​ជនល្មើស​ឈ្មោះ ជៀប តឿ​ង លួច​កាប់​ដើម​ធ្នង់​ក្នុងព្រៃ​សហគមន៍​ត្រូវ​សមត្ថកិច្ច​ចាប់ខ្លួន​កសាង​សំណុំរឿង​បញ្ជូនទៅ​តុលាការ​តាម​បញ្ជារ​លោក​អភិបាលខេត្ត​

ខេត្តកំពង់ឆ្នាំង៖ ជនល្មើសឈ្មោះ ជៀប តឿង ដែលទាក់ទងក្នុងរឿងលួចកាប់ដើមធ្នង់នៅក្នុងព្រៃសហគមន៍ នៅក្នុងឃុំពោធិ ស្រុកកំពង់លែង ក្នុងពេលថ្មីៗនេះ និងធ្លាប់មានសំណុំរឿងបទល្មើសព្រៃឈើ២ផ្សេងទៀតក្នុងឆ្នាំកន្លងមក នៅព្រឹកថ្ងៃទី១៣ ខែកក្កដា ឆ្នាំ២០១៧ នេះត្រូវបានសមត្ថកិច្ចនគរបាលប្រឆាំងបទល្មើសសេដ្ឋកិច្ចខេត្ត ចាប់ឃាត់ខ្លួនតាមបញ្ជារឯកឧត្តមអភិបាលខេត្តប្រគល់អោយខណ្ឌ័រដ្ឋបាលព្រៃឈើកំពង់ឆ្នាំង កសាងសំណុំរឿងតាមនិតិវិធីបញ្ជូនទៅតុលាការផ្តន្ទាទោសតាមផ្លូវច្បាប់។

សមត្ថកិច្ចខណ្ឌ័រដ្ឋបាលព្រៃឈើកំពង់ឆ្នាំងបានអោយដឹងថា៖ តាមសេចក្តីរាយការណ៍របស់សហគមន៍ព្រៃឈើពោធិជ្រកជម្រកឬទ្ធីសែន និងរបាយការណ៍របស់សមត្ថកិច្ចនគរបាលស្រុកកំពង់លែង អោយដឹងថា៖ លោក ជៀប តឿង ជាម្ចាស់សិប្បកម្មមួយកន្លែង រស់នៅក្នុងភូមិកង្កែប ឃុំច្រណូក ស្រុកកំពង់លែងនិងបក្ខពួក៤នាក់ផ្សេងទៀត នៅយប់ថ្ងៃទី០៦ ខែកក្កដា ឆ្នាំ២០១៧ បាននាំគ្នាចូលលួចកាប់ដើមធ្នង់នៅក្នុងព្រៃសហគមន៍ ក្នុងឃុំពោធិ នៅក្នុងពេលនោះដែរកម្លាំងសហគមន៍ មន្ត្រីនគរបាលប៉ុស្តិ និងអាជ្ញាធរឃុំពោធិ បានចុះទៅបង្ក្រាបទាន់ពេលវេលា ដោយរឹបអូសបានគោយន្តកន្ត្រៃមួយគ្រឿង រណាយន្តមួយគ្រឿង និងឈើធ្នង់១ដើមដែលពួកគេបានកាប់រំលំថ្មីៗ ចំណែកជនល្មើសចំនួន៥នាក់បានគេចខ្លួនបាត់ ក្នុងនោះក៏មានឈ្មោះ ជៀប តឿង ផងដែរ។ ដោយឡែកនៅព្រឹកថ្ងៃទី០៧ ខែកក្កដា ឈ្មោះ ជៀ ប តឿងជាអ្នកក្លាហានបានទៅឡូឡារករឿងនគរបាលប៉ុស្តិ និងសហគមន៍ព្រៃឈើទៀតផង ។

