អគ្គនាយកដ្ឋាន​គយ​គួរ​បើក​ការស៊ើបអង្កេត លោក វ៉ូ វណ្ណា មេ​គយ​ខេត្តកណ្តាល ដែល​កំពុង​បណ្តែតបណ្តោយ​ឲ្យ​មាន​ទំនិញគេចពន្ធ​ហូរ​ចូល​ពី​វៀតណាម​យ៉ាង​អនាធិបតេយ្យ !

ខេត្តកណ្តាល ៖ បើទោះជាសម្តេចតេជោ សែនបានចេញអនុក្រឹត្យ តែងតាំងសមាសភាព បង្ក្រាប និងទប់ស្កាត់ អំពើរត់ពន្ធខុសច្បាប់ ដោយមាន រដ្ឋមន្ត្រីក្រសួងសេដ្ឋកិច្ច ជាប្រធាន អគ្គនាយកគយនិងរដ្ឋការ ជាអនុប្រធានអចិន្ត្រៃយ៍ហើយ ប្រធានសាខាគយ នៅតាមខេត្ត ក៏មានតួនាទីជា អនុប្រធានអចិន្ត្រៃយ៍ នៅតាមមូលដ្ឋាននីមួយៗ សំដៅធ្វើការងារ ឲ្យមានប្រសិទ្ធភាព ក្នុងការប្រមូលពន្ធជូនរដ្ឋ។ ប៉ុន្តែក្រុមអ្នកតាមដាន កំណែទម្រង់គយ បានលើកឡើងថា វិធានការនេះ មិនសូវមានប្រសិទ្ធភាពនោះទេ ប្រសិនបើគ្មានការ ផ្លាស់ប្តូរតំណែង ឬបោសសំអាតអំពើពុករលួយចំពោះមន្ត្រីគយមួយចំនួនទៀតនៅក្នុងប្រទេស ដែលគ្មានឆន្ទៈ ក្នុងការអនុវត្តន៍ កំណែទម្រង់ស៊ីជម្រៅ ដោយសារតែភាពលោភលន់ពុករលួយ បានធ្វើឲ្យ វិធានការប្រឆាំងអំពើរត់ពន្ធទំនិញមិនសូវមានប្រសិទ្ធភាព ។

ជាក់ស្តែងលោក វ៉ូ វណ្ណា ដែលកំពុងកាន់តំណែង ជាប្រធានសាខាគយខេត្តកណ្តាល កំពុងតែជាប់ទាក់ទិនជាមួយ និងរឿងប្រព្រឹត្តអំពើពុករលួយ ក្នុងការឃុបឃិតបើកដៃឲ្យមាន អំពើរត់ពន្ធទំនិញខុសច្បាប់ គ្រឿងសំណង់ ទំនិញចាប់ហួយ គ្រឿងអេឡិកត្រូនិក ថ្នាំពេទ្យ សម្ភារៈប្រប្រាស់ក្នុងផ្ទះ តុ ទូ កៅអី (ជ័រ ដែក) ហូរចូលតាមច្រកជ្រៃធំ និងសម្ងំកើបលុយ ពីការហូរចូលទំនិញ បង់ពន្ធមិនគ្រប់ របស់ក្រុមឧត្តមសេនីយ៍មួយចំនួន នាំឲ្យខាតបង់ ចំណូលថវិកាជាតិ មិនតែប៉ុណ្ណោះលោក វ៉ូ វណ្ណា ថែមទាំងផ្គើនបទបញ្ជារបស់សម្តេចតេជោសែនទៀតផង។ តាមការសង្កេតជារួម គេមិនដែលឃើញមន្ត្រីគយក្រោមបញ្ជារបស់លោក វ៉ូ វណ្ណា ចេញបង្ក្រាបការដឹកជញ្ជូន ទំនិញខុសច្បាប់ ឬទំនិញបង់ពន្ធមិនគ្រប់ដែលដឹកជញ្ជូនតាមផ្លូវទឹក និងផ្លូវគោកតាមច្រជ្រៃធំ ម្តងណាឡើយ ចាប់តាំងពីពេលដែលលោក វ៉ូ វណ្ណា ផ្លាស់ពីមេគយច្រកត្រពាំងថ្លុង ត្រូវបានតែងតាំងជា ប្រធានសាខាគយ ប្រចាំខេត្តកណ្តាល បើទោះបីជាសកម្មភាព រត់ពន្ធទំនិញខុសច្បាប់កើតឡើង យ៉ាងអនាធិបតេយ្យក៏ដោយ។

