អាជ្ញាធរខេត្តមានគម្រោងធ្វើរានជួលឲ្យអាជីវករលក់ដូរនៅសងខាងផ្សារលើជាង៤០០នាក់ ដើម្បីរក្សាសណ្តាប់ធ្នាប់លក់ដូរ អនាម័យ និងសោភ័ណភាពទីផ្សារក្នុងក្រុង
ខេត្តកំពង់ឆ្នាំង៖ ខាងមុខនេះអាជ្ញធរខេត្តមានគម្រោងធ្វើរានលក់ដូរជាង១០០រាន សំរាប់អ្នកលក់ដូរនៅសងខាងផ្សារលើជាង៤០០នាក់ ដើម្បីរៀបចំសណ្តាប់ធ្នាប់លក់ដូរអោយបានល្អ មានអនាម័យ និងមានសោភណ្ឌ័ភាព។ ប៉ុន្តែគម្រោងនេះអាជីវករលក់ដូរនៅក្នុងផ្សារលើមួយចំនួនតូចតវ៉ាប្រឆាំងមិនអោយធ្វើ ព្រោះតែធ្វើអោយបាំងផ្លូវ ធ្វើអោយអ្នកលក់ដូរក្នុងផ្សារដែលទិញតូបលក់ពីរដ្ឋលក់មិនដាច់ និងម្យ៉ាងទៀតខ្លាចពេលមានគ្រោះអគ្គីភ័យក្នុងផ្សារ ឡានទឹកចូលអន្តរាគមន៍មិនបាន។ ដោយឡែកអ្នកលក់នៅសងខាងផ្សារលើជាង៤០០នាក់ ដែលធ្លាប់តែដាក់ឆ័ត្រលក់ដូរផ្ទាល់ដីពេញចិត្តយ៉ាងខ្លាំង និងបានគាំទ្រគម្រោងនេះ។
ទាក់ទងនិងបាតុភាពរបស់អាជីវករក្នុងផ្សារលើមួយចំនួនដែលប្រឆាំង និងការអនុវត្តន៍ គម្រោងនេះនៅរសៀលថ្ងៃទី២៧ ខែមេសា ឆ្នាំ២០១៥ លោក ហ៊ី ណាត អភិបាលរងខេត្តនិងជាប្រធានគណៈកម្មការរៀបចំសណ្តាប់ធ្នាប់ សោភណ្ឌភាព ខេត្តកំពង់ឆ្នាំង និងលោក ហៃ មនោរម្យ អភិបាលក្រុងកំពង់ឆ្នាំងបានជួបជាមួយអ្នកកាសែតមួយក្រុម និងបានបញ្ជាក់ ឆ្លើយតប នឹងបាតុភាពនៃការអនុវត្តន៍ គម្រោងខាងលើនេះថា៖ គម្រោងខាងលើនេះគណៈបញ្ជាការឯកភាពខេត្ត បានបើកការប្រជុំពិភាក្សា គ្នាជាច្រើនលើកទើបគ្រោងយកគម្រោងនេះមកអនុវត្ត។
កន្លងមកការរៀបចំសណ្តាប់ធ្នាប់លក់ដូរ អនាម័យ ការជួសជុលថែទាំ និងការរៀបចំសោភ័ណភាពរបស់ផ្សារលើគឺជាភារកិច្ចគណៈកម្មាការផ្សារលើរបស់ក្រុមហ៊ុនថូម៉ាក់ដែលជាអ្នកវិនិយោគផ្សារលើរយះពេល២០ឆ្នាំ ចប់កុងត្រាទើបប្រគល់អោយខេត្ត។ ប៉ុន្តែជាង១០ឆ្នាំមកនេះភារកិច្ចខាងលើនេះក្រុមហ៊ុនថូម៉ាក់មិនបានធ្វើ និងមិនបានគោរពតាមសៀវភៅ បន្ទុកអ្វី ទាំងអស់ក្រៅពីយកតែភាស៊ីដាក់ហោប៉ៅ ហើយផលលំបាកទាំងនេះបានធ្លាក់មកលើអាជ្ញាធរខេត្ត និងក្រុងកំពង់ឆ្នាំង ប្រឈមដោះស្រាយទៅវិញ។
