រថយន្តកាមរីដឹកបងប្អូនទៅមន្ទីរពេទ្យមិនទាន់ដល់គោលដៅផង ឆ្លងចរន្តអគ្គិសនីឆេះខូចខាតទាំងស្រុង
ខេត្តបន្ទាយមានជ័យ៖ ករណីឆាបឆេះរថយន្តដោយសារតែឆ្លងចរន្តអគ្គិសនី ឆេះទាំងស្រុងតែ សំណាងល្អតៃកុង និងអ្នករួមដំណើររត់ចេញទាន់ពេល មិនបង្កអោយអ្នករងរបួសឡើយ ។ ហេតុការនៅវេលាម៉ោង១២និង១០នាទីថ្ងៃត្រង់ កាលពីថ្ងៃទី០៨ ខែមករា ឆ្នាំ២០១៥ តាមផ្លូវជាតិលេខ 56A ត្រង់ចំណុចភូមិខ្លែងពណ៌ត្បូង ឃុំស្លក្រាម ស្រុកស្វាយចេក ខេត្តបន្ទាយមានជ័យ។
ប្រភពបានបង្ហើបប្រាប់ថា៖ ម្ចាស់រថយន្តបានដឹកបងប្អូនមានជម្ងឺឈឺធ្ងន់ធរ យកទៅសំរាកព្យាបាល ជម្ងឺ នៅ ទីរួមខេត្ត ព្រោះនៅមន្ទីរពេទ្យនៅក្នុងស្រុកស្វាយចេកគ្មានថ្នាំល្អៗ និងខ្លះខាតផងនោះ ក៏សម្រេចបង ប្អូន បញ្ជូនទៅបន្តបែបនេះ មិនទាន់ដល់គោលដៅផង រថយន្ត បានឆ្លងប្រព័ន្ធភ្លើង បណ្តាលអោយឆេះខ្ទេចតែម្តង។
លោក សន គឹមសួគ៌ នាយការិយល័យនគរបាលសណ្តាប់ធ្នាប់ផ្លូវគោក បានប្រាប់តាមរយៈទូរ័ព្ទនៅរសៀលថ្ងៃទី៩ ខែមករា ឆ្នាំ២០១៥ រថយន្តខាងលើនេះ ខណៈម្ចាស់ដែលកំពុងបើកបរស្រាប់តែឆ្លងប្រព័ន្ធភ្លើងតែម្តង រហូតឆាបឆេះទាំងស្រុង សំណាងល្អមិនបណ្តាលអ្នកជិះក្នុងរថយន្តរងរបួសអ្វីទេ។ លោកបានបន្តថា ករណីនេះឆាបឆេះរថយន្តម៉ាកកាមារី ស៊េរីឆ្នាំ១៩៩៥ ពណ៌ ស ពាក់ស្លាកលេខភ្នំពេញ 2C-8825 បើកបរដោយឈ្មោះហឿ ពេច ភេទប្រុស អាយុ ២៥នៅភូមិខ្វាវកើត ឃុំរលួស រួមដំណើរ ៥ រួមទាំងអ្នកជំងឹម្នាក់ផងដែរ តែពុំមានគ្រោះថ្នាក់អ្វីទេ ឯរថយន្តឆេះអស់ទាំងស្រុង។
ក្រោយពេលកំពុងឆាបឆេះ គេឃើញមានរថយន្តពន្លត់អគ្គីភ័យ នៃស្នងការខេត្តបន្ទាយមានជ័យទៅបាញ់ទឹកពន្លត់ និងបានជួយបញ្ជូនអ្នកជម្ងឺ អ្នករួមដំណើរទៅកាន់មន្ទីរពេទ្យឯកជននៅក្នុងខេត្តបន្ទាយមានជ័យ៕ ដោយ យីហាំង