សមត្ថកិច្ចបានអោយដឹងទៀតថា៖ ជនសង្ស័យឈ្មោះ ជៀប តឿង ក្រៅពីសំណុំរឿងថ្មីខាងលើនេះ គឺនៅមានសំណុំរឿងបទល្មើសព្រៃឈើចាស់ក្នុងឆ្នាំ២០១៦ ចំនួន២រឿងទៀតនៅក្នុងដៃតុលាការខេត្ត គឺសំណុំរឿងទី១បានដឹកឈើប្រណឹតមួយកាណូតគ្មានច្បាប់អនុញ្ញាត ត្រូវសមត្ថកិច្ចចាប់បាននៅចាប់បាននៅដើមពោធិផ្សារក្រោម ក្រុងកំពង់ឆ្នាំង សំណុំរឿងទី២គឺគេបានលួចកាប់ដើមធ្នង់ចំនួន២៣ដើមនៅក្នុងព្រៃសហគមន៍ ក្នុងអំឡុងខែភ្ជុំបិណ្ឌឆ្នាំ២០១៦ ដែលតុលាការមិនទាន់ចាត់ការ និងសំណុំរឿងទី៣ គឺការលួចកាប់ដើមធ្នង់ក្នុងព្រៃសហគមន៍ កាលពីយប់ថ្ងៃទី០៦ ខែកក្កដា ថ្មីៗនេះ។

ទាក់ទងនិងសំណុំរឿងទី៣នេះ សមត្ថកិច្ចខណ្ឌ័រដ្ឋបាលព្រៃឈើបានបញ្ជាក់អោយដឹងថា៖ ជនសង្ស័យឈ្មោះ ជៀប តឿង នឹងត្រូវសមត្ថកិច្ចកសាងសំណុំរឿងបញ្ជូនទៅតុលាការ ដោយចោទប្រកាន់តាមមាត្រា៩៨ នៃច្បាប់ស្តីពីព្រៃឈើ ដែលត្រូវផ្តន្ទាទោសដាក់ពន្ធនាគារពី១ឆ្នាំ ទៅ៥ឆ្នាំ និងត្រូវផាកពិន័យប្រាក់ពី១០លានរៀល ទៅ១០០លានរៀល ហើយត្រូវផាកពិន័យប្រាក់តាមមាត្រា៩៦បន្ថែមទៀត។

គួរបញ្ជាក់ថា៖ សំណុំរឿងទី១ និងទី២ រសប់ឈ្មោះជៀប តឿង សមត្ថកិច្ចរដ្ឋបាលព្រៃឈើបានកសាងសំណុំរឿងតាមនិថិវិធីបញ្ជូនទៅតុលាការខេត្តជាយូរខែមកហើយ ប៉ុន្តែមិនត្រូវបានតុលាការជំនុំជំរះផ្តន្ទាទោសជនសង្ស័យឡើយ ទើបជនសង្ស័យបានចិត្តលួចកាប់ដើមធ្នង់ក្នុងព្រៃសហគមន៍បន្តទៀត។ ដោយឡែកក្រោយពីជនសង្ស័យបានបង្ករឿងជាលើទី៣ ទើបអ្នកកាសែតនិងទូរទស្សន៍នៅក្នុងស្រុកបានធ្វើការរិះគន់តុលាការខេត្តផ្ទួនៗគ្នា ធ្វើអោយឯកឧត្តមអភិបាលខេត្តដឹងរឿងពីមុន និងមានប្រតិកម្មបញ្ជារអោយសមត្ថនគរបាលចាប់ខ្លួនជនល្មើស ប្រគល់អោយមន្ត្រីជំនាញកសាងសំណុំរឿងលើកទី៣បញ្ជូនទៅតុលាការបន្ថែមទៀត។ ដោយខេត្តត្រូវតាមដានមើលថា តើតុលាការខេត្តចាត់ការជនល្មើសរូបនេះតាមផ្លូវច្បាប់ដែរឬអត់ ឬក៏មិនព្រមចំណាត់ការដូចសំណុំរឿងទាំង២ពីមុនទៀត៕ ( ឈៀង ថារិទ្ធ )