ខេត្តកំពង់ឆ្នាំងប្រារព្ធពិធីសូត្រមន្តប្រោះព្រហ្ម និងរាប់បាត្រទទួលទេវតាឆ្នាំថ្មី
ខេត្តកំពង់ឆ្នាំង ៖ សាលាខេត្តកំពង់ឆ្នាំងនៅព្រឹកថ្ងៃទី១០ ខែមេសា ឆ្នាំ២០១៥ ត្រូវនឹងថ្ងៃ០៧រោចខែចែត្រ ឆ្នាំមមី ឆស័ក្ត ព.ស ២៥៥៨បាននិមន្តព្រះសង្ឃ សូត្រមន្ត ប្រោះព្រហ្មលើករាសី ទទួលអំណរសាទរទេវតាឆ្នាំថ្មី ឆ្នាំមមែ សប្តស័ក ព.ស២៥៥៩ ក្នុងគោលបំណងសុំនៅពរជ័យសិរីសួស្តីគ្រប់ប្រការពីទេវតាឆ្នាំថ្មីសុំជួយដល់លោក លោកស្រីគណៈអភិបាលខេត្ត ក្រុមប្រឹក្សាខេត្ត និងអស់លោក លោកស្រីថ្នាក់ដឹកនាំមន្ទីរ ស្ថាប័ន អង្គភាពមន្ត្រីរាជការអាជ្ញាធរដែនដីគ្រប់លំដាប់ថ្នាក់ និងប្រជាពលរដ្ឋទូទាំងខេត្តកំពង់ឆ្នាំងសូមជួបតែសេចក្ដីសុខចម្រើនទទួលបានជោគជ័យបន្ថែមទៀតនៅគ្រប់ភារកិច្ចរបស់ខ្លួនក្នុងឆ្នាំថ្មីនេះ។
ក្នុងពិធីសូត្រមន្តប្រោះព្រហ្មទទួលទេវតាឆ្នាំថ្មីនេះបានប្រារព្ធទៅក្រោមអធិបតីភាពរបស់លោក ឈួរ ច័នឌឿន អភិបាលខេត្ត និងលោកស្រី និងលោកស្រីដោកសុទ្ធា ប្រធានក្រុមប្រឹក្សាខេត្ត លោក លោកស្រីជាសមាជិកក្រុមប្រឹក្សាខេត្តអភិបាលរងខេត្ត ថ្នាក់ដឹកនាំ មន្ត្រីរាជការអង្គភាពជុំវិញខេត្តកងកំលាំងប្រដាប់អាវុធទាំងបីប្រភេទយាយជីតាជី បានធ្វើពិធីបួងសួង និងសូមពរជ័យសិរីមង្គលពីទេវតាឆ្នាំថ្មីក្នុងការប្រកបការងារជូនជាតិមាតុភូមិអោយមានការអភិវឌ្ឍន៍រីកចម្រើនលើគ្រប់វិស័យនាឆ្នាំថ្មីនេះជាពិសេសនៅខេត្តកំពង់ឆ្នាំងអោយទទួលបានសមិទ្ធផលថ្មីៗថែមទៀត។
ក្នុងពិធីសូត្រមន្ត ប្រោះព្រំ លើករាសីទទួលអំណរសាទរទេវតាឆ្នាំថ្មីដែលបានប្រព្រឹត្តទៅតាមគន្លង ប្រពៃ ណីព្រះពុទ្ធសាសនានៃកម្មវិធីរបៀបវារៈរបស់លោកតាអាចារ្យរួចមកក្នុងកិច្ចសំណេះសំណាលជាមួយថ្នាក់ដឹកនាំ មន្ត្រីរាជការនោះដែរ។ លោក ឈួរ ច័ន្ទឌឿន បានថ្លែងថា ការជួបជុំគ្នាថ្ងៃនេះក្នុងរូបភាពលក្ខណៈ មហាគ្រួសារដ៏ធំមួយនៃក្រុមគ្រួសារមន្ត្រីរាជការរដ្ឋបាលសាលាខេត្តកំពង់ឆ្នាំង និងបណ្ដាអង្គភាពជុំវិញខេត្តដែលមានការនឿយហត់ក្នុងការបំពេញភារកិច្ចការងាររបស់ខ្លួនក្នុងរយៈពេលមួយឆ្នាំមកនេះក្រោមកិច្ចដឹកនាំរបស់សម្ដេចអគ្គមហាទាំងបីពិសេសសម្ដេចតេជោ ហ៊ុនសែន នាយករដ្ឋមន្ត្រី ដែលបានដឹកនាំប្រទេសជាតិមានការអភិវឌ្ឍន៍លើវិស័យទាំងផ្នែកពុទ្ធចក្រនិងអាណាចក្រ។ លោកក៏បានលើកឡើងផងដែរពីការអភិវឌ្ឍន៍ទីក្រុងស្អាតក្នុងនោះក្រុងកំពង់ឆ្នាំងទទួលបានចំណាត់ ថ្នាក់ផ្ការំដួល៣២ទង ក្នុងចំណោមបេក្ខភាពទីក្រុងស្រស់ស្អាតប្រកបដោយភាពទាក់ទាញ២៥ក្រុងទូទាំង ប្រទេស។
