កម្មករអ៊ុតខោអាវ ដេកស្លាប់ក្នុងបន្ទប់មិនដឹងមូលហេតុ
ខេត្តបន្ទាយមានជ័យ៖ បុរសម្នាក់បានគាំងបេះដូងស្លាប់នៅក្នុងបន្ទប់ជួលក្នុងផ្សាររោងក្លឿ ស្រុកអារញ្ញប្រាថេប ខេត្តស្រះកែវ ប្រទេសថៃ កាលវេលាម៉ោង៣ទាបភ្លឺ ឈានចូលថ្ងៃទី៣០ ខែមករា ឆ្នាំ២០១៥ ហើយភាគីថៃបានបញ្ជូនសាកសពតាមច្រកទ្វារអន្តរជាតិប៉ោយប៉ែត នៅល្ងាចថ្ងៃកើតហេតុដដែរ។
បើតាមប្រភពពីមន្ត្រីទំនាក់ទំនងព្រំដែនកម្ពុជា ថៃបានប្រាប់អោយដឹងនៅព្រឹកថ្ងៃទី៣១ ខែមករា ឆ្នាំ២០១៥ នេះថា ក្រោយពីបានទទួលព័ត៌មានភ្លាម ខាងមន្ត្រីជំនាញកម្ពុជា បានសហការណ៍ជាមួយ មន្ត្រីជំនាញថៃចុះទៅត្រួតពិនិត្យ និងធ្វើកោសល្យវិច័យសាកសពរងគ្រោះខាងលើ ហើយក្រោយពីធ្វើកោ សល្យ វិច័យសមត្ថកិច្ចជំនាញទាំង២ បានសន្និដ្ឋានថាសពរងគ្រោះខាងលើនេះពិតជាបានស្លាប់ដោយសាររោគគាំងបេះដូងពិតមែន និងគ្មានស្នាកស្នាមអ្វីពាក់ព័ន្ធនិងអំពើរឃាត់កម្មអ្វីនោះទេ។
សមត្ថកិច្ចទំនាក់ទំនងព្រំដែនកម្ពុជា ថៃបានបន្តថា សពរងគ្រោះខាងលើនេះមានឈ្មោះនុត ចាន់សេង ភេទប្រុស អាយុ៣៥ មានស្រុកកំនើតនៅភូមិទួលទ្រា ឃុំជប់ ឃុំ-ខេត្តត្បូងឃ្មុំ ហើយបានប្រគល់អោយក្រុមគ្រួសារសាច់ញាតិទទួលយកសាកសពរងគ្រោះទៅកាន់ស្រុកកំណើតដើម្បីធ្វើបុណ្យតាមប្រពៃណី៕ដោយយីហាំង