កាលពីឆ្នាំ២០០៥ក្រោយពេលសម្ភោធអោយផ្សារលើលក់ដូរ នៅសងខាងផ្សារលើក៏មានអាជីវករលក់ដូរតាមរានផ្ទាល់ដីដាក់ឆ័ត្រជិត២០០នាក់ផងដែរ មកដល់ពេលនេះបានកើនជាង៤០០នាក់ដែលពួកគាត់ទាមទារអោយមានកន្លែង លក់ដូរដើម្បីចិញ្ចឹមក្រពះ។ប៉ុន្តែជាង១០ឆ្នាំកន្លងមកនេះការលក់ដូរនៅសងខាងផ្សារលើ គ្មានសណ្តាប់ធ្នាប់ អនាម័យ កន្លែងលក់ដូរបានក្លាយជាភក់ជ្រាំ រថយន្តចេញចូលមិនរួច។
មកដល់ដើមឆ្នាំ២០១៥នេះ រាជរដ្ឋាភិបាលជប៉ុនបានជួយអភិវឌ្ឍន៍ ដោយបានអោយក្រុមហ៊ុនចៃការជួយធ្វើផ្លូវក្នុងក្រុង និងរៀបចំប្រព័ន្ធមេលូទឹកជុំវិញផ្សារលើ រៀបចំក្រាលការ៉ូការ៉ូឡានៅទីធ្លាសងខាងផ្លូវផ្សារលើដើម្បីអោយមានសោភ័ណភាព ដូច្នេះការអនុវត្តគម្រោងខាងលើនេះគឺជាការចាំបាច់ណាស់។
លោក ហ៊ីណាត និងលោក ហៃ មនោរម្យ បានបញ្ជាក់អោយដឹងថា៖ រានលក់ដូរក្នុងគម្រោងនេះគឺត្រូវជួលអោយលក់ដូរ បណ្តោះ អាសន្នថ្លៃឈ្នួលក្នុង១ខែ៥ម៉ឺនរៀល ថវិការនេះសំរាប់ធ្វើអនាម័យ និងកសាងសោភណ័ភាពរបស់ខេត្ត ដល់ពេល៩ឆ្នាំ ទៀតនិងដាច់អាណត្តិ ខេត្ត និងរកអ្នកវិនិយោគថ្មីមកកសាងផ្សារលើនេះច្រើជាន់ទៀតទៅតាមសេចក្តីត្រូវការ របស់អាជីវករ លក់ដូរ។គម្រោងរៀបចំនេះអាជ្ញាធរបានទុកផ្លូវចេញចូលរបស់រថយន្ត៨ម៉ែត្រនៅសងខាងផ្សារ សំរាប់អន្តរាគមន៍ពេល មាន គ្រោះអគ្គីភ័យកើតឡើងក្នុងផ្សារនិងជុំវិញផ្សារលើ ចំណែករានលក់ដូរនេះគឺអាចលើកចល័តចេញចូលបានតាមតម្រូវការ។
ការអនុវត្តន៍គម្រោងនេះ អាជ្ញាធរខេត្តនិងស្នើសុំអ្នកជំនាញពីក្រសួងមហាផ្ទៃ ក្រសួងសេដ្ឋកិច្ចហិរញ្ញវត្ថុមកសហការ ពិនិត្យ និងអនុវត្តន៍ដោយផ្ទាល់ ជៀសវាងការរិះគន់ពីអាជីវករផ្សារលើថា អាជ្ញាធរខេត្តអនុវត្តន៍គម្រោងនេះខុសប្លង់ក្នុងសៀវភៅបន្ទុក ផ្សារលើដែលបានសម្រេចពីមុនមក។ទន្ទឹមនេះដែរអាជ្ញាធរខេត្តបានព្រមានថា៖ខាងមុខនេះបើក្រុមហ៊ុនថូម៉ាក់នៅតែអនុវត្តមិនបាននូវតួនាទីខ្លួន តាមសៀវភៅបន្ទុកទេនោះ ខេត្ត និងស្នើសុំក្រសួងដកអាជ្ញាប័ណ្ណប្រគល់អោយអ្នក ផ្សេងធ្វើវិញម្តង ហើយ៕ ដោយ រិទ្ធិ ជ័យ
http://ift.tt/1b9buKZ