អាជ្ញាធរចាប់ចុះណែនាំអប់រំ អាជីវករដាក់លក់រំលោភលើចំណីផ្លូវជុំវិញផ្សារលើក្រុងព្រះសីហនុ ឲ្យគិតគូរពីសណ្តាប់ធ្នាប់ និងអនាម័យ
ខេត្តព្រះសីហនុ៖ ដើម្បីបញ្ជៀសនៅភាពកកស្ទះនៅតាមកំណាត់ផ្លូវជុំវិញផ្សារ និងដើម្បីត្រៀមអប់អរពិធីបុណ្យចូលឆ្នាំថ្មីប្រពៃណីចិន នាព្រឹកថ្ងៃទី១៣ មករាឆ្នាំ២០១៥ កម្លាំងចម្រុះថ្នាក់ក្រុង ដឹកនាំដោយលោក រាជ សុវណ្ណ សហកាជាមួយលោក រស់ គឺម ប្រធានគ្រប់គ្រងផ្សារលើបាន ចុះរៀបបចំសណ្តាប់ធ្នាប់ នៅជុំវិញផ្សារលើ អប់រំណែនាំអាជីវករលក់ដូរ អោយចេះថែទាំអនាម័យ រៀបរយអោយមានសណ្តាប់ធ្នាប់ ធ្វើយ៉ាងណាអោយមានសោភ័ណ្ឌភាពស្អាត។
ថ្លែងបញ្ជាក់ក្នុងពិធីចុះរៀបចំសណ្តាប់នាព្រឹកថ្ងៃទី១៣មករា លោក រាជ សុវណ្ណ អភិបាលរងក្រុងព្រះសីហនុ ទទួលបន្ទុកសណ្តាប់ធ្នាប់ បានបញ្ជាក់ថា ដោយមើលឃើញភាពខ្វះ សណ្តាប់ធ្នាប់ ដោយសារតែបងប្អូនអាជីវករមួយចំនួន បានដាក់លក់នៅលើផ្លូវបង្កអោយផ្លូវនៅរួមតូច លំបាកដល់ប្រជាពលរដ្ឋ ក៏ដូចជាភ្ញៀវទេសចរណ៍ ដែលបានមកទិញទំនិញ និង ដើរទស្សនា ក្នុងផ្សារលើក្រុងព្រះសីហនុ ទើបកម្លាំងចម្រុះដឹកនាំដោយរូបលោកផ្ទាល់ បានចុះសហការជាមួយប្រធានគ្រប់គ្រងផ្សាររលើ រៀបចំឡើងវិញនូវសណ្តាប់ធ្នាប់ ដោយបានកំណត់អោយអាជីវករដាក់តាំងលក់អោយបានត្រឹមត្រូវ មានរបៀបរៀបរយ មិនលក់រំលោភចំណីផ្លូវ ដោយទុកកន្លែងចតរថយន្ត ម៉ូតូ យ៉ាងតិច២ ម៉ែត្រជុំវិញផ្សារ ប្រសិនបើអាជីវករណានៅតែលក់រំលោភចំណីផ្លូវបន្តទៀតនោះ អាជ្ញាធរក្រុងនឹងចាត់វិធានការតាមផ្លូវច្បាប់ ។
លោកបានបន្តថា ការចុះរៀបចំសណ្តាប់ធ្នាប់នេះគឺ ទី១- ដើម្បី បញ្ជឿសការកកស្ទះ ចរាចរណ៍នៅជុំវិញផ្សារ ទី២ -ដើម្បីរៀបចំសោភ័ណ្ឌភាព និង បរិស្ថាននៅជុំវិញផ្សារ ទី៣- ត្រៀមអប់អរពីធីចូលឆ្នាំថ្មីប្រពៃណីចិន នាថ្ងៃខាងមុខដែលមាន ភ្ញៀវទេសចរណ៍រាប់ម៉ឺននាក់ ចូលកម្សាន្តនៅខេត្តព្រះសីហនុ។
លោក រស់ គីម ប្រធានគ្រប់គ្រងផ្សារលើក្រុងព្រះសីហនុ ក៏បានបញ្ជាក់ដែរថា បញ្ហាសណ្តាប់ធ្នាប់នេះគឺជារឿងស្មុកស្មាញបំផុត ព្រោះថាអាជីវករមួយចំនួនហាក់ពុំគោរពតាមបទបញ្ជាផ្ទៃក្នុងរបស់ផ្សារនោះទេ ដោយពួកគាត់គិតតែប្រជែងគ្នាលក់អោយបានមុខគេដើម្បីដណ្តើមម៉ូយ។ ប៉ុន្តែនៅថ្ងៃខាងមុខនេះ ក្រុមគណៈកម្មាការផ្សារមានគម្រោង បង្កើតផ្សារមេឃ ដែលមានទីតាំងក្នុងបរិវេណចំហៀងផ្សារដើម្បីបញ្ជៀសនៅការដាក់លក់គ្មានសណ្តាប់ធ្នាប់ដូចសពថ្ងៃនេះ៕ ដោយ កោះរ៉ុង
