គ្រោះថ្នាក់ចរាចរណ៍២ករណី ដោយឡែកពីគ្នា ស្លាប់ម្នាក់ របួសធ្ងន់២នាក់ នៅខេត្តបន្ទាយមានជ័យ
ខេត្តបន្ទាយមានជ័យ៖ មនុស្សម្នាក់ បានស្លាប់ រវាងរថយន្តបុករថយន្ត និង២នាក់ទៀត បានរងរបួសធ្ងន់ ដោយម៉ូតូបុកអ្នកថ្មើរជើង នៅខេត្តបន្ទាយមានជ័យ ។
ប្រភពព័ត៌មានពីនគរបាលចរាចរណ៍ខេត្ត បានឲ្យដឹងថា នៅវេលាម៉ោង៨យប់ ថ្ងៃទី១៤ ខែកុម្ភៈ ឆ្នាំ២០១៥ លើកំណាត់ផ្លូវជាតិលេខ៥ ក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ មានគ្រោះថ្នាក់ចរាចរណ៍កើតឡើង រវាងរថយន្តស្ទូច បើកបុករថយន្តដឹកទំនិញធុនធំ បណ្តាលឲ្យអ្នកបើកបររថយន្តស្ទូច គាបជាប់ស្លាប់ភ្លាមៗ នៅនឹងកន្លែង ។ ជនរងគ្រោះដែលស្លាប់ឈ្មោះ នូ សុខេង ភេទប្រុស អាយុ៣៨ឆ្នាំ នៅភូមិដូង ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ។ ចំណែករថយន្តដឹកទំនិញធុនធំ ត្រូវបានគេស្គាល់ឈ្មោះ ជិន ខា ភេទប្រុស អាយុ៤៤ឆ្នាំ នៅភូមិ ឃុំ ជាខ្លាង ស្រុកស្វាយអន្ទរ ខេត្តព្រៃវែង ។ មុនពេលកើតហេតុ រថយន្តស្ទូចពាក់ផ្លាកលេខ តាកែវ 3A.1716 បានបើកពីទិសខាងកើតទៅលិច ដល់ចំណុចកើតហេតុ បានឡើងជែងរថយន្ត ០១គ្រឿង ក៏ជ្រុលចង្កូតទៅបុករថយន្តដឹកទំនិញធុនធំ ពាក់ផ្លាកលេខ ព្រៃវែង 3A.0679 បើកបញ្ច្រាសទិសគ្នាពីលិចទៅកើត បណ្តាលឲ្យគាបអ្នកបើករថយន្តស្ទូចស្លាប់ នៅនឹងកន្លែង ចំណែករថយន្តធំ រងរបួសបន្តិចបន្តួច រថយន្តទាំង ០២គ្រឿង ខូចខាតធ្ងន់ ។
មួយករណីផ្សេងទៀត នៅវេលាម៉ោង ២៣និង២០នាទីយប់ ថ្ងៃទី១៤ ខែកុម្ភៈ ឆ្នាំ២០១៥ នៅលើកំណាត់ផ្លូវជាតិលេខ៥ ក្នុងភូមិសាស្ត្រ ភូមិភ្នំធំត្បូង ឃុំអូរប្រាសាទ ស្រុកមង្គលបូរី មានគ្រោះថ្នាក់ចរាចរណ៍ ដោយម៉ូតូបុកអ្នកថ្មើជើង បណ្តាលឲ្យរងរបួសធ្ងន់ ទាំងអ្នកបើកម៉ូតូនិងអ្នកដើរ យកទៅព្យាបាលនៅមន្ទីរពេទ្យបង្អែកមិត្តភាព កម្ពុជា ជប៉ុន ស្រុកមង្គលបូរី ។ អ្នបើកបរម៉ូតូឈ្មោះ ហ៊ុន សម្បត្តិ ភេទប្រុស អាយុ៣២ឆ្នាំ នៅភូមិអូរជួប ឃុំរហាត់ទឹក ស្រុកមង្គលបូរី បើកម៉ូតូម៉ាកហុងដាធុនសេ១២៥ សេរី២០១១ ពណ៌ខ្មៅពាក់ផ្លាកលេខ ប.មានជ័យ 1E.4697 បើកពីត្បូងទៅជើង ។ ចំណែកអ្នកដើរឈ្មោះ ប្រុក ប៉ោត ភេទប្រុស អាយុ៣៥ឆ្នាំ ជាមនុស្សវិកលចរិក នៅភូមិភ្នំតូចត្បូង ឃុំភ្នំតូច ស្រុកមង្គលបូរី ដើរតាមបណ្តោយផ្លូវជាតិលេខ៥ ស្របទិសគ្នា ករណីនេះបណ្តាលអ្នកបើកម៉ូតូ របួសធ្ងន់ក្បាល និងមុខ ឯអ្នកដើរបាក់ ក.ជើងស្តាំ ម៉ូតូខូចស្រាល ។ មូលហេតុបណ្តាលមកពី អ្នកបើកម៉ូតូខ្វះការប្រុងប្រយ័ត្ន និងបើកលឿន ៕ រក្សា
ប្រភព៖ អគ្គស្នងការដ្ឋាននគរបាលជាតិ
from Khmernote - The best entertainment website in Cambodia http://ift.tt/1vOBh52
