ក្មេងប្រុសអាយុ៧ឆ្នាំម្នាក់ ត្រូវសម្លាប់ដោយចាប់ចងមាត់ និងចងក ជាន់ពន្លិចទឹកស្លាប់យ៉ាងវេទនាជាទីបំផុត
ខេត្តកំពង់ចាម៖ ក្មេងប្រុសអាយុ៧ឆ្នាំម្នាក់ត្រូវគេសម្លាប់យ៉ាងសាហាវឃោឃៅ ដោយចាប់ចងក និងចងមាត់ ជាន់ពន្លិចទឹករហូតដល់ស្លាប់យ៉ាងវេទនាជាទីបំផុត នៅរសៀលថ្ងៃទី២៧ ខែមីនា ឆ្នាំ២០១៥ ស្ថិតនៅភូមិព្រែកសង្កែកើត ឃុំពាមកោះស្នា ស្រុកស្ទឹងត្រង់ ខេត្តកំពង់ចាម តែជនល្មើសត្រូវបានកម្លាំងនគរបាលឃាត់ខ្លួនហើយបានប្រាប់មូលហេតុថា រូបគេបានខឹង និងមានគំនុំជាមួយក្មេងប្រុសរងគ្រោះ ឈ្លោះជាមួយកូនរបស់ខ្លួន ។
មន្ត្រីនគរបាលព្រហ្មទណ្ឌស្រុកស្ទឹងត្រង់បានបញ្ជាក់ថា ជនល្មើស ត្រូវបានកម្លាំងនគរបាល ចុះទៅឃាត់ខ្លួនចាប់វាយខ្នោះបានភ្លាមៗ ក្រោយពីធ្វើសកម្មភាពសម្លាប់ក្មេងប្រុសនោះ។ ជនល្មើសមានឈ្មោះ ហួង ប៊ុនថេត អាយុ ៣៣ឆ្នាំ រីឯក្មេងប្រុសរងគ្រោះ ឈ្មោះ គង់ ពិសិដ្ឋ អាយុ៧ឆ្នាំ។
ស្នងការនគរបាលខេត្តកំពង់ចាម លោកឧត្តមសេនីយ៍ បែន រ័ត្នបានឲ្យដឹងថា ជនល្មើសរូបនេះ បានគុំក្មេងប្រុសរងគ្រោះតាំងពីម្សិលមិញមកម្ល៉េះ នៅពេលដែលឈ្លោះជាមួយកូនរបស់ខ្លួន ហើយមកដល់ថ្ងៃនេះទៀត ក្មេងៗទាំងពីរបានឈ្លោះគ្នាម្តងទៀត ធ្វើឲ្យជនល្មើសខឹង រហូតចាប់ក្មេងប្រុសរងគ្រោះយកខ្សែចងក និង ចងមាត់ ហើយចាប់ច្រមុជទឹករហូតដល់ស្លាប់តែម្តង។ តែជនល្មើសត្រូវជំនាញបានកសាងសំណុំរឿងបញ្ជូន ទៅកាន់តុលាការ ផ្តន្ទាទោសតាមផ្លូវច្បាប់៕
http://ift.tt/1Nlpyza
