បុរសម្នាក់ អួតក្អេងក្អាងក្នុងវង់ផឹកស៊ីបង្កជម្លោះ ដាល់បុរសម្នាកដួលផ្កាប់លើដីតែបានស្ទុះទៅយកកាំបិតមកកាប់សងវិញចំកញ្ចឹងករយះហូរឈាមស្រោចខ្លួន
ខេត្តកណ្ដាល៖ បុរសអ្នកភូមិក្បែរខាងគ្នាប្រមាណ១០នាក់ បាននាំគ្នាផឹកស៊ី រហូតដល់ស្រវឹងស្រឿងៗទាំងអស់គ្នា ។ ក្នុងចំណោមនោះ បុរសម្នាក់បន្ទាប់ពីស្រាចូលពោះសម្តែងឫកកោងកាចដោយប្រមាទគេឯងនៅក្នុងវង់ផឹកស៊ីនោះថា ក្នុងចំណោមទាំងអស់គ្នាហ្នឹង អាណា ក៍អញមិនខ្លាចដែរ ហើយពាក្យនេះចេះតែស្រែកដាក់គេឯងក្នុងវង់ផឹក ដែលម្នាក់ៗស្រាចូលពេញពោះគ្រប់ៗគ្នាទៅហើយនោះ បានទាក់ពាក្យជាមួយបុរសម្នាក់ ហើយបានធ្វើឲ្យផ្ទុះជម្លោះដោយ បុរសដែលតាំងខ្លួនជាអ្នកខ្លាំងបានដាល់បុរសម្នាក់ទៀតដួលដេកលើដី ហើយបុរសដែលត្រូវគេវាយនោះបានស្ទុះទៅយកកាំបិត មកកាប់សងវិញ ធ្វើឲ្យបុរសបង្ករឿងដែលក្អេងក្អាងថាមិនខ្លាចអាណានោះរយះកញ្ចឹងកហូរឈាមស្រោចខ្លួន បណ្តាលឲ្យកម្មវិធីដមកែវ ចាន កំពប់ខ្ទាតខ្ចាត់ខ្ចាយ និងបង្កឲ្យមានការភ្ញាក់ផ្ងើលពេញភូមិ។ ហេតុនេះបានកើតឡើងនៅវេលាម៉ោង១៧ និង០០នាទី ថ្ងៃទី២៤ ខែមេសា ឆ្នាំ២០១៥ នៅភូមិទួលស្វាយ ឃុំកំពង់កុង ស្រុកកោះធំ ខេត្តកណ្ដាល។
នគរបាលប៉ុស្ដិ៍កំពង់កុងបានបញ្ជាក់ឲ្យដឹងថា ជនរងគ្រោះ និងជនល្មើស រួមនឹងបងប្អូនជីដូនមួយទាំងអស់ប្រហែល១០នាក់ បានផឹកស៊ី ខណៈកំពុងផឹកស៊ី ឈ្មោះ ណេង រ៉ា បានចាប់សម្តែងឫកអួតក្អេងក្អាងថា ក្នុងចំណោមទាំងអស់គ្នាហ្នឹង អាណា ក៍អញមិនខ្លាចដែរ ហើយបានទាក់ពាក្យសំដីគ្នាស្ទុះមករកវ៉ៃឈ្មោះ ធឿន រិទ្ធីហើយឈ្មោះ ឃី តយ ឃើញក៍ស្ទុះចូលទៅឃាត់ស្រាប់តែឈ្មោះ ណេង រ៉ា វាយ ឈ្មោះ ឃី តយ ដួលទៅដី ហើយឈ្មោះ ឃី ឃាង ឃើញគេ វាយប្អូនដួល ក៍ស្ទុះចូលមកជួយឃាត់ ហើយបានជាប់ដៃគ្នាជាមួយឈ្មោះណេង រ៉ា ឈ្មោះឃី តយ ក៍បានគេចខ្លួន រួចស្ទុះទៅទាញ កាំបិតតាំងតោ មកកាប់ត្រូវចំក ពីក្រោយឈ្មោះ ណេង រ៉ា មួយកាំបិតតែម្តង បន្ទាប់មកឈ្មោះណេង រ៉ា រួម និងបងប្អូន ព្រួតគ្នាវាយទៅលើឈ្មោះឃី ឃាងទៀត តែបានបងប្អូននៅទីនោះចូលជួយឃាត់ទើបឈ្មោះ ឃី ឃាង ដកខ្លួនរត់ចេញតែម្តង។
នគរបាលប៉ុស្ដិ៍កំពង់កុងបានឲ្យដឹងថា ជនដែលត្រូវគេកាប់នោះមានឈ្មោះ ណេង រ៉ាភេទប្រុស អាយុ៣៥ឆ្នាំ នៅភូមិទួលស្វាយ ឃុំកំពង់កុង ស្រុកកោះធំ ខេត្តកណ្ដាល រងរបួសត្រូវចំកពីក្រោយ០១កាំបិត ហើយសាច់ញាតិបាននាំទៅពេទ្យដេរជាច្រើនថ្នេរ។ ចំណែកជនល្មើសឈ្មោះ ឃី តយ ភេទប្រុស អាយុ២៣ឆ្នាំនៅភូមិ ឃុំកើតហេតុជាមួយគ្នា បន្ទាប់ពីកាប់គេបានសម្រេចរួចរត់គេចខ្លួនបាត់។ ទោះយ៉ាងណានគរបាលប៉ុស្ដិ៍កំពង់កុងកំពុងស្រាវជ្រាវស្វែងរកចាប់ខ្លួនជនល្មើស ដើម្បីចាត់ការតាមនីតិវិធីច្បាប់៕ ស្រីម៉ៅ
http://ift.tt/1FlA9Zd
