ប្រតិភូក្រសួងសាធារណការ ចុះពិនិត្យលទ្ធផលសម្រេចបានក្នុងគម្រោងជួសជុលផ្លូវកៅស៊ូ និងប្រព័ន្ធមេលូទឹកការពារគ្រោះទឹកជំនន់ជាជំនួយរបស់រាជរដ្ឋាភិបាលជប៉ុននៅក្នុងក្រុងកំពង់ឆ្នាំង
ខេត្តកំពង់ឆ្នាំង៖ ប្រតិភូក្រសួងសាធារណការ និងដឹកជញ្ជូនដឹកនាំដោយលោក តូចចាន់កុសលរដ្ឋលេខាធិការក្រសួងសាធារណការដឹកជញ្ជូននៅព្រឹកថៃ្ងទី១៦ ខែមករា ឆ្នាំ២០១៥ រួមដំណើរដោយ លោក កឹមបុរីអគ្គនាយកនៃអគ្គនាយកដ្ឋានសាធារណការ លោក ហ៊ីណាតអភិបាលរងខេត្តលោកលីច័ន្ទរិទ្ធីអនុប្រធានមន្ទីរសាធារណការនិងដឹកជញ្ជូនខេត្តលោក អូរ ជីអូរកាម៉ូតូ ទីប្រឹក្សាបច្ចេកទេសគំរោងចៃការជប៉ុននិងមន្ត្រីជាច្រើនរូបទៀតបានចុះមកពិនិត្យលទ្ធផលសំរេចនៃការអនុវត្តគំរោងជាជំនួយឥតសំណងរបស់រាជរដ្ឋាភិបាលជប៉ុនជួយប្រជាពលរដ្ឋក្រុងកំពង់ឆ្នាំង ដែលមានផ្លូវកៅស៊ូប្រវែងជាង៤ពាន់ម៉ែត្រនិងប្រព័ន្ធមេលូបង្ហូរទឹកជាង២ពាន់ម៉ែត្រដើម្បីការពារគ្រោះទឹកជំនន់ដែលធ្លាប់មានកន្លងមក។
លោកលីច័ន្ទរិទ្ធីអនុប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំងបានអោយដឹងថា៖ គម្រោង ជំនួយឥតសំណងរបស់រាជរដ្ឋាភិបាលជប៉ុនដែលត្រូវស្តារឡើងវិញនូវប្រព័ន្ធមេលូទឹកនិងផ្លូវថ្នល់ក្នុងក្រុងកំពង់ឆ្នាំងរួមមាន៖ ជួសជុលផ្លូវជាតិលេខ៥ នៅក្នុងក្រុងកំពង់ឆ្នាំង មានប្រវែង២.២០០មជួសជុលផ្លូវ កៅ ស៊ូក្នុងក្រុងកំពង់ឆ្នាំងប្រវែង២.៤០០មកសាងប្រព័ន្ធលូមេបញ្ចេញទឹកចោលប្រវែង២៦០០ម៉ែត្រ ប្រព័ន្ធ លូអ៊ុយ៩៥០មលូមូលប្រវែង៨.៦០០មនិងអណ្តូងលូប្រវែង៦៨០មហើយ ការអនុវត្តគំរោងនេះមាន រយៈ ពេលជាង១ឆ្នាំគឺចាប់អនុវត្តន៍ពីថៃ្ងទី២៥ខែមេសាឆ្នាំ២០១៣ មក និងតាមការពិនិត្យជាក់ស្តែងរបស់ ប្រតិភូ នៅព្រឹកថៃ្ងទី១៦ ខែមករា ឆ្នាំ២០១៥ នេះសំរេចបាន៩៩,៨ភាគរយហើយ និងអ្វីដែលនៅសេសសល់ ត្រូវ កែលំអរអ្នកម៉ៅការគំរោង និងអនុវត្តអោយរួចរាល់តាមកិច្ចសន្យាដែលបានគ្រោងទុក។
លោក តូចចាន់កុសលរដ្ឋលេខាធិការក្រសួងសាធារណការ និងដឹងជញ្ជូនបានមាន ប្រសាសន៍ថា៖ សមិទ្ធផលថ្មីនេះដែលខេត្តកំពង់ឆ្នាំងទទួលបានមានផ្លូវអ៊ុតរលោងស្អាត និងប្រព័ន្ធមេលូទឹកខ្វាត់ខ្វែង យ៉ាងរឹងមាំដើម្បីទប់ស្កាត់គ្រោះទឹកជំនន់ និងដែលជាជំនួយឥតសំណងរបស់រាជរដ្ឋាភិបាលនិងប្រជា ជនជប៉ុនជាចំណងដៃជូនដល់ប្រជាពលរដ្ឋកម្ពុជាក្នុងខេត្តកំពង់ឆ្នាំង។
លោកក៏បានផ្តាំផ្ញើដល់អាជ្ញាធរដែនដីមន្ទីរសាធារណការ និងប្រជាពលរដ្ឋទាំងអស់ ត្រូវរួមគ្នាជួយ ថែ រក្សាការពារសមិទ្ធផលថ្មីដ៏រឹងរឹងមាំនេះ អោយបានគង់វង្សល្អនិងប្រើប្រាស់អោយបាន យូរអង្វែងតទៅ ដើម្បីបំរើផលប្រយោជន៍របស់ជាតិ និងប្រជាពលរដ្ឋ ដើម្បីកាត់ការពារគ្រោះទឹកជំនន់ ដែលធ្លាប់ ធ្វើអោយ ខូចហេដ្ឋារចនាសម្ពន្ធ័ក្នុងខេត្តកន្លងមក និងកាត់រួមបន្ថយភាពក្រីក្រជូនប្រជាពលរដ្ឋយើង តាមយុទ្ធ សាស្ត្រ ចតុកោណដំណាក់កាលទី៣ របស់រាជរដ្ឋាភិបាលកម្ពុជា ដែលមានសម្តេចអគ្គមហា សេនាបតី តេជោហ៊ុនសែនជានាយករដ្ឋមន្ត្រី នៃព្រះរាជណាចក្រកម្ពុជា៕ដោយ រិទ្ធិ ជ័យ
