ចាន់ គង់ការ មានចំណងស្នេហ៍ ជាមួយអ្នកបម្រើការងារ នៅអេស៊ីលីដា តាំងពីមុន ចូលសិល្បៈ
ភ្នំពេញ៖ មិនមែនជារឿងធម្មតាទេ ដែលក្មេងស្រីបម្រើការងារ ក្នុងសណ្ឋាគារម្នាក់ បានក្លាយជាកំពូលតារា បង្ហាញម៉ូដកម្ពុជាកញ្ញា ចាន់ គង់ការ ក្នុងវ័យ២០ឆ្នាំ បានទទួលជ័យលាភីលេខ១ ក្នុងការប្រកួតពោរពេញទៅដោយភាពចម្រូងចម្រាស រវាងនាង និងកេសី ។ ចាន់ គង់ការ ជាក្មេងស្រីម្នាក់ មានសមត្ថភាពបំផុត ក្នុងការដើរកាច់រាង និងថតរូបភាពគ្មាននរណា អាចប្រជែងនឹងនាងបានឡើយ ។ បើនិយាយពីភាពស្រស់ស្អាត គឺហាក់មិនមានស្ថានភាពស្ទុះខ្លាំង ឲ្យមហាជនចាប់អារម្មណ៍ឡើយ ពោលក្នុងលក្ខណៈធម្មតាៗ តែវាបានបង្ហាញឡើង នៅពេលនាងស្លៀកពាក់ និងកាច់ស្ទីលក្នុងរូបថត នេះជាលក្ខណៈចំបងបំផុត សម្រាប់អ្នកបង្ហាញម៉ូដគ្រប់គ្នា ។
តាំងពី ចាន់ គង់ការ ជាប់ចំណាត់ថ្នាក់មក គេមិនទាន់បានដឹងថា នាងមានម្ចាស់ស្នេហ៍ឬនៅទេ ស្របពេលមានមន្ត្រីធំ អ្នកជំនួញក្នុងស្រុក ព្យាយាមចង់ស្ទូច យកបេះដូងនាងមកធ្វើជាគូគាប់ទ្រនាប់ចិត្ត ។ តែប្រភពពីអ្នកជិតដិតនឹងគង់ការ បាននិយាយថា មិនអាចទៅរួចទេ ព្រោះគង់ការបានប្រគល់បេះដូង ទៅឲ្យបុរសសាមញ្ញម្នាក់រួចទៅហើយ ។ ចំណងស្នេហ៍របស់ពួកគេ បង្កើតឡើងរាប់សិបឆ្នាំ មុននាងចូលប្រកួតក្នុងកម្មវិធី «កំពូលតារាបង្ហាញម៉ូដកម្ពុជា» មកម្ល៉េះ ។
ម្ចាស់ស្នេហ៍របស់ស្រីស្រស់ គង់ការ ត្រូវបានគេស្គាល់ថា បម្រើការងារនៅធនាគារ អេស៊ីលីដា ក្នុងខេត្តសៀមរាប ផ្នែកបម្រើសេវាអតិថិជន និងមានបេះដូងដ៏ស្ម័គ្រស្មោះចំពោះ គង់ការ មុនពេលនាងជាប់ជាជ័យលាភី ។ ពួកគេបានបង្ហាញយ៉ាងចំហរ ចំពោះចំណងស្នេហ៍ តែក្រោយជាប់ក្នុងកម្មវិធីកំពូល តារាបង្ហាញម៉ូដកម្ពុជា ពួកគេបែរជាព្យាយាម លាក់បាំងរឿងនេះទៅវិញ ។ គេហទំព័រកម្សាន្ត LookingTODAY មិនអាចទាក់ទងកញ្ញា ចាន់ គង់ការ ដើម្បីបំភ្លឺបានទេ ព្រោះលេខទូរស័ព្ទ ដែលនាងឲ្យសម្រាប់ទាក់ទង Call មិនចូល ប៉ុន្តែសង្ឃឹមថា នាងនឹងចេញមុខបកស្រាយនៅពេលក្រោយ ។
មានការកត់សម្គាល់ថា សម្រាប់គូស្នេហ៍ ដែលចាប់ផ្ដើម មុនចូលប្រឡូកក្នុងសិល្បៈ គឺភាគច្រើនពិបាកនឹងរក្សាឲ្យគង់វង្សណាស់ កុំថាឡើយសង្សារ ឬជាគូដណ្ដឹង ទោះបីជាប្ដីប្រពន្ធ ក៏បែកបាក់យ៉ាងងាយបំផុតដែរ ព្រោះតែអំណាចនៃទឹកប្រាក់ កេរ្តិ៍ឈ្មោះល្បីល្បាញ ធ្វើឲ្យតារាល្បីៗទាំងនោះ គ្មានស្ដាយស្រណោះ អនុស្សាវរីយ៍ចាស់ៗអ្វីសោះឡើយ ។ ប៉ុន្តែចំពោះ គង់ការ គេមិនទាន់អាចសន្និដ្ឋានបានទេថា នាងប្រុងដើរតាមគន្លង តារាចាស់មួយចំនួន ឬយ៉ាងណា ព្រោះបច្ចុប្បន្ននេះ ភាពស៊ីវិល័យ និងសម្ភារៈនិយម ងាយនឹងអូសទាញមនុស្សជាទីបំផុត ៕
ផ្តល់សិទ្ធិដោយ ដើមអម្ពិល
from Khmernote - The best entertainment website in Cambodia http://ift.tt/1DS2BTw
