បុរសម្នាក់ ត្រូវជនដៃដល់វាយរយះក្បាលចំនួន៨ កន្លែងស្លាប់ក្នុងថ្លុកឈាម ដ៏សែនវេទនា គេសង្ស័យជារឿងគំនុំ
ខេត្តកំពង់ឆ្នាំង៖ បុរសម្នាក់ត្រូវបានក្រុមជនដៃដល់វាយរយះក្បាលជាច្រើនកន្លែង ស្លាប់ដ៏សែនវេទនានៅរោងចាំស្រូវក្នុងស្រែ ដែលករណីនេះបានកើតឡើងនៅវេលាម៉ោងប្រមាណជា១១យប់ថ្ងៃទី២៦ ខែធ្នូ ឆ្នាំ២០១៤នៅចំណុចមាត់បឹងក្រោម ស្ថិតក្នុងភូមិចាន់គៀក ឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង។
លោកអធិការនគរបាលស្រុកកំពង់ត្រឡាចបាននិយាយអោយដឹងថា៖ ជនរងគ្រោះមានឈ្មោះ ឯល ទួន អាយុ៦១ឆ្នាំ ជនជាតិខ្មែរឥស្លាម មានប្រពន្ធឈ្មោះម៉ម ម៉ាស់ អាយុ៥៩ឆ្នាំ រស់នៅក្នុងភូមិឃុំខាងលើមានមុខរបធ្វើស្រែតែពុំមានកូនម្នាក់នោះឡើយ។ នៅមុនពេលកើតហេតុជនរងគ្រោះបានបើកលុយបាន៨ម៉ឺនរៀល ថ្លៃជួយធ្វើការងារអោយឃុំ ហើយមកផឹកស៊ីនៅផ្ទះឈ្មោះ យ៉ា រួចបានបន្តទៅផឹកនៅផ្ទះឈ្មោះ ទ័រ សានី ទៀតរហូតដល់ម៉ោង៩យប់ ពេលស្រវឹងដើរមិនរួចក៍ត្រូវឈ្មោះ ទ័រ សានី ដែលត្រូវជាក្មួយឌុបតាមម៉ូតូមកអោយដេកនៅរោងចាំស្រូវរបស់គាត់ដោយទុកកង់របស់គាត់នៅផ្ទះរបស់ខ្លួន។
លុះនៅព្រឹកឡើងថ្ងៃទី២៧ ខែធ្នូ ឆ្នាំ២០១៤ ប្រជាពលរដ្ឋទៅដើរទៅធ្វើស្រែប្រាំងបានប្រទះឃើញជន រងគ្រោះដេកស្លាប់នៅជាប់និងផ្លូវដើរក្បែររោងចាំស្រែ ដោយនៅលើខ្លួនប្រាណជនរគ្រោះមានឈាមប្រឡាក់ពេញខ្លួន ហើយភាពភ្ញាក់ផ្អើលក៏កើតមានឡើងដឹងដល់សមត្ថកិច្ច។
នៅព្រឹកនោះដែរសមត្ថកិច្ចនគរបាលព្រហ្មទ័ណ្ឌស្រុក និងសមត្ថកិច្ចនគរបាលបច្ចេកទ្ទេសរបស់ស្នងការនគរបាលខេត្តបានសហការគ្នាចុះពិនិត្យជុំវិញកន្លែងកើតហេតុ និងពិនិត្យសាកសព រកឃើញស្នាមវាយ ដោយ ឈើចុងស្រួចនៅលើខ្លួនជនរងគ្រោះមានចំនួន៨កន្លែងគឺ៖លើកណ្តាលក្បាល៣កន្លែង លើក្បាលផ្នែកខាង ឆ្វេង ៤កន្លែងនិងលើផ្នែកខាងស្តាំ១កន្លែង និងស្នាមវាយជាំលើផ្ទៃមុខជាច្រើនកន្លែងទៀត។ នៅកន្លែងកើត ហេតុក្នុងរោងចាំស្រូវរបស់ជនរងគ្រោះសមត្ថកិច្ចរកឃើញឈើមូលចុងស្រួច១ដើមប្រវែង៤តឹកប្រឡាក់សុទ្ធតែឈាមដែលជាដំបងវាយសម្លាប់ជនរងគ្រោះ បើគេប្រើកាំបិតកាប់វិញគឺនៅលើមុខរបួសពិតជាមានដាច់សក់។
ប្រជាពលរដ្ឋនៅក្នុងភូមិដែលបានទៅមើលហេតុការណ៍នេះបាននិយាយអោយដឹងថា៖ជនរងគ្រោះជារៀងរាល់ឆ្នាំតែងមកដេកចាំស្រូវនៅក្នុងរោងនេះជាប្រចាំ និងដាក់លបចងស្ទូចត្រី រកត្រីដោះស្រាយក្នុងជីវភាព គ្រួសារ ហើយជនរងគ្រោះមិនដែលមានទំនាស់អ្វីជាមួយអ្នកជិតខាងក្នុងភូមិនោះឡើយ។
សមត្ថកិច្ចបានធ្វើការសន្និដ្ឋានជំហានដំបូងថា៖ ករណីមនុស្សឃាដនេះ អាចជារឿងគំនុំទើបជនដៃដល់កាប់ សម្លាប់ជនរងគ្រោះយ៉ាងសាហាវបែបនេះ។ក្រោយពីធ្វើការពិនិត្យសពតាមបច្ចេកទេសរួចមកសមត្ថកិច្ចបានប្រគល់សពអោយក្រុមគ្រួសារយកទៅធ្វើបុណ្យតាមប្រពៃណី។ ករណីឃាដកម្មនេះសមត្ថកិច្ចកំពុងធ្វើការស្រាវជ្រាវរកមុខសញ្ញាក្រុមជនដល់យ៉ាងសកម្ម ដើម្បីស្វែងចាប់ជនល្មើសយកមកផ្តន្ទាទោសតាមផ្លូវច្បាប់៕ ដោយ រិទ្ធិ ជ័យ
