ស្រវឹងជោគជាំបើកម៉ូតូរេពេញផ្លូវ ទៅបុកឡានគេចតស្ងៀមចំពីមុខពេញទំហឹង ខ្ទាតហោះចេញពីម៉ូតូដួលបោកនឹងថ្នល់បែកមុខបែកមាត់របួសធ្ងន់
ខេត្តកំពង់ឆ្នាំង៖ បុរសម្នាក់ស្រវឹងស្រាជោគជាំ បានជិះម៉ូតូរេពេញថ្នល់ម្នាក់ឯងចូលក្នុងចំណែកផ្លូវរបស់រថយន្ត ហើយបានបុករថយន្តចំពីមុខពេញទំហឹង ខណៈម្ចាស់រថយន្តឃើញសភាពមិនស្រួល បានចតស្ងៀមបានបណ្តាលឲ្យម្ចាស់ម៉ូតូប៉ើងហោះខ្ទាតចេញពីម៉ូតូបោកទៅលើថ្នល់បែកមុខមាត់ហូរឈាមពេញមុខ។ ហេតុការណ៍នៃគ្រោះថ្នាក់ចរាចរណ៍នេះបានកើតឡើងវេលាម៉ោង៧ និង២៥នាទីយប់ថ្ងៃទី៩ ខែមេសា ឆ្នាំ២០១៥ លើផ្លូវកៅស៊ូនៅមុខសណ្ឋាគារសំរោងសែន ស្ថិតក្នុងភូមិផ្សារលើសង្កាត់ផ្សារឆ្នាំងក្រុងកំពង់ឆ្នាំង។
ប្រជាពលរដ្ឋបានឃើញហេតុការណ៍នេះនិយាយអោយដឹងថា៖ អ្នកបើកបរថយន្តម៉ាកកាមរីពណ៌សំបកឪឡឹកពាក់ស្លាកលេខ PP2C-2041 ឈ្មោះ កង ចន្ធី អាយុ៤១ឆ្នាំ រស់នៅក្នុងភូមិឡដទឹកត្រីសង្កាត់កំពង់ឆ្នាំង ក្រុងកំពង់ឆ្នាំង បើកបរថយន្តបានបើកបរពីលិចមកកើត។ ចំណែកអ្នកបើកបម៉ូតូមានឈ្មោះ តា រ៉េម បើកបរម៉ូតូម៉ាកសង់កូរ៉េពាក់ស្លាកលេខកំពង់ឆ្នាំង 1A-6332 បើកបរពីកើតមកលិច។
មុនពេលកើតហេតុគេបានឃើញរថយន្តបើកបក្នុងល្បឿនធម្មតាពីលិចមកកើតខណៈដែលជនរងគ្រោះបើកបរក្នុងល្បឿនយ៉ាងលឿននិងមានស្ថានភាពស្រវឹងខ្លាំងផង បានបើករេមកខាងចំណែកផ្លូវរបស់រថយន្តដោយឃើញស្ថានភាពដូច្នេះអ្នកបើកបររថយន្តបានឈប់ស្ងៀម ឯជនរងគ្រោះក៏បានជិះម៉ូតូបុករថយន្តចំពីមុខពេញទំហឹងម៉ូតូបានទៅនៅពីក្រោមរថយន្ត ចំណែកជនរងគ្រោះបានខ្ទេតចេញពីម៉ូតូដួលបែកមុខបែកមាត់។
ក្រោយពេលកើតហេតុជនរងគ្រោះត្រូវបានប្រជាពលរដ្ឋដឹកតាមម៉ូតូយកទៅកាន់មន្ទីពេទ្យខេត្តកំពង់ឆ្នាំងដើម្បីអោយគ្រូពេទ្យសង្គ្រោះព្យាបាល។ នៅកន្លែងកើតហេតុសមត្ថកិច្ចបានចុះមកធ្វើការវាស់វែងប្លង់គ្រោះថ្នាក់កសាងសំណុំរឿងតាមនិតិវិធី ដោយឡែករថយន្ត និងម៉ូតូត្រូវបានសមត្ថកិច្ចយកមករក្សារទុកនៅអធិការនគបាលក្រុងកំពង់ឆ្នាំង។ ប្រជាពលរដ្ឋដែលបានឃើញហេតុការណ៍នេះ រង់ចាំមើលថាសមត្ថកិច្ចនឹងដោះស្រាយបែបណាដែរ ខណៈដែលអ្នកបើកបរម៉ូតូបើកបរក្នុងស្ថានភាពស្រវឹង ទៅបុករថយន្តក្នុងចំណែកផ្លូវរថយន្ត បង្កគ្រោះថ្នាក់ធ្ងន់ធ្ងរខ្លួនឯងបែបនេះ៕ ដោយ រិទ្ធិ ជ័យ
http://ift.tt/1Elcbg4