លោក ឈួរ ច័ន្ទឌឿន អភិបាលខេត្ត ព្រមទាំងអភិបាលរងខេត្តសមាជិកក្រុម ប្រឹក្សាខេត្ត ថ្នាក់ដឹកនាំ មន្ត្រីរាជការ អាជ្ញាធរក្រុងស្រុកក៏បានធ្វើការបួងសួងសូមឲ្យបារមីដ៏ស័ក្តិសិទ្ធិនៅលើទឹកដីប្រវត្តិសាស្ត្រទឹកដីខេត្តកំពង់ឆ្នាំងដែលមានលោកតាដំបងដែក លោក យាយទេព ព្រមទាំងបារមីព្រះអង្គដែលគង់ថែរក្សានៅខេត្តកំពង់ឆ្នាំងទាំងអស់សូមយាងតាមជួយថែរក្សាការពារដល់ថ្នាក់ដឹកនាំនៃរាជរដ្ឋាភិបាលគ្រប់ជាន់ថ្នាក់ ពិសេសដល់សម្ដេចតេជោ ហ៊ុន សែន នាយករដ្ឋមន្ត្រីនិងសម្ដេចកិត្តិព្រឹទ្ធបណ្ឌិតដែលជាមហាវីរៈបុរសកុលបុត្រខ្មែរដ៏ឆ្នើមក្នុងការដឹកនាំប្រទេសអោយមានការអភិវឌ្ឍន៍រីកចម្រើននៅគ្រប់មូលដ្ឋាន ទទួលបានជោគជ័យនៅឆ្នាំថ្មីព្រមទាំងបានធ្វើការឧទ្ទិសបួងសួងដល់ទេវតាឆ្នាំថ្មី ឆ្នាំមមែ សប្តស័កដែលមានទេវតាព្រះនាម គោរក្សសាទេវីដែលនឹងយាងចូលមកដល់នៅព្រឹកថ្ងៃទី១៤ ខែមេសា ឆ្នាំ២០១៤ត្រូវនឹងថ្ងៃ១១រោច ខែចែត្រវេលាម៉ោង១៤និង១២នាទីសូមជួយប្រោះព្រំហ្មប្រសិទ្ធិពរជ័យ សិរីមង្គលបវរសួស្តី វិបុលសុខគ្រប់ប្រការ ដល់អភិបាលរងខេត្តក្រុមប្រឹក្សាខេត្ត ថ្នាក់ដឹកនាំ មន្ត្រីរាជការ អង្គភាពជុំវិញខេត្តនិងប្រជាពលរដ្ឋទូទាំងខេត្តកំពង់ឆ្នាំង និងប្រជាពលរដ្ឋទូទាំងប្រទេសផងដែរ។
ក្នុងឱកាសនោះដែរក៏មានការនិមន្តព្រះសង្ឃ និងសីលវន្តសីលវតីធ្វើពិធីរាប់បាត្រ ដើម្បីឧទ្ទិសកុសល ផលបុណ្យ ជូនដល់វិញ្ញាណក្ខន្ឋមាតាបិតា ជីដូនជីតា ញាតិកាទាំងប្រាំពីរសន្តាន បុព្វការីជននិងកម្មាភិ បាល យុទ្ធជនយុទ្ធនារីដែលបានពលីក្នុងបុព្វហេតុរំដោះជាតិមាតុភូមិ និងប្រជាជនដែលបានស្លាប់ដោយភាពអយុត្តិធម៌ក្នុងរបបប្រល័យពូជសាសន៍ ប៉ុលពត ដែលបានចែកឋានទៅកាន់លោកខាងមុខ។ នៅក្នុង ពិធីនេះក៏មានការសម្ដែងនូវរបាំត្រុដិដើម្បីធ្វើការបណ្ដេញចេញនូវឧបទ្រពចង្រៃឆ្នាំចាស់និងទទួលយកនូវពរជ័យសិរីមង្គលឆ្នាំថ្មី ជូនដល់អភិបាលរងខេត្តក្រុមប្រឹក្សាខេត្ត ថ្នាក់ដឹកនាំ មន្ត្រីរាជការជុំវិញខេត្តបំពេញ ការងារភារកិច្ចឆ្នាំថ្មីបានទទួលជោគជ័យផងដែរ៕ ដោយ រិទ្ធិ ជ័យ
http://ift.tt/1FwL2mC
