ពលរដ្ឋថា៖ លោក វង្ស ដារ៉ា មេការធំរបស់ក្រុមហ៊ុន ហ៊ងអាញ់ដូនពេញ ឃុបឃិតជាមួយលោក អ៊ូ សុធី ប្រមូលទិញឈើមានតម្លៃដឹកចេញពីឧទ្យានជំរកសត្វព្រៃលំផាត់
ខេត្តរតនគិរី ៖ ឧទ្យានដែនជំរកសត្វព្រៃលំផាត់ ដែលត្រូវបានការពារ ដោយព្រះរាជក្រឹត្យ មានទីតាំងក្នុងទឹកដី ស្រុកលំផាត់ មានទំហំប្រមាណជាង ២០ម៉ឺនហិកតា បច្ចុប្បន្នកំពុងរងនូវការកាប់បំផ្លាញ យកប្រភេទឈើសុក្រំ បេង ធ្នង់ ផ្ចឹក ។ល។ យ៉ាងអនាធិបតេយ្យ ដោយជ្រកក្រោមស្លាកដីសម្បទាន ហើយឈ្មួញទាំងណោះ បានកាប់បំផ្លាញ និងប្រមូលឈើ តាមគ្រប់រូបភាព ពីក្នុងព្រៃដែនជំរកសត្វព្រៃ ដឹកចូលមកក្នុង ដែនដីវិនិយោគរបស់ពួកគេ ដោយមានការបើកភ្លើងខៀវ ពីមន្ត្រីការពារ ដែនជំរកសត្វព្រៃលំផាត់ ក្រោមការគ្រប់គ្រង របស់លោក អ៊ូ សុធី ដែលតែងតែធ្វើឲ្យមជ្ឈដ្ឋាននានា រិះគន់ដល់រដ្ឋមន្ត្រីក្រសួងបរិស្ថានថា បណ្តែតបណ្តោយឲ្យមន្ត្រីថ្នាក់ក្រោមអនុវត្តការងារតាមរបៀបជិះសេះលែងដៃ។
ពលរដ្ឋបានចោទប្រកាន់ថា លោក វង្ស ដារ៉ា ដែលជាអ្នកទទួលបានសិទ្ធិ ប្រមូលផល អនុផលព្រៃឈើគ្រប់ប្រភេទ ក្នុងដែនវិនិយោគ បន្តពីក្រុមហ៊ុន ហ៊ងអាញដូនពេញ ដែលមានភូមិសស្ត្រជាមួយឧទ្យានដែនជំរកសត្វព្រៃលំផាត់ប៉ុណ្ណោះទេ ថែមទាំងប្រមូលទិញឈើដែលប្រជាពលរដ្ឋ ដឹកយកមកលក់ឲ្យ ក្នុងក្រុម ហ៊ុនដែលសកម្មភាពនោះបានក្លាយទៅជាប្រភពជម្រុញឲ្យមានការកាប់បំផ្លាញឈើក្នុងឧទ្យាន យ៉ាងធ្ងន់ ធ្ងរ។ ពលរដ្ឋបញ្ជាក់ថា តាមរយៈសកម្មភាពនោះលោក វង្ស ដារ៉ា មានប្រភពឈើនាំចេញទៅទីផ្សារមិនចេះ រីងស្ងួត គួបផ្សំដោយសារតែ លោក អ៊ូ សុធី មេឧទ្យានដែនជំរកសត្វព្រៃលំផាត់បិទបាំងដើម្បីលាភសក្ការៈចាត់ចែងកញ្ចប់ប្រចាំខែជូនថ្នាក់លើ ដើម្បីរក្សាប៉ុស្តិ៍ខ្លាញ់នោះ ។
អ្នកភូមិនៅក្នុងងតំបន់នោះបានឲ្យដឹងថា ដោយសារមានអំណោយផល មានប្រើរូបភាពដាក់កម្មករប្រដាប់ដោយរណាយន្ត ចូលអារឈើប្រណិត តាំង ពីព្រលឹម ទល់ព្រលប់ ហើយមានរថយន្តរ៉េវ នឹង រថយន្តបាកុង លួចដឹកយកមកទុក ក្នុងតំបន់របស់ខ្លួន យ៉ាងគគ្រឹកគគ្រេង ដោយឡែកអ្នកភូមិ និងក្រុមអ្នកស៊ីឈ្នួល កាប់ឈើប្រណិត និងឈើសុក្រំ ពីក្នុងដែនជំរក ការពារសត្វព្រៃលំផាត់ យកមកលក់ឲ្យលោកមេការធំ វង្ស ដារ៉ា ឈរចាំទិញនៅក្រុមហ៊ុន ហ៊ងអាញ់ដូនពេញ ដឹកតាមគោយន្តកន្ត្រៃ ត្រាក់ទ័រតទ្រុង បានយ៉ាងអនាធិបតេយ្យ គ្មានការទប់ស្កាត់ និងបង្ក្រាបអ្វីឡើយ។ ដោយសារតែ លោក វង្ស ដារ៉ា និងមន្ត្រីការពារដែនជំរកសត្វ បានឃុបឃិតចែកផលប្រយោជន៍ ជាមួយគ្នា ទើបអ្វីៗអាចដំណើរការ ដោយរលូនល្អ៕
