចបានបញ្ជា្កក់ថា៖ បណ្តាលមកពីការផ្ទុកផ្លែឈើលើសទម្ងន់ ហើយពេលបែកកង់មុខរថយន្តធ្ងន់ពេកមិនអាចគ្រប់គ្រងសភាពការណ៍បានទើបបង្កអោយមានគ្រោះថ្នាក់ដូចខាងលើតែម្តង៕ ( ឈៀង ថារិទ្ធ )
http://ift.tt/2t7pfWU
