រថយន្តធន់ធ្ងន់បើកលឿនស្ទើរហោះ ជ្រុលទៅបុកក្មេងប្រុស២នាក់កំពុងជិះម៉ូតូប៉ើងបោកផ្ទប់នឹងថ្នល់ស្លាប់ដេកគរលើគ្នាយ៉ាងអាណោចអាធ័ម
ខេត្តកណ្ដាល៖ យុវជន២នាក់ កំពុងជិះម៉ូតូ ម៉ាកហុងដាC១២៥ ឌុបគ្នាលើផ្លូវជាតិលេខ៥ ត្រូវរថយន្តធន់ធ្ងន់ម៉ាក FUSO ធ្វើដំណើរស្របទិសគ្នា ពីជើងទៅត្បូង បុកពីក្រោយពេញទំហឹង ប៉ើងទាំងម៉ូតូទាំងមនុស្សជាច្រើនម៉ែត្រ បណ្តាលឲ្យស្លាប់ដេកគរពីលើគ្នាយ៉ាងរន្ធត់ កាលពីរសៀលម៉ោង១៦ និង២០នាទី ថ្ងៃទី៣១ ខែមករា ឆ្នាំ២០១៥ នៅចំណុចផ្លូវជាតិលេខ៥ ចន្លោះគីឡូម៉ែត្រ២៦-២៧ភូមិពញឮ ឃុំពញាឮ ស្រុកពញាឭ ខេត្តកណ្ដាល។
សមត្ថកិច្ចបានឲ្យដឹងថា៖ នៅវេលាម៉ោងថ្ងៃខែឆ្នាំខាងលើកករណីគ្រោះថ្នាក់ចរាចរណ៍នេះបានបង្កដោយរថយន្តម៉ាក FUSO ពាក់ស្លាកលេខ 3B-6054 ពណ៌ខៀវ លាយស បើកបរទិសដៅស្របទិសគ្នាពីជើងទៅត្បូង លុះដល់ ចំណុចកើតហេតុរថយន្តមានល្បឿនលឿនពេក ក៍ជ្រុលទៅបុក ម៉ូតូម៉ាក ហុងដា C១២៥ពណ៌ខ្មៅ មានស្លាកលេខ កណ្តាល 1Q-4579 ពីក្រោយពេញទំហឹងធ្វើឲ្យអ្នកបើកបរម៉ូតូ និងអ្នករួមដំណើរស្លាប់នៅកន្លែងកើតហេតុ ហើយម៉ូតូ បានខូចខាតទាំងស្រុង។ ចំណែកអ្នកបើកបររថយន្តឃើញសភាពមិនស្រួលបានចុះពីលើរថយន្តរត់គេចខ្លួនបាត់។
សមត្ថកិច្ចបន្តឲ្យដឹងថា៖ ជនរងគ្រោះ១-ឈ្មោះ ហ៊ុន វីរៈ ភេទប្រុស អាយុ២៤ឆ្នាំ នៅភូមិកំពង់អុស ឃុំកំពង់អុស ស្រុកពញាឮ(ស្លាប់) ។ ២-ឈ្មោះគីម សុគន្ធ ភេទប្រុសអាយុ១៧ឆ្នាំ ភូមិកំពង់អុសឃុំកំពង់អុសស្រុកពញឮ ជាអ្នក រួមដំណើរ(ស្លាប់ )។ សាកសពជនរងគ្រោះទាំងពីរ សមត្ថកិច្ចបាន ប្រគល់ ជូនក្រុមគ្រួសារយកទៅធ្វើបុណ្យតាមប្រពៃណី ។ ចំណែករថយន្តបង្ក និងម៉ូតូសមត្ថកិច្ចបានយកមករក្សាទុកនៅអធិការដ្ឋាននគរបាល ស្រុកពញាឮ ដើម្បីរងចាំដោះស្រាយតាមច្បាប់៕
