ជិះម៉ូតូឌុបប្រពន្ធទាក់ដៃចង្កួតជាមួយរឺម៉កម៉តូដួលលើថ្នល់ រថយន្តកិនចំក្បាលប្រពន្ធស្លាប់ ប្តីរបួសធ្ងន់
ភ្នំពេញ ៖ ស្ត្រីម្នាក់ធ្លាក់រអិលបោះចេញពីកែបក្រោយម៉ូតូ ត្រូវឡានកិនចំពីលើបានស្លាប់បាត់បង់ជីវិតភ្លាមៗនៅនឹងកន្លែងកើតហេតុ ចំណែកបុរសជាប្ដីជាអ្នកឌុបរបួសធ្ងន់ ហើយបានគេជួយសង្គ្រោះដោយដឹកបញ្ជូនទៅកាន់មន្ទីរពេទ្យភ្លាមៗដែរ បន្ទាប់ពីជួបគ្រោះថ្នាក់ចរាចរណ៍ជិះម៉ូតូបានទាក់ដៃចង្កូតជាមួយរ៉ឺម៉កម៉ូតូ ដួលបោកទៅលើថ្នល់ ស្របពេលរថយន្តមកដល់ក៏បានកិនពីលើ ។ ហេតុការណ៍ នេះបានកើតឡើងកាលពីវេលាម៉ោង១០ព្រឹក ថ្ងៃទី១៦ ខែកុម្ភៈ ឆ្នាំ២០១៥ នៅចំណុចមហាវិថីសហព័ន្ធរុស្ស៊ីមុខសកលវិទ្យាល័យភូមិន្ទភ្នំពេញ ស្ថិតក្នុងសង្កាត់ទឹកល្អក់ទី១ ខណ្ឌទួលគោក។
សមត្ថកិច្ចបានឲ្យដឹងថា៖ ស្ត្រីរងគ្រោះដែលស្លាប់បាត់បង់ជីវិតនោះឈ្មោះ យ៉ាន រិទ្ធី អាយុប្រហែល៣០ឆ្នាំ និងប្ដីឈ្មោះ ម៉ៅ វុទ្ធី អាយុ៥៣ឆ្នាំ ជាសន្តិសុខឯកជន មានទីលំនៅសង្កាត់ចោមចៅ ខណ្ឌពោធិ៍សែនជ័យ។ ចំណែករថយន្តបង្កឡើងពីរថយន្តម៉ាកឡិចស៊ី RX300 ពណ៌ទឹកប្រាក់ ហើយក្រោយពេលកើតហេតុរថយន្តបង្កនេះបានបន្ថែមល្បឿនរត់គេចខ្លួនបាត់ស្រមោល។
សាក្សីនៅកន្លែងកើតហេតុបានឲ្យដឹងថា៖ នៅមុនពេលកើតហេតុគេបានឃើញជនរងគ្រោះទាំង២នាក់ប្ដី-ប្រពន្ធបានជិះម៉ូតូឌុបគ្នាចេញពីកន្លែងធ្វើការនៅម្តុំស្តុបទេពផន ដោយជិះម៉ូតូម៉ាកហុងដាសេ125 ពណ៌ខ្មៅ ពាក់ស្លាកលេខភ្នំពេញ 1 AX 3409 តាមផ្លូវសហព័ន្ធរុស្ស៊ី ក្នុងទិសដៅពីកើតមកលិច លុះពេលមកដល់មុខសកលវិទ្យាល័យភូមិន្ទភ្នំពេញបានទាក់ដៃចង្កូតគ្នាជាមួយរ៉ឺម៉កម៉ូតូបណ្ដាលឲ្យដួល ស្របពេលរថយន្តឡិចស៊ីសRX300 ពណ៌ទឹកប្រាក់ កំពុងធ្វើដំណើរចុះពីលើស្ពានអាកាសក្នុងទិសដៅពីលិចទៅកើតមកដល់ចាប់ហ្វ្រាំងមិនទាន់កិនចំក្បាលស្លាប់តែម្តង ចំណែកបុរសជាប្ដីរងរបួសធ្ងន់ត្រូវគេបញ្ជូនទៅសង្គ្រោះនៅមន្ទីរពេទ្យ៕
http://ift.tt/1AJdN1B