របស់លោក វ៉ូ វណ្ណា គ្មានឆន្ទៈក្នុងការបង្ក្រាប ការដឹកជញ្ជូនទំនិញខុសច្បាប់ ហើយមិនគួរណាលោក គុណ ញឹម អគ្គនាយកគយ មើលរំលងពីភាពអសកម្ម របស់លោក វ៉ូ វណ្ណា នោះទេ ។ មន្ត្រីគយមួយចំនួន បានបង្ហើបឲ្យដឹងថា ការសម្ងំកើបលុយ យ៉ាងស្ងៀមស្ងាត់បែបនេះ អាចធ្វើឲ្យលោក វ៉ូ វណ្ណា មានលុយឡើងខាប់ដូចទឹកគ្រឿង ។ លោក វ៉ូ វណ្ណា មុនពេលពេលតែងតាំងជា ប្រធានសាខាគយ ប្រចាំខេត្តកណ្តាល គាត់មានបទពិសោធន៍ ក្នុងការសម្រួល ឲ្យឈ្មួញរត់ពន្ធ ទំនិញខុសច្បាប់ តាំងពីនៅធ្វើជា ប្រធានការិយាល័យគយ ប្រចាំច្រកត្រពាំងផ្លុង ដែលនៅទីនោះ ឈ្មួញទាំងតូចទាំងធំ ត្រូវឱនលំទោន សុំការយោគយល់ និងបង់លុយឲ្យលោក វ៉ូ វណ្ណា ជាហូរហែ។

មានការបញ្ជាក់ថា ការដឹកជញ្ជូនទំនិញ គ្រប់ប្រភេទ មកពីតាមច្រកព្រំដែន សំដៅចូលមកចំណុចចុងទី គឺឃ្លាំងស្តុកទំនិញ របស់ឈ្មួញធំៗ នៅក្នុងរាជធានីភ្នំពេញ ដើម្បីលក់ចែកចាយ ទៅតាមទីផ្សារ និងកន្លែងបោះដុំផ្សេងៗទៀត ត្រូវឆ្លងកាត់ខេត្តកណ្តាល ហើយក្នុងតួនាទីជា ប្រធានសាខាគយ ខេត្តកណ្តាល លោក វ៉ូ វណ្ណា កំពុងសុខស្រួល ក្នុងការចាត់តាំង មន្ត្រីក្រោមឱវាទ ឲ្យប្រមូលលុយ ពីក្រុមឈ្មួញ ទាំងការដឹកជញ្ជូន ទំនិញស្របច្បាប់ និងទំនិញបង់ពន្ធមិនគ្រប់ ពោលគឺ គ្រប់ច្រកគ្រប់ដង្ហើម គ្រប់ទូរស័ព្ទរោទ៍ សុទ្ធតែពាក់ព័ន្ធ នឹងបញ្ហាផលប្រយោជន៍ ដែល លោក វ៉ូ វណ្ណា អាចប្រមូលយកទៅ ធ្វើមានធ្វើបានផ្ទាល់ខ្លួន។ ពាក់ព័ន្ធនិងជុំវិញករណីខាងលើនេះគេមិនដែលឃើញអង្គភាពប្រឆាំងអំពើពុករលួយដែលដឹកនាំដោយលោក ឧិម យិនទៀងចាត់មន្ត្រីរបស់ខ្លួនឲ្យបើកការស៊ើបអង្កេតនោះទេដើម្បីយកលោក វ៉ូ វណ្ណា មកផ្តន្ទាទោសតាមផ្លូវច្បាប់៕ ចៃមាត់ច្រក