ស្ថានីយប្រេងឥន្ធនៈមួយកន្លែង ក្នុងទីប្រជុំជនផ្សារ ឃុំប៊ូស្រាខេត្តមណ្ឌលគិរី សាងសង់មិនត្រឹមត្រូវតាមលក្ខណៈបច្ចេកទេស កំពុងធ្វើឲ្យប្រជាពលរដ្ឋខ្វល់ចិត្ត
ខេត្តមណ្ឌលគិរី៖ ប្រជាពលរដ្ឋជាច្រើនគ្រួសារនៅឃុំប៊ូស្រា ស្រុកពេជ្រាដា ខេត្តមណ្ឌលគិរី កុំពុងគិតទុកព្រួយបារម្ភយ៉ាង ខ្លាំងអំពីសុវត្ថិភាពសមាជិកក្រុមគ្រួសាររបស់ខ្លួនជាពិសេសកូនតូចៗ និងផ្ទះសម្បែង ចំពោះឧប្បត្តិហេតុ នៃគ្រោះអគ្គីភ័យអាចកើត ឡើងក្នុងពេលណាមួយ ខណៈស្ថានីយ ប្រេងឥន្ធនៈថ្មីមួយកន្លែង កំពុងសាងសង់មិនត្រឹមត្រូវតាមលក្ខណៈបច្ចេកទេស ក្នុងទីប្រជុំជនឃុំប៊ូស្រា ផ្ទុយពីសារាចរណ៍របស់ ក្រសួងរ៉ែ និងថាមពល ប៉ុន្តែគេមិនបានឃើញមន្ត្រីជំនាញត្រួតពិនិត្យរឿងនេះទេ។
ប្រភពពីប្រជាពលរដ្ឋបានឲ្យដឹងថា បច្ចុប្បន្នស្ថានីយប្រេងឥន្ធនៈកំពុងសាងសង់នោះគឺនៅក្នុងទីប្រជុំជនដែលជា ផ្សារ ក្នុងឃុំប៊ូស្រាតែម្ដង ដែលស្ថិតក្នុងភូមិពូទឺត ហើយបើសង្កេតទៅលើស្ថានភាពជាក់ស្ដែងនៅទីតាំងនោះឃើញថា មាន ផ្ទះឈើរបស់អាជីវករ លក់ដូររាប់សិបខ្នងដែលសាង់សង់ជាប់ៗគ្នា នៅក្បែរស្ថានីយប្រេងឥន្ធនៈខាងលើ ដូច្នេះប្រសិនបើមា នអគ្គីភ័យកើតឡើង ដោយប្រការណាមួយនឹងងាយឆាបឆេះរីករាលដាលយ៉ាងឆាប់រហ័ស ហើយក៏មិនមានឡានពន្លត់អគ្គី ភ័យមកអន្តរាគមន៍ទាន់ពេលវេលាដែរ ព្រោះឃុំប៊ូស្រាមានចម្ងាយប្រមាណ៣០គីឡូម៉ែត្រឯណោះពីទីរួមខេត្តមណ្ឌលគិរី ។
ប្រភពដដែលបានឲ្យដឹងទៀតថា អាជ្ញាធរស្រុកពេជ្រាដាមិនគួរបណ្តែតបណ្តោយឲ្យស្ថានីយប្រេងឥន្ធនៈសាងសង់ នៅលើទីតាំងដែលជាផ្សារនោះទេ ដោយពួកគាត់បានដាក់ការសង្ស័យថា លោក នួន សារ៉ន អភិបាលស្រុកពេជ្រាដា ប្រហែលជាបានសើមមាត់សើម-ក-ហើយទេដឹង ទើបមិនដែលឃើញវត្តមានរបស់មន្ត្រីស្រុកពេជ្រាដាចុះមកពិនិត្យស្ថា នីយប្រេងឥន្ធនៈដែលកំពុងសាងសង់នេះមួយដងផងនោះ? ។
សូមបញ្ជាក់ផងដែរថា បើយោងតាមសារាចរស្ដីពី សុវត្ថិភាពសម្រាប់ការរៀបចំស្ថានីយប្រេងឥន្ធនៈ លេខ ៤៦៥ .រថ .អប្រក.សរច របស់ក្រសួងរ៉ែ និងថាមពល បានកំណត់ថា ស្ថានីយប្រេងឥន្ធនៈត្រូវស្ថិតនៅក្នុងទីតាំងដែលមានលក្ខណៈ ទូលំទូលាយគ្រប់គ្រាន់ ហើយទីតាំងស្ថានីយប្រេងឥន្ធនៈត្រូវស្ថិតនៅចម្ងាយអប្បបរមា៣៥ម៉ែត្រពីទីប្រជុំសាធារណៈជន រីឯក្បាលដីរបស់ស្ថានីយប្រេងវិញ ត្រូវមានទំហំអប្បបរមា២៥ម៉ែត្រ ។ ផ្ទុយទៅវិញបើយោងតាមសេចក្ដីរាយការណ៍ពីប្រជា ពលរដ្ឋបានបញ្ជាក់ថា ក្បាលដីរបស់ស្ថានីយប្រេងឥន្ធនៈដែលកំពុងសាងសង់ខាងលើមានត្រឹម១៥ម៉ែត្រប៉ុណ្ណោះ ហើយ ចំពោះចម្ងាយអប្បបរមាពីទីប្រជុំសាធារណៈជនវិញនោះ គឺស្ថានីយប្រេងឥន្ធនៈនោះស្ទើរតែជាប់ជញ្ជាំងជាមួយផ្ទះអាជីវករ លក់ដូរតែម្ដង ។
ជុំវិញករណីនេះ លោក នួន សារ៉ន អភិបាលស្រុកពេជ្រាដា បានឲ្យដឹងតាមទូរស័ព្ទថា << លោកមិនទាន់ច្បាស់ទេ ព្រោះមេឃុំមិនទាន់រាយការណ៍ជូន ចាំមើលលោកសួរទៅមេឃុំសិន >> ។ ចំណែកលោកមេឃុំប៊ូស្រាវិញបានប្រាប់អ្នកព័ត៌មានយើងថា លោកបានដឹងចំពោះការសាងសង់ ស្ថានីយប្រេងនេះ ដោយម្ចាស់ស្ថានីយបានរត់ការណ៍ដល់ស្រុកហើយ ។
ទាក់ទិននឹងបញ្ហានេះដែរ លោក សាន់ ដារិទ្ធ ប្រធានមន្ទីររ៉ែ និងថាមពលខេត្តមណ្ឌលគិរី បានអោយដឹងថា លោក មិនបានដឹងពីរឿងនេះទេ រឿងនេះខុសច្បាប់ហើយ លោកនឹងឲ្យមន្ត្រីរបស់លោកចុះទៅពិនិត្យ។
ពលរដ្ឋរស់នៅក្នុងទីប្រជុំជន ផ្សារឃុំប៊ូស្រា លើកដៃសំពះសុំឲ្យមន្ត្រីជំនាញចេញមកធានា និងជាពិសេសស្នើឲ្យលោកអភិបាលខេត្តមេត្តាជួយអន្តរាគមន៍ឲ្យម្ចាស់សំណង់ស្ថានីយប្រេងឥន្ធនៈនេះរកទីតាំងសមស្របដែលអាចបង្កាគ្រោះអគ្គីភ័យបានកម្រឹតខ្ពស់ ចៀសវាងពួកគាត់ជួបមហន្តរាយនៅពេលខាងមុខ៕ ដោយ ឦសាន២
http://ift.tt/1HSysVc